lRom 3:9-31

⁹Yu! Enang tok, ngot kais kmenserpgam ani papat to he? Te nok pat he enda ti te, “Mor o Yuda ngota vle la mmok ko pum E Nut kalo keik kir kim o vrong rhek vor?” O-o, ho mi kut nop hak! Ko ko gnua keknen ngang nguk te, o kerkeknen ruk ngat lo vua sir hak ko pum E Nut kalo keik ngat her el rengmat kun mnam o Yuda tgus kar o vrong rhek tgus tok kat, he o kerkeknen ruk endruk ngata kapom mor tgus lserppak.

¹⁰Ii, o mia tgus ngat kaum ka vle tok arhe, kmikkiem gi enang ko ngat ittiegom E Nut karo rhek te, “Nong a mhel tang hak to ta vle la mmok ko pum E Nut kalo keik e. Ho nong tang hak.

¹¹Ii, va nong a mhel tang hak to ta mmok mang E Nut karo papat ruk o minar kat e, ekam ko o mia tgus ngam lua svil kam lol vgum En e.

¹²Ko o mia tgus ngat el ngaro yaik ngang E Nut he ngaro kerkeknen ruk ngam kaeharom mar nong ngaro kleim ngang ngar hak. Ii, nong a mhel tang to nam kaeharom o keknen ruk lyar. Ho nong tang hak.

¹³Ii, ko ngma rere orom ngaro rhek ruk o ngtir ko ngta vle enang a mhel ka mnes to ta ngti kun mnam a nnak. Ii, ngma gu piris ngang nglenar mekam mekam orom ngaro rhek kam krong ngaro vorngap he ka vle enang a vim ko nam kaelat a mhel kam klang orom ka ye to a serpgar.

¹⁴Ii, va ngam gia re orom o mia kat, mar kam yor ko ngma vrek kinkiin ngang ngar.

¹⁵Va ngam gia gri lerip gi.

¹⁶Ii, va o mia ngat kais kam vokom ka mnor mang ngar ko ngma kering nglenar enang tok, he nglenar ruk endri ngma lol o nganngannes vgum mar he ka vle kun mnam a ho kernonhommok hak vgum mar tok kat.

¹⁷Va ngat lua svil kmikkiem o keknen ruk kmel ngaro vurkul kmongeik kat e.

¹⁸Ii, o mia tgus ngma vokom E Nut va ngam lua totu pum kam vrua gorang En kat e.”

¹⁹Mare! To tete ta, ngota mnor he te, her mor ri o Yuda arhe ngot lol E Nut karo pos, he ekam tok, her mor ri mruo kat arhe, mor ruk o pos ri ngata kapom mor. Ii, o pos ri ngta kapom mor, kmel mor ma hor mang nguaro kerkeknen. He enang tok, mor tgus ngot lo kat kais kmel o praen orom a papat tang kam mrua klai mang ngor te, ngot lo eharom a kerkeknen tang e. Ii, E Nut karo pos ngta kapom o mia tgus tok, he nang E Nut kam le kmomngan kar o vrong mia tgus ruk mo mmie ormar kat.

²⁰Mare, mu vokom na, o pos ngaro reha nga pun msim ta vle ti arhe te, kmel o mia ma hor mang ngaro kerkeknen he kmon mar ormar. Nang nga pun tlua vle ngang o mia, mar kmegom kam sim kut kaikkiem mar, he nang o mia kam nho mkor E Nut kam mon mar la mmok ko pum kalo keik vgum ko ngam sarim mar tok e. Nove! He ekam tok, E Nut tho lo is hak kam mon a mhel tang la mmok ko pum kalo keik gi ekam ko nam kaegom kam sim kut kaikkiem karo pos kam sarim mar tok.

²¹Tennik, E Nut tlo polgom a ngaelaut tang ko yok, endo o mia nga kaikkiem he En kam mon mar la mmok ko pum kalo keik e. Vanangko tete ther polgom ka ngaelaut langto, endo karo pos va o propet ngata ktar kpavap mang orom ngaro rhek ruk o minar. Nangko a ngaelaut to enda nong E Nut karo pos kat e.

²²Nove, a ngaelaut to o mia nga kaikkiem he E Nut kam mon mar la mmok ko pum kalo keik, ta vle ti te, mor kmor mnam mor mang e Yesus Kristus he kmokpom kar arhe, endo tottek ekam E Nut. Ii, E Nut ten e Yesus ngang ngor, mor kmor mnam mor mang en he kmokpom kar, he nang E Nut kam mon mor la mmok ko pum kalo keik her gi vgum tok. Ii, E Nut nama mon o vrong mia tgus ruk ngat kor mnam mar mang e Yesus he kmokpom kar la mmok ko pum kalo keik. Nma mon mar tok, ekam ko E Nut nam lo kta vokom o mia te, mar o Yuda gi, va o vrong rhek gi. Nove! Ko o mia tgus ngat her gi maenang he.

