SALAMO 95:2-11

²Lohiabada ena vairanai do ita haboua mai. Ia hanamoa totona ane do ita abia, mai moale bada danu.

³Badina ia sibona be Dirava mai siahu badana. Ia be King goadana, bona dirava ibounai be ia ese ia hereaia.

⁴Ia ese tanobada ibounai ia biagua noho. Tano lalonai idia noho guri dobudia bona nadi kohua badadia, bona ororo badadia momokani danu, be Lohiabada ena imana lalonai idia noho.

⁵Lohiabada ese davara, ia ese ia karaia gauna ia biagua noho, tano gabudia ibounai danu ia ese ia biagua noho. Ia ese unai gabudia danu ia karadia.

⁶Umui mai, iseda kwarana do ita atoa diho, Lohiabada do ita tomadiho henia. Lohiabada ena vairanai do ita tui diho. Ia ese ita ia karaia vadaeni.

⁷Ia be iseda Dirava. Ia ese ita ia naria namonamo, ita be iena mamoe bamona, bona ia ese ita dekenai aniani ia henia noho. Hari dina iena hereva do umui kamonai.

⁸Lohiabada ia gwau, “Oiemu lalona do oi ha-aukaia lasi, oiemu sene taudia idia karaia bamona Meriba dekenai, bona Masa ena taunimanima noho lasi gabuna dekenai danu.

⁹Unuseni idia ese lau idia dibagania, lau dekenai idia abidadama lasi. Idia ese lauegu kara badadia, idia dekenai lau karaia gaudia idia itaia, to lau dekenai idia abidadama lasi.

¹⁰Lagani 40 lalonai unai taudia ese lau idia habadua. Lau gwau, ‘Idia be abidadama diba lasi, idia be hekokoroku momokani, bona egu hereva idia ura lasi idia kamonai henia.’

¹¹Unai dainai lau be badu, bona lau hereva, lau gwau, ‘Momokani, umui be tano namona dekenai do umui vareai lasi. Lau ura unai gabu dekenai laga-ani umui do lau henia, to umui be hegeregere lasi.’ ”