Miti Mânec 80:4-19

⁴O Wofuŋ, Anutu Tâpiri Ɋuŋɋasaŋ Wofuŋ, gurufâcge jaŋe numu‐gare‐bipiehapie kimbeŋ qajareku mo dameŋko behecmu?

⁵Goki mutec ʒâŋeuc‐jeŋiczi nânâ‐jeŋic ruacneha nâeŋgopieŋ, ʒâŋeuczi nânâ opâ‐jeŋic eekac.

⁶Goki mutec ŋicne ŋicne rârec‐nâpohuc jueŋgopieŋ jaŋe nifepupu enâreeŋgopieŋ, râsifâc‐nâŋec jaŋe mu gâgâwi enâreeŋgopieŋ.

⁷Anutu Tâpiri Ɋuŋɋasaŋ Wofuŋ, go heɋârec‐nâpoc; ʒâŋe maigezi tamaeme biaŋ‐nâpozejec.

⁸Go Aigita mâreŋkonec waiŋ qizec unuckemeŋ, erâ qâpuc guru jâpec‐jopahuc sarameŋ;

⁹go mâreŋ bâburockecnemeŋ, eme gâtâ barâ mâreŋ bârârâŋnewec.

¹⁰Tieŋnezi tikine tikine mumuc qajarewec, â qaŋeŋnezi jâmâzâc sâko sâockewec;

¹¹tieŋne sicneme ŋifec raku hâwec bâfuawec, â ŋifec raku Eufrata opâ sâkoo fisiwec.

¹²Eme wemocte qânâsac‐ticne hetâtiemeŋ, eme sicne fotâc eeŋgopieŋ jaŋe fârine batara nâc eeŋgopieŋ?

¹³Kâtebec ŋicne jaŋe gâtâne qâfieeŋgopieŋ, â kâte qowi jaŋe gupiŋne kitâcne nâc eeŋgopieŋ.

¹⁴O Anutu Tâpiri Ɋuŋɋasaŋ Wofuŋ, mocwâc forisiec, sambâŋkonec fitec wahame honec, ehuc waiŋ qizec kecʒirec moc mana mezac ec.

¹⁵Go hâcne ukicne mefâregezi sarameŋ, go hâcne nuucne jauŋketec fua sokac ewec.

¹⁶Jaŋe ʒoczi rikembiŋ erâ wâc hetâcnembiŋ; gore kimbeŋ ʒâŋezi bâsirowec‐jopazejec.

¹⁷Mefâregere ŋic ine megezi bâsâockezemec, ŋicte ɋâric jauŋkehaŋ soka‐garewec e sabeckezemec.

¹⁸Eme nâŋe mocwâc mi râpecgunʒepeneŋ; juju ɋâri nârec, eme ʒâŋege muafeckenaŋmu.

¹⁹Anutu Tâpiri Ɋuŋɋasaŋ Wofuŋ, go heɋârec‐nâpoc; ʒâŋe maigezi tamaeme biaŋ‐nâpozejec.