²³Ko mor tgus ngot her kaum el nguaro yaik ngang E Nut petgim karo keknen ruk ngat ho mi kut mmok hak, nang kle kaeharom o kerkeknen. He ekam tok, E Nut nama vokom mor te, ngot lua mmok ko pum kalo keik kat, he lua vle la mmok enang ko En mruo ta mmok tok e.

²⁴Ii, o mia tgus ngat her gi maenang kat ko mor tgus ngot si kaum el nguaro yaik ngang E Nut, vanang E Nut ther kle va kring ya mang ngor tgus tete ge, he kaimim kim o rhek mang nguaro kerkeknen her vgum e Yesus to arhe, Endo E Nut Thim Orom Ka Msasaen ko tel ekmor he ksusulgim mor orom ka vok mruo, nang nong ekam ko ngot eha kam sim kut kaikkiem E Nut karo pos kam sarim mar e.

²⁵Ii, her E Nut arhe, endo tmur el e Yesus ma mmok ko engnang a ho, en kmel ekmor kam mur en ka vok mruo kam yor he ka gidiel kam ksuk mang ngor, yek tngam menglol mnam E Nut ka vrek. He tete, E Nut ka vrek ner kaisis mang ngor enangthe ngop kor mnam mor mang e Yesus ka yor to orom ka gidiel tok he kmokpom kar. Ii, E Nut tmur kaen e Yesus ngang ngor, kmenkim mor tok, kam khenam ma mmok ngang o mia te, karo keknen ngat ho mi kut sir hak. Ko tennik kngae kais mang tete, E Nut tho lo gia prik mang a ngael resik kim mor pum nguaro kerkeknen. Tgi kaennegiang o mia ngaro kerkeknen ruk ngata ktar eharom mar tesgun he lo tutut kmoripang ngang ngar kmen a kapnes ngang ngar pum mar e.

²⁶Vanangko tete mnam a venloot to enda, E Nut tmur el e Yesus ko pum mularo kerok tok kam ho mi kut khenam karo keknen ruk ngat ho mi kut sir hak ma mmok. Tikkiem tok, kmikkiem enang ko karo keknen ngta sir tok kat, he nang En kmimim kim o rhek ruk mang o mia ngaro kerkeknen kam sirim mar kam kle kmon mar la mmok ko pum kalo keik ekam ko ngat kor mnam mar mang e Yesus he kmokpom kar. He enang tok, her E Nut to arhe, Endo nam kaimim kim o rhek mang o mia, mar kam vle la mmok ko pum kalo keik vgum tok.

²⁷He ekam tok, ngot lo kais kam kta mrua hover mor mruo pum nguaro mur reha mruo kat e. Nop hak. Kman? Ko mor mruo ngot lo is hak kmeharom mor mruo, he nang E Nut kam mon mor la mmok ko pum kalo keik vgum ko ngom sim kut kaikkiem karo pos kam sarim mar e! Nop hak! Ngot lo is kam mruo hover mor mruo tok, ekam ko her gi E Nut tuk atgiang arhe to tkais kmaeharom mor, he nang En kam mon mor la mmok ko pum kalo keik, gi vgum ko ngot kor mnam mor mang e Yesus he kmokpom kar arhe.

²⁸Ii, ngot lo kais kam mrua hover mor enang tok, ekam ko her gi E Nut tuk to nam kaimim kim o rhek ruk mang o mia ngaro kerkeknen kam srim mar kam kle kmon mar la mmok ko pum kalo keik ko ngat kor mnam mar mang e Yesus he kmokpom kar, nang nong ko ngam sim kut kaikkiem E Nut karo pos kam sarim mar e. Va her a papat to a ngaenpaeir arhe kuaro papat ngama serppak mang.

²⁹Mum mrua havae kmuk mruo te, “E Nut ta vle gi ngang o Yuda tuk.” Vanang enangthe ta mien tok, to nngia orom o vrong rhek, ngat lo is kam totu pum E Nut ge? Mare, o vrong rhek ngat kais kat.

³⁰Ko E Nut to her gi En atgiang tuk to nera kaimim kim o rhek ruk mang o Yuda ngaro kerkeknen kam srim mar kam mon mar la mmok ko pum kalo keik ekam ko ngat kor mnam mar mang e Yesus he kmokpom kar. Va gi enang tok, her En to kat arhe ner kaimim kim o rhek ruk mang o vrong rhek ngaro kerkeknen tok kat kam srim mar kam mon mar la mmok ko pum kalo keik her gi vgum ko ngat kor mnam mang e Yesus he kmokpom kar gi enang tok kat. He enang tok, E Nut ka keknen to kmel o mia kam vle la mmok ko pum kalo keik, ka pun to agitgiang tuk kat te, o mia kmor mnam mar mang e Yesus he kmokpom kar.

³¹He ekam ko E Nut nma mon o mia la mmok ko pum kalo keik kmikkiem enang ko ngat kor mnam mar mang e Yesus he kmokpom kar, to nngia orom E Nut karo pos he? Nguaro papat ruk kmor mnam mor mang e Yesus he kmokpom kar ngat hos kim mar he ngruak orim mar i nop gi? Te ho mi kut nop hak. Parem ko, ko ngruak kle va kaenserpagam mar ha.