GWAY GI IDAWUU’D 95:2-11

²Dhalki ana iiyina mo e buŋ’kus piti mo mmoc̱i mo jin ’boruwa ’bor bwa i is mo. Dhalki ana ’kunya bwa kagahara mmowol cuuwa/ nyaḵki gway jin maŋuwa maŋ mo.

³Haali/ Tap̱a a’di ta’da Arumgimis jin caaca mo, dhali a’di ita’da Maliḵ jin caaca ap̱owa risa rum p̱inycon mo.

⁴E me’d piti mo tani moŋ’kulga/ gi mony’cesh ’kokin mo, dhali mo jin ḵa’dama/ ḵa’dam kun ta wosha turga/ si’da/ uni ta kum piti mo.

⁵Ḵumma/ yi’de/ uni ta kum piti mo, haali/ a’di i/uḵki uni mo, haali/ me’d piti a’di uḵki mony’cesh jin ḵuthaḵu’th mo.

⁶Ayy iiyu/ mo, dhalki ana luŋa luŋ mo, dhali ’ko ki jiŋ ’kup̱a’dup̱un mo, dhalki ana raḵa is ka ’cesh ibwambori Tap̱a jin uḵki ana mo.

⁷Haali/ a’di ta’da Arumgimis bana mo, dhali ana tana ’kwani ma shon dhii/i’d piti mo, dhali ḵa’bal gi me’d piti mo. Ayy ka tee yan shwane/ mo ki um mini ’taki ciḵ ’twam piti moyi.

⁸Dhalka dum bum ki ’bi’th mo me’d mo jin yuḵu gway ka Mariiba mo me’da tee yan jin ta’da tee ma Massa e bwaasho mo,

⁹ki ibabam bum palki aha/ mo dhali kar aha/ mmonyo/ mo, ba uni mishki miim pem mo be.

¹⁰Ki yila issu/ mo tani aha/ jwakaṯkunuwa du mo gom ’kwani ma nyaḵum yil gwan mo, dhali o gwo mo ki: Uni ’kwani gwansan uni tan ma dum buni ṯẖuthu/ ki ṯẖuthu/ mo, dhali uni ’koki dhu gwo ki bway pem mo.

¹¹Wakan aha/ thulkina gwo me’da p̱o/ ka nyor pem mo ki uni mini ’taki ’koki cic̱ mo e mo jin sinu is mo be.