Romans 3:9-31

⁹Awasedo na ro seni? Jew embobo atima era emboro amimi embobo Jew ae atima era emboro awa derigedo ita? Anan awodo aera. Edo na matu ingoda yei karigeteno getewa, Nango Jew embomei de Jew ae embomei de awa ungoda wasiri bebegae teta esi inge ra awa ungo busedo ira.

¹⁰Edo ge jiusera awodo, “Embo ave awa God da diti da bibinango aera.

¹¹Edo embo berari awa God da emboro be awa gae jaredo era. Edo embo berari awa God tambadi eura ae edo era.

¹²Edo embo berari awa ungoda ari bebegae mi euri God seugedo demonda wosedo era. Edo ungo berari awa ari bebegae edo era.

¹³Edo ungoda be awa pirigari teta uje be inge awasedo ungoda be da awodo ge pasega sari embo tokaka be awa bugudo ira. Edo ge betari masa biae teta jingabu da jone inge awa ungoda avewa da ijegedo ira.

¹⁴Edo ungoda be awa isibari de dumo ge de tini gambari de mi beda edo ira.

¹⁵Edo ungo burigi memesi ititise edo deoro betedo era.

¹⁶Edo ungo yei rawainda mambutera awa ero embo dubo vevera de memesi de tambutera.

¹⁷Edo ungo jo jamo jamo ari tambari da emboro awa ungo gae jaredo era.

¹⁸Edo ungo God oju ari awa gae jaredo era.”

¹⁹Edo ingodena gosera ro berari agodari mi sira awa embo amemi agodari da jigido takibedo atera ainda sira. Edo agodari embobo awodo da yei ge siri busu berari da embo wasiri bebegae edo era embo awa ungo ungosuka beitigari ge sari katogo ae era. Edo agodari mi ari God mi embo berari awa kasadira.

²⁰Edo embo agodari mi ro sira awa edo amimi ari mana ungo God ga da umo jigari ewamei adera. Awarate agodari mi ari embo ungo wasiri bebegae ewora awa gadera.

²¹Awarate boroko God mi embo emboro rawodo da ungae da umo jigari ewamei aderi awa isaga etira. Embo da umo agodari ge da saboa edo ira amimi mana ari umo God ga da umo jigari ewamei da mana adira. Awarate agodari de God da binga sari embobo de awa emboro ainda ge sisera.

²²Embo mi Iesu Keriso awa tumonda adera emboro ainda embo awa God ga da umo jigari ewamei adera. Edo Jew embobo de embo Jew egeregae de awa God da diti da awa neinde kainde aera awasedo embo berari amemi Iesu Keriso tumonda adera awa God ga da umo jigari ewamei adera.

²³Edo embo berari awa wasiri bebegae isera awasedo God da atiti awa ungo doturisira.

²⁴Edo emboro eiedo da embo God ga da umo jigari ewamei adera. Edo God da soregari embo da yei itido ira awa kando ra. Edo embo mi mina itido kando awa mana badera ko Iesu Keriso mi mina awa matu ititisira awasedo. Itido wujegurisira.

²⁵Edo God mi Iesu betarase ititisira teta embo mi rorou itido era awodo awasedo embo Iesu tumonda adera awa God mi ungoda wasiri bebegae awa kotembedo doadira. Edo embo God ga da umo jigari ewamei adera ainda emboro awa isaga adi sedo God Iesu itiri bugudo bebetisira. Edo matu awa God embo da wasiri bebegae awa gido riroga itae ainda be awa umo Iesu itari bugudo betadira ainda iji awa simba ise gido.

²⁶Awarate boroko God Iesu Keriso itiri bugusira amimi betedo ingodenaso riroga burisira. Edo awodo ise amimi isaga ira God umo awa ewamei edo ira edo embo amemi Iesu tumonda adera embo awa God ga da umo jigari ewamei adera awa isaga ira.

²⁷Awasedo ingodena rora rori ainda derido jariga adera en? Awodo aera ko ingodena awa agodari da derido jariga mana adera ainda be awa ingodena agodari awa kera edo amimi mana God ga da umo jigari ewamei mana adera. Awarate ingodena Iesu Keriso tumonda adera awa ingodena God ga da umo jigari ewamei adera.

²⁸Edo ingodena mana ge eiawa doadera. Edo embo amemi agodari kera adira amimi mana God ga da umo jigari ewamei adira te embo amemi Iesu Keriso tumonda adira embo awa God ga da umo jigari ewamei da adira.

²⁹Edo God mo ingodena Jew embobo ungo ungosuka ungoda God ta mo ko embo Jew ae ainda daedo ungoda God ri? Gebe umone Jew embobo da God edo embo Jew ae ainde daedo ungoda God ra.

³⁰Edo God umo Jew embobo de embo Jew egeregae de daedo simba ari da awodo edo ira. Edo Jew embobo da teda embo da amemi Iesu Keriso tumonda adira embo awa God ga da umo jigari ewamei adira. Edo daedo embo Jew ae ainda teda embo da amemi Iesu Keriso tumonda adira embo awa God ga da umo jigari ewamei adira.

³¹Edo Iesu Keriso awodo tumonda ise ingodena agodari ge awa ujo ae erita? Awodo aera te ingode ero agodari awa goroba edo dederira.