Samu 80:4-19

⁴Anatu Porai Wakasa doko embame yuu akipare embena wambunya ateŋa doko soo imbumi kumuo kararese?

⁵Embame kondange renge doko nenge ingyuo nalapa lao jilini. Ee ipwange kenda doko penge kapo dokona sero simbwapala ipwa ingyuo nalapa letene.

⁶Namwana parali maki dupwame namwana yuu doko yanda pyuo nyinya lao panda maiyuo kaelene. Yanda pimwai dupwame namwa kando pii mora nyuo giyalya giyana pilyaminyi.

⁷Anatu Porai Wakasa dokome namwa range sukusa nyepe. Embame sakame kumungi renge doko lasaka pirinyi dokopa namwa kyawa minyinyale.

⁸Wamba dokopa embame isa girapo mende yuu Isipi dokona nyepala minyuo epepya. Dopa pipala rara wakale dupwa pyao ralinyi karapala dokopa isa doko nakamana yuu dokona wara pinyi palyipya.

⁹Embame andara panda doko panda pyuo renge pinyi nembeepya. Baa pingi kamame koko pao andapala angi dokome yuu peparae minyarambu nyiya.

¹⁰Isa girapo doko ando pangwapala isa imambu dokome yuu kyau doko pau lao sembeya. Wangya pangepe dokome mee isa ama londe dupwa rau lanyi pyambuya.

¹¹Wangya pangepe pyao panguyamo dokome nanesa pao ipwa kota pete andake Metitaraniane lenge doko kando nyuo dee ipwa Yuporisa lenge nanesa epeya dokona kando nyuo pao suu lao piya.

¹²Akipamo embame kame pirukarenge doko lalyinyi retelepe? Wambu peparae kata papirami dupwame kandapala isa girapo jingi waa lyuo nyerami ingilyamo.

¹³Isa girapo doko mena rae lengeme kalyuo pyarakwaminyi dokopa wii saape mee dokome naopelyaminyi.

¹⁴Anatu Porai Wakasa doko embame namwa kame soo kaeya napipi. Yake dorena karo kandanyi malyo kandapala namwa embena wambu dupwa pyuo nyepe.

¹⁵Namwa embame isa girapo ingyuo wara piinyi palyipya dupwa nyisala ipu. Namwa isa girapo ene nyaŋa dopale doko embame minyuo ando porainyi pyambui.

¹⁶Namwana yanda pimwai dupwame pyakepo isarena yangeyami kande dokopa embame imbu singi manjo kandapala nakama randa maiyuo kokwa sinyi nembape.

¹⁷Namwa emba rangeme embena wambu lao rombo palyuo nyiinyi dokome range nyiso kando kyawa minyuo karape. Embame namwa ando porai inginyi pyambui kande.

¹⁸Namwa emba deeko yaki nyuo neta paa narama. Namwa lete karalapa lao pirinyipa namwame embena kingi lakando kararama.

¹⁹Kamongo Anatu Porai Wakasa dokome namwa range sukusa nyepe. Embena sakame kumungi renge doko lasaka pirinyi dokopa namwa kyawa minyinyale.