Romanos 3:9-29

⁹¿Acäsu judiucunacu mas mejor cantsic? Manam tsaypis tsaynötsu. Gamcunata niyangagnömi judiu o mana judiu carpis, runaga llapantsicpis jutsa ruragllam cantsic.

¹⁰Tsaymi Diospa Palabranchö nirgan: “Cay patsachöga manam ni jucllagllapis jutsannagtsu.

¹¹Manam ni jucllagllapis entendirnin, Dios Yayataga ashintsu.

¹²Llapanmi mana alli nänipa aywagnö jancat ogracäyashga. Tsaymi llapanpis jutsasapa mana välegman ticrayashga. Manam ni jucllagllapis alli ruragga cantsu.”

¹³“Tsaynö runacunapa palagarnincunawan parlayangancunaga imayca sepultüra quicharaycagnö melanaypag caycan. Llullacug galluncunawan imaypis mana allicunata parlarmi,” “imayca venenösa vïbora runata canirnin däñangannö runamajincunata däñar, llutan mana allicunata parlatsiyan.”

¹⁴“Tsaymi paycunapa shimincunachöga rabiapäcurnin tucuyläya maldiciuncunawan gayapäcuylla caycan.”

¹⁵“Tsaynö mana llaquipäcug cayaptinmi, runamajincunapa yawarninta jicharnin wañutsiyänanpagpis saslla gatin.

¹⁶Maytsaypa aywayanganchöpis mana allicunata rurarllam ushacatsiyan. Tsaynöllam runamajincunatapis mana llaquipar sufritsiyan.

¹⁷Paycunaga manam shumag alli päsacuytaga yachayantsu.”

¹⁸“Tsaymi llapan mana allita rurayanganpita Dios Yaya castigananpag cangantapis mantsacuyantsu.”

¹⁹Canangam rasumpa musyantsic Dios Yaya leynincunata cumpliyänanpag israelcunata entreganganta. Pero llapan runacuna quiquillancunapita mana cumpliyta puedirmi, Dios Yayapa puntanchöpis ni ima niyta puediyantsu. Tsaynö cayanganpitam Dios Yayaga llapan maytsaychö runacunatawan juzgar cuentata mañamäshun.

²⁰Tsaymi Dios Yayaga manam ni maygan runatapis, quiquillanpita leycunata cumplinganpitatsu jutsannagtanö ricanga. Mas bienmi tsay leycunaga llapantsicpis rasumpa jutsasapa cangantsicta musyatsimantsic.

²¹Pero cananga Dios Yayam musyatsimantsic, rasumpa criyicuynintsicwan mana jutsannag runatanö chasquimangantsicta. Tsaypagmi Moiséswan unay profëtacunapis gellgar niyargan.

²²Señor Jesucristoman rasumpa criyircur confiacuyaptinmi, llapan runacunatawan Israel o mana israelcunatapis Dios Yaya jutsannagtanö chasquinga.

²³Llapan runacunam tucuyläya mana alli jutsacunata rurarnin, Dios Yayapa cuyacuy salvaciun glorianpita caruchö caycäyan.

²⁴Dios Yayaga alläpa cuyacug cayninwanmi jutsasapa caycashgapis, Señor Jesucristo cruzchö wañurnin nogantsicraycu yawarninta jichanganpita jutsannagtanö chasquimashcantsic.

²⁵Quiquin Dios Yayam permïtirgan, jutsantsicpita perdonamänapag Señor Jesucristo nogantsicraycu cruzchö yawarninta jichar wañunanpag. Tsaynömi Señor Jesucristo rantintsic imayca juc sacrificiuta ruragnö sufrirgan, rasumpa firmi criyicuynintsicpita Dios Yaya nogantsicwan rabiashga caynin pärananpag. Dios Yaya mana juc jutsannag canganta musyanapagmi, alläpa alli pacienciayog cayninwan unaycag runacunatapis jutsancunapita castigargantsu.

²⁶Pero canangam musyatsimantsic, Dios Yayaga imaypis rasumpa cumplïdu mana jutsannag canganta. Payga imaycatapis rasumpacagllata rurarmi, pipis Señor Jesucristollaman firmi criyïcuptinga jutsannagta chasquinga.

²⁷¿Maytan tsay aläbacuynintsic? Jancatmi ushacashga. ¿Imanirtan jancat ushacashga? Tsaynö jancatga ushacashga leycuna mandacunganta mana cumplingantsicpitatsu ni imayca allicunata rurangantsicpitatsu. Sinöga Dios Yayam jutsannagtanö chasquimäshun Señor Jesucristoman rasumpa criyicungantsicpita.

²⁸Tsaymi cananga willacuntsic leycuna mandacunganta mana cumpliycashgapis, Señor Jesucristoman rasumpa firmi criyicungantsicllapita jutsannagtanö Dios Yaya chasquimänapag canganta.

²⁹¿Acäsu Dios Yayaga judiucunallapagcu? ¿Manacu maytsay munduchö runacunapagpis canman? ¡Clärum caycan, Dios Yayaga japallan maytsay munduchö runacunapa Diosnin cangan!