ROMANOS 3:9-31

⁹Mu xuꞌ cꞌu xcaltic. Mu joꞌcutic más lecutic, joꞌotic li jꞌisraelutique. Ical xa ti coꞌol jpasmulilutic ta balumil jcotoltic cꞌalal ta joꞌoxuc eꞌuc li maꞌuc jꞌisraeloxuque.

¹⁰Yuꞌun jech onoꞌox tsꞌibabil ta scꞌop li Diose: Mu junuc crixchano ti leque.

¹¹Mu junuc buchꞌu pꞌij, mu junuc buchꞌu saꞌ cuꞌuntic li Diose.

¹²Naca chopol li cꞌustic ta jpastique, nom oyutic ta stojol li Diose. Mu junuc buchꞌu spas yuꞌun li cꞌusi leque.

¹³Mu junuc buchꞌu lec li cꞌusi chale. Li quetique tu yaꞌel jech chac cꞌu chaꞌal li muquenal mi muc bu macbil leque. Li cocꞌtique yuꞌun jaꞌ chijyacꞌutic ta vocol. Jaꞌ tsloqꞌues scotol li cꞌustic chopolique. Oy chamebal ta quetic yaꞌel jech chac cꞌu chaꞌal schial ye li chone. Yuꞌun chijmilvanutic yaꞌel ta scoj li cꞌustic chcaltique.

¹⁴Naca chopol li cꞌusi chcaltique jech ta xvinaj o ti xtiꞌet noꞌox coꞌontic cuxulutique.

¹⁵Ti cꞌusi jutuc chopol chcaꞌitique, mu xcuch cuꞌuntic, xuꞌ xa noj xijmilvan o ta ora.

¹⁶Buyuc batcutic ta jsocbetic sjol yoꞌon li crixchanoetique, ta jsaꞌbetic svocolic.

¹⁷Yuꞌun mu pajesbaj li coꞌontique.

¹⁸Yuꞌun mu jxiꞌtic li Diose, xi onoꞌox tsꞌibabil.

¹⁹Jnaꞌojtic ti jaꞌ jcꞌoplaltic eꞌuc, joꞌotic li jꞌisraelutique, yuꞌun muc bu onoꞌox chꞌunem cuꞌuntic li smantaltac li Dios li quichꞌojtique. Jaꞌ yuꞌun mu xuꞌ ta jpoj jbatic ta stojol li Diose yuꞌun oy jmultic jcotoltic. Scotol crixchano oy smulic ta stojol li Diose.

²⁰Yuꞌun mu junuc buchꞌu spas yuꞌun jech chac cꞌu chaꞌal ta xal li mantaletique, jech maꞌuc ta sventa mantal ti muꞌyuc jmultic chijyilutic li Diose. Ti laj yacꞌbutic li mantaletic li Diose, jaꞌ noꞌox sventa acꞌo jnaꞌtic o ti oy jmultique.

²¹Li avie jnaꞌojtic xa ti maꞌuc ta sventa li mantaletic ti lec chijyilutic li Diose. Lec chijyilutic o mi ta jchꞌuntic ti jaꞌ icham ta jcojtic li Cajvaltic Jesucristoe. Yuꞌun jech onoꞌox tsꞌibabil ta sjunic li Moisese schiꞌuc li buchꞌutic yan iyalic scꞌop Dios eꞌuc ta voꞌonee. Scotol li buchꞌutic jaꞌ ta schꞌunique lec ta xꞌileic yuꞌun li Diose. Jaꞌ noꞌox jech ta xcolic o scotolic li crixchanoetique.

²³Yuꞌun jcotoltic jpasmulilutic. Mu jtabetic cꞌu sba yoꞌon li Diose.

²⁴Pero li Diose toj lec yoꞌon, jech jmotontic ti muꞌyuc jmultic chijyilutic ta sventa ti la stojbutic jmultic li Jesucristoe.

²⁵Li Diose yaloj onoꞌox ti chtojbat smulic scotol crixchanoetic yuꞌun li Snichꞌone, yoꞌ jech muꞌyuc smul ta xꞌileic li buchꞌutic ta schꞌunic ti jaꞌ Yajcoltavanejic li Jesuse. Ta sventa ti jech yaloje, jaꞌ yuꞌun la spasbe perton li buchꞌutic ischꞌunic ta voꞌone li cꞌalal muc toꞌox bu chamem li Snichꞌone. Jaꞌ yuꞌun cꞌalal icham ta cruz li Snichꞌone, li Diose iyacꞌ ta ilel ti tucꞌ li cꞌusi tspase.

²⁶Jech li avie muꞌyuc smulic ta xil li buchꞌutic ta schꞌunic ti jaꞌ Yajcoltavanejic li Jesuse.

²⁷Jaꞌ yuꞌun mu xuꞌ ta jtoy jbatic yuꞌun mu jtucuc la jpoj jbatic. Jaꞌ noꞌox venta mi jchꞌunojtic ti jaꞌ Cajcoltavanejtic li Cajvaltique jaꞌ chijcolutic o.

²⁸Yuꞌun jnaꞌojtic ti jaꞌ noꞌox lec ta xꞌileic yuꞌun Dios li buchꞌutic jech schꞌunojique. Maꞌuc ta sventa mi la schꞌunic li smantaltac Diose, mi muc bu schꞌunic.

²⁹Li Diose maꞌuc noꞌox jtuc Dios cuꞌuntic, joꞌotic li jꞌisraelutique; jaꞌ Dios yuꞌunic eꞌuc li buchꞌutic maꞌuc jꞌisraelutique.

³⁰Jun noꞌox Dios cuꞌuntic jcotoltic. Scotol li buchꞌutic ta schꞌunic ti jaꞌ Yajcoltavanejic li Cajvaltique, jaꞌ muꞌyuc xa smulic ta xꞌileic o yuꞌun li Diose, acꞌo mi yichꞌojic circuncisión, acꞌo mi muc bu yichꞌojic li circuncisione.

³¹Ti jech jchꞌunojtic ti jaꞌ chijcolutic ta sventa li Cajvaltique, mu me jnoptic ti muꞌyuc sbalil li smantaltac li Diose. Jaꞌ to jech jchꞌuntic o, yuꞌun chiscoltautic li Cajvaltique.