Rom 3:9-29

⁹Ehava? Ighita na komi tinoni Jiu ati toke vano tadia na komi tinoni kena boi Jiu? Teo! Vaghagna ku velea ghohi, na komi tinoni kena Jiu ma na komi tinoni kena boi Jiu, imarea gougovu kena mono saragna na managna na koakoa.

¹⁰Na komi Rioriso ke Tabu kena velea, “Teo ahai ke jino, e teo sikei tinoni!

¹¹Teo sikei tinoni ke pukuni thaothadoghagna a God, me teo sikei tinoni ke pukuni magnahaghinia keda adoa a God.

¹²Na komi tinoni gougovu kena taveti sania a God mena leghua na puhi ke dika