Rom 3:9-31

⁹Asau ra dat in watungi una utna ri? Pepetlai, met a taro Juda met tokodos taun a taro gisen? Awu ut! A sa watung tari lena, a kum te Juda ma a taro gisen kai det elar kut. Dat rop dat kis utuntudu ina sakino petutna.

¹⁰Elar nami ra di sa tumus tari una Buk Tabu lena, “Katutaio i tokodos, katutaio ut!

¹¹Katutaio kai ra i mananos. Katutaio i sisio sur o God.

¹²Det rop det sa wan gisen gusun o God. Det rop ka det gas mo un tu utna. Katutaio tagun det i pam a wakakino, katutaio ut.”

¹³“A kum wandet i papos elar nama kum tung na minat, ma a wasiso anundet i elar nama singino na minat. Det ser watung a kum torotoro nama kum karmendet.” “A wasiso tagun a wandet, i elar nama kusmapak na sui ra i ser karot doko a taro.”

¹⁴“A kum wandet i bukus nama wasiso laulau ma i pitar a maut torom a taro.”

¹⁵“Det raras sur det in um doko a taro.

¹⁶Det kamar a kum utna, ma det ban laulau a taro una nundet a kum kisapi ra det wan iai.

¹⁷Ka det tasman a kisapi na malmal.”

¹⁸“Ka det ngara sur o God.”

¹⁹Dat tasmani lena, asau ra a warkurai i wasiso uni, ke wasiso una taro ra awu sur a taro Juda kut, i wasiso una taro Juda utkai, ra det kis utuntudu ina kum Warkurai. I mo ra, a taro rop tagun a rakrakon bual det in tur na warkurai umatan o God, ma kataio in ipul lar pas.

²⁰I mo ra, katutaio in tokodos umatan o God, uni i mur a kum Warkurai. A kum Warkurai i ser ese dat kut una nundat a kum sakino petutna.

²¹Ikut uniri, o God i sa pam tar a kisapi sur a taro det in tokodos umatano, ma awu sur uni det mur a kum Warkurai. A kisapi ri, a Buk na Warkurai ma a wasiso anun a kum poropet det sa wasiso puaso taru uni.

²²A kisapi ri tan o God, ma i lenri: A taro rop ra det nurnur kut un o Iesu Karisito, o God in watung det lena det tokodos. A taro Juda ma a taro gisen kai det elar kut.

²³Uni a taro rop det sa pam tar a sakino petutna, ma det kis bakbak gusun a minamar anun o God.

²⁴Ikut, una marmaris anun o God, o God i watung det lena det tokodos. I pami lenra elar nama etabor oros kut, uni o Karisito Iesu i kul langolango pas det.

²⁵O God i pitar ru o Iesu, sur in mat ma a gapino in unus ru a kum sakino petutna anun a taro rop ra det nurnur uni. Ma a gapino in urop ru a kankan anun o God gusun det. I pami lenri, sur in ese anun a tokodos na petutna. Uni numugu i madek ru i kut a sakino petutna anun a taro, ma ke warkurai det uni, kibino una balano molmol anunu torom det.

²⁶Ikut uniri, i pami lenri sur in ese anun a tokodos na petutna, sur i ut, i tokodos, ma i o naro ra i watung a taro lena, det tokodos ra det nurnur un o Iesu.

²⁷Pepetlai, tu kibino ra dat in warango pas dat? Awu! Pepetlai, dat in warango pas dat uni dat mur a kum Warkurai? Awu! Dat tokodos umatan o God uni dat nurnur kut un o Iesu.

²⁸Uni uniri, dat tasmani lena, o God i watung a taro lena, det tokodos umatano uni det nurnur kut un o Iesu, ma awu sur uni ra det mur a kum Warkurai.

²⁹Pepetlai, o God i a God anun a taro Juda kut? Pepetlai, i a God anun a taro gisen utkai? Lingmulus, i a God anun a taro gisen utkai.

³⁰Uni ara God kut, ma in watung a taro Juda lena, det tokodos umatano una nurnur. Lenkutkai ra torom a taro gisen, in watung det lena, det tokodos una nurnur utkai.

³¹Pepetlai, ra dat nurnur dat nuki lena a kum Warkurai i utna oros kut? Awu ut! Una nurnur dat ese i lena a kum Warkurai a dekdekin det ut.