RUUMIYA 3:9-31

⁹Dhali katinta si’da/? A/ki ana gun tana ’Kwani Yahuuda/ mo bola bol e ki ’bor mo ’taa? Yisa ki sule/ mo be. Haali/ aha/ hila yer ma ris ’kwani ’baar mo is ki gway mo imonṯal ’de/ mo, ’Kwani Yahuuda/ mo dhali ’Kwaniŋ Griḵi mo, ka ris ’kwani ’baar mo ’kokin mo ’ko’d e mom’bi’th gi miinthus mo be.

¹⁰Me’d gwo kun ’kwarkunu mo cikise/ mo ki: Jaŋ kamu/ jin mii’d ka ḵar/e yisa di’da. Ṯal ’de/ p̱iyi’d mo be.

¹¹Jaŋ kamu/ yisa di’da jin mishi gwo ’ban mo. Dhali jaŋ kamu/ yisa di’da jin ŋap̱ki’da Arumgimis mo.

¹²Aris uni ’baar mo dhereskin ki ’beles mo, aris ’kwani ’baar mo iiki iin thus mo. Jaŋ kamu/ yisa di’da jin mii miim ’boro’da, ṯal ’de/ p̱iyi’d mo be.

¹³’Kus buni wana e ki moŋ’kup̱aje jin ḵa’du ’twa/ mo. Uni tan ka le’d buni kun he’kkina he’k e mo. Ac̱in tasha/ c̱a’bki’d ’ko’da le’d buni mo be.

¹⁴Dhali ’twam buni ’tu’dkunu mo ki monyjeya je mo dhali ḵa/ ma du ki ḵa/ mo be.

¹⁵Sho’k buni dherkin mo mmowola bas mo be.

¹⁶E bway buni jin iikina uni mo tani raḵka’di ’baar mo dhali mii jin miinu miiny c̱iŋkina/ mo be.

¹⁷Dhali bway gi mo ma ḵu’th is mo tani molkina uni mo be.

¹⁸Moŋḵo/ isa kamu/ yisa di’d goma Arumgimis e bwambor jis/em buni yisa.

¹⁹Dhali ana misha shwane/ ki a’di yin jin ona gwoŋḵan jin c̱inu mo tani a’di onu gom uni gwansan kun ’ko ’ko’d e gwoŋḵan jin c̱inu mo. Wakan mo tani ka ris ’twa/ ’baar mo minu ’dap̱ ’twa/ mo gom gwo mo dhala ris ’kwani gi mony’ceshi ’baar mo mini dosh shoka ’cesh goma Arumgimis mo be.

²⁰Haali/ wathim paŋ kamu/ yisa di’da jin minu kar ki mo ma ḵar/e mo e jis/em piti mo goma ṯu’c gi gwoŋḵan jin c̱inu mo yisa haali/ gom gwoŋḵan jin c̱inu mo tani a’di nyiṯẖu/ miinthus mo be.

²¹Hili shwane/ tani mo ma ḵar/e ma Arumgimis a’di ṯorkunu eya tente/ ki dar gi gwoŋḵan mo be. Ba gwoŋḵan jin c̱inu mo dhali gwo gi imanc̱i gwo ma Arumgimis kadhamo/ mo jin ’kwarkunu si’da/ mo uni ta iman/o gwo gom a’di mo be.

²²A’di ta mo ma ḵar/e ma Arumgimis ki moŋgam gwo is eya Yesus Ḵrisṯẖos gom uni ’baar kun gam gwo is mo be. Haali/ toŋ kamu/ di’d ka ḵwa/um bwa yisa.

²³Haala ris ’kwani ’baar mo miiki miinthus mo dhali aṯẖki monyca ma Arumgimis mo be.

²⁴Uni dhukunu ki mo ma ḵar/e ka ’them piti me’d to jin c̱inu ki me’d mo ki mowan ’ba/ jin di’d eya Ḵrisṯẖos jin ta’da Yesus mo be.

²⁵A’di jin karkin ma Arumgimis ka the/m me’d ka bas piti mo mmobudha bu’th ki moŋgam gwo is mo be. Yan miikunu mo mmoṯor mo ma ḵar/e ma Arumgimis mo haali/ gom bwa ma ’kany’cesh piti mo mmotana a’di Arumgimis mo tani a’di peki miinthusa dhamo/ ’kup̱ mo be.

²⁶A’di miikunu mo mmoṯor e buŋ’kus shwane/ ki a’di ki is piti ta jaŋ ḵar/e mo dhali ki a’di karki a’di ki mo ma ḵar/e mo a’di jin gami gwo is eya Yesus mo be.

²⁷Dhali yan’ko’d mom bana jin dhukina ana ’ba/ ki ca mo tani a’di warki’d kata mo? A’di dhalkunu mo. Gom gwoŋḵan jana? Gom gwoŋḵan jin miinu mo ’taa? Yisa. Hili gom gwoŋḵan gi moŋgam gwo is mo be.

²⁸Haali/ ana ḵoca e mo mmo/o ki wathi/ karu ki mo ma ḵar/e ki moŋgam gwo is ki dar gi mii gi gwoŋḵan jin c̱inu mo.

²⁹Walla Arumgimis ta’da Arumgimis gi ’Kwani Yahuuda/ uni ’cenaa? A’di si’da/ diki ta Arumgimis gom ’kwani kun ’koki ta ’Kwani Yahuuda/ mo ’taa? Nye, a’di ta ji gi ’kwani kun ’koki ta ’Kwani Yahuuda/ si’da/ mo be

³⁰haali/ Arumgimis a’di ṯal ’de/ mo dhali a’di midi kar ki mo ma ḵar/e uni gun ’ciṯẖuwa munyjal yis mo gom moŋgam gwo is buni mo dhali uni gun ’konuki ’ciṯẖa/ munyjal yis mo gom moŋgam gwo is buni si’da/ mo.

³¹A/ki ana mina p̱uu gwoŋḵan jin c̱inu mo jin gamu is yansan mowa? Dhalku/ ki ṯosh kan. Nye, gwo jin baṯẖ a’di is mo tani ana ṯela gwoŋḵan jin c̱inu sho’k mo be.