Romu 3:9-31

⁹Meve me divi? Nu oraimina iyayapan upeba mina onan? Nu watavit wag pui yumuntu, “Ju igiyawa ge Griisu igiyawa, iyayapan undag mu kukaeba gumbe wakeeme.”

¹⁰Kuiyawa mamaib tene. “Bira da God namive oraiwa onan. Da desirom onan.

¹¹Bira da den yaug anobodne. Bira da God oya den didimama aivi.

¹²Undag daieve amiya sira ebu muma waropiyaya, sira undag kukaeba gumbe toboraya. Bira da den oraiwa aivi. Da desirom onan.”

¹³“Mu meyowa mempotat yampot watabne. Mu pednowa gumbe ugauga veme.” “Mu nou kwapiwa ankwatave mokare yoiba kukaeba wakene.”

¹⁴“Mu nouwa enewaruwat ge sisiwa gumbe noidauwane.”

¹⁵“Amowa mu oma ane kintoeme mut ag ganigani wattan oya.

¹⁶Watkukamtanwa ge danadawai mu ebuwave.

¹⁷Sira mu yum ebuwawa den yaug anoya.”

¹⁸“Mu yangowo namive God gumbe a onan.”

¹⁹Nu mamaib yaug anotu. Dividivi gumbe Gwangwan waiviwa undag me Gwangwan ankwatave wakeeme igiyawa munan. Me nouwa undag iyaigitpe, piyu mame undag God keptete gumbe noiwa autan oya.

²⁰Kuiyawa Gwangwan aigimtanwa gumbe, bira da oma den ane oraimina ape God namive. Megara Gwangwan gumbe kukaeba numa yaug anota.

²¹Megara gare mame di, God oraiwa meuma me taibe toyau nunne, me Gwangwan amaratanwa gumbe onan. Me Gwangwan ge Propeta bukaeba danave wait tenewa.

²²Me God oraiwa me Iesu Keriso gumbe anotumat eme igiyawa undag mu gumbo muniviwa. Ube onan iyayapan yapowo.

²³Iyayapan undag kukaeba aya, meoya God gumbe mu oma den ane eyawa aupe.

²⁴Megara God ano oraiwa gumbe, Keriso Iesu sira gwiruwat nuntan gumbe, oraiwa God namive ingui nunne.

²⁵God me Keriso Iesu taibe toyau munne. Me puyo maeba God danapiriwa yankwetan oya ganigani gumbe sira anotumat gumbe. Me toewamuniviwa God oraiwa meuma. Kuiyawa God me ano yaimoyai wakeigimtanwa gumbe, iyayapan gumbo ibnawa den munne, yaunewa mu kukaeba muma me mu mukut ayawa.

²⁶Me gare mame di God oraiwa meuma toewan muntan oya, God mekut oraiwa toewan muntan oya, Iesu gumbe anotumat aivi abnawa me God awanivi oraimina God namive ag toewan muntan oya.

²⁷Meve apanapan numawa ampa wakene? Me wait aug aine. Me ebu ambuwa gumbe? Me dividivi etewa ebuwawa gumbe? Onan di, me anotumat ebuwawa gumbe.

²⁸Nu ano numa mameib. Apan oraimina God namive apewa Gwangwan aug atanwa gumbe onan. Me anotumat gumbe.

²⁹Go God me God Ju igiyawa mukut oya go? Me Ju onan igiyawa gaibu God muma onan go? E, God me God Ju onan igiyawa mu gaibu.

³⁰God me desirom apewa, me meib. God mame kwapituitui igiyawa anotumat gumbe oraiwa ape God namive, sira me kwapituitui onan igiyawa gaibu anotumat gumbe oraiwa ape God namive.

³¹Meve nu anotumat gumbe Gwangwan natawa yusiwa onanape go? Onan di. Megara nu Gwangwan aug yudapta.