APOSTOLO 8:12-23

¹²Má ngo matananu di longrai arbin si Pilip sur Iesu Karisito má lolsit si Káláu, ái rung er di ruruna, tan káláu má boh wák mul, ding kipi arsiu.

¹³Mái Saimon mul a ruruna máng kipi arsiu namur, pasi ngorer ák patap i Pilip, má ák lala pánsálngát suri mákái tara akiláng ái Pilip a longoi.

¹⁴Ami Ierusalem, boh apostolo di longrai ngo ái rung i balis á Samaria dikte ruruna má i pinpidan si Káláu, ki ngorer dik dos pala Petero mái Ioanes uri narsá di.

¹⁵Ái rung minái dikte hutngin kipi arsiu i ngisán ái Konom Iesu, mái sár Tanián a Pilpil kápte be a porta i tekes tili di. Má ngo ái Petero mái Ioanes diar hut iatung, ki diar má sung Káláu suri Tanián a Pilpil na hut sosih suri nák porta i di,

¹⁷má namur diará oboi lim diar ami iátin lul di keskeskes, ki erár má ák porta i di á Tanián a Pilpil.

¹⁸Mái Saimon tám latlat a mákái ngo Tanián a Pilpil a porta i di ái rung er diar oboi lim diar i iátin lul di, ki ák nem ngo na hul pasi rakrakai er mai pirán tabal,

¹⁹mák parai ái Saimon si diar ngoromin, “Awái! Gaur tari bul singing á rakrakai erei suri inak arwat mul suri oboi limang i tan kálámul má Tanián a Pilpil nák porta i di.”

²⁰Má diar longrai ngorer ki ák bali ur on ái Petero ngoromin, “Á iáu mai kam pirán tabal gaura mosrah tiklik, kabin u hol on ngo iáu arwat suri hul pasi artabar káián ái Káláu mai kam pirán.

²¹Á iáu káp kam te kuir on á him minái kabin balam kápte a nokwan i mátán táil ái Káláu.

²²Una hol kaleng alari kam sápkin holhol erei má unák sung uri narsán ái Konom, má koran nák pah palai kam sápkin er a kis i balam.

²³Kabin iau mák iáu ngo balam a káng mai bálsák má á iáu iáu toptop káián sápkin.”