Kölfel 95:2-11

²Ousipwe feito fän mesan fän kilisou, ousipwe mweireir fän pwapwa ngeni Kot ren kölün mwareiti i.

³Pun ewe Samol mi Lapalap eman Kot mi tekia, eman king mi tekia seni ekewe kot meinisin.

⁴Ekewe leni mi alolol won fanüfan ra nom lepöün, pwal ungen ekewe chuk an.

⁵An ewe matau, pun förian, pwal an ewe fanüpwas, pun afisian.

⁶Ou etto, ousipwe chapetiu o fel ngeni, ousipwe fotopwäsuk fän mesen ewe Samol mi Lapalap ewe chon förikich.

⁷Pun i ach Kot, nge kich nöün aramas i a tümwünü, kich nöün mwichen sip i a foleni. Ikenai, are oupwe aüselinga alon,

⁸ousap apöchöküla lelukemi usun a fis me lon Meripa, usun a fis lon ewe rän me lon ewe fanüapö lon Masa,

⁹lupwen ämi kewe lewo ra sotuniei, ra aleletaei, nge ra fen küna ai kewe föför üa föri fän iter.

¹⁰Lon ükükün faik ier üa song ngeni ei täppin aramas o üra, “Ir eu mwichen aramas mi tokola leluker. Resap fokun mochen aleasochisi ai kewe allük.”

¹¹Iei mine üa pwon fän akapel lon ai song pwe resap tongeni tolong lon ewe fanü ia üpwe asösöör ie.