Buk Song 80:4-19

⁴God, Bikpela I Gat Olgeta Strong, hamas taim yet bai yu kros long ol prea bilong ol manmeri bilong yu?

⁵Yu bin mekim mipela i krai tumas, na aiwara bilong mipela i olsem kaikai na dring bilong mipela.

⁶Yu larim ol arapela lain manmeri i stap klostu long mipela ol i kam pait bilong kisim graun bilong mipela. Na ol birua i tok bilas na i lap long mipela.

⁷God I Gat Olgeta Strong, yu ken kisim mipela i go bek gen. Yu ken marimari long mipela na helpim mipela bai mipela i no ken lus.

⁸Bipo yu bin kisim wanpela diwai wain long Isip na bringim i kam. Na yu rausim ol arapela lain long dispela graun, na yu planim dispela diwai wain long graun bilong ol.

⁹Yu kliaim wanpela graun bilong en, na yu planim pinis. Em i kamap na rop bilong en i go daun olgeta na em i kamap bikpela tru na i karamapim olgeta hap bilong graun.

¹⁰Na han bilong dispela diwai wain i karamapim olgeta maunten na ol traipela diwai sida.

¹¹Han bilong en i go inap long biksolwara Mediterenian na i go inap long wara Yufretis.

¹²Tasol bilong wanem yu brukim pinis ol banis i raunim gaden wain? Nau ol manmeri i wokabaut long rot, ol i inap stilim kaikai bilong en.

¹³Na ol welpik i save krungutim na ol wel abus i save kaikai.

¹⁴God I Gat Olgeta Strong, yu mas tingting gen long mipela. Yu stap long heven na yu mas lukluk i kam daun long mipela. Mipela i olsem diwai wain bilong yu. Kam helpim mipela.

¹⁵Yu yet yu bin planim mipela long strong bilong yu. Nau yu mas kam helpim mipela. Mipela i olsem yangpela diwai wain yu bin mekim i kamap strong tru.

¹⁶Ol birua bilong mipela i katim pinis na kukim long paia. Mobeta yu mas kros long ol na bagarapim ol.

¹⁷Tasol mipela ol manmeri yu bin makim bilong yu yet, na yu bin mekim mipela i kamap bikpela na strong, olsem na yu mas helpim na lukautim mipela.

¹⁸Sapos yu mekim olsem, orait bai mipela i no inap lusim yu gen. Yu helpim mipela i stap gut, na bai mipela i beten long yu na litimapim nem bilong yu.

¹⁹God, Bikpela I Gat Olgeta Strong, yu mas kisim mipela i kam bek long yu. Marimari long mipela na helpim mipela, bai mipela i no ken lus.