SALAMO 80:4-19

⁴Iehova Sabaota e, emu bese taudia edia ḡuriḡuri na ba badulai ela bona edena nega ai?

⁵Iruru-mata o ha-anilaidia, bona ma o ha-inulaidia davana.

⁶Dekemai taudia edia ihi-ihirai ḡauna ai vada o halaomai; ai inaimai ese e kirikirilaimai hehenimu.

⁷Iehova Sabaota e, ba hamaurimai; oi vairamu baine diari, bena baia roho mauri.

⁸Vine auna ta Aigupto amo o mailaia; bese idau-idau o luludia lasi, bena o hadoa;

⁹tano o lailaia, ia ihadona totona, ramuna e hedai, tano e vevea ahu.

¹⁰Ororo na ia ese e hakerukerudia, sida audia badadia na ia rigina ese e lahea ahu;

¹¹ia rigina e toia roro ela bona davara, ia tuhutuhuna ela bona sinavai badana.

¹²Dahaka dainai ia maḡuna vada o hamakohia, bena raka-hanai taudia iboudiai ese ia huahuana e burukimu?

¹³Uda boromana ese e raḡaiamu; uda ḡaudia iboudiai ese e heubulaimu.

¹⁴Iehova Sabaota e, a roha kerehai! Guba amo a roha dobi, a itaia. Ina vine auna a haḡerea,

¹⁵ia na oi imamu idibana ese e hadoa ḡauna.

¹⁶Idia ese lahi amo e doua, bona e utua oho; oi vairamu baduna ese baine hamasedia be namo.

¹⁷Oi imamu na idibamu kahana tauna latanai baine mia, bona taunimanima natuna, o hagoadaia sibomu emu, latanai.

¹⁸Bena oiemu amo basia raka muri; mauri ba henimai, bena oi ladamu baia hahanea.

¹⁹Iehova Sabaota e, ba hamaurimai; oi vairamu baine diari, bena baia roho mauri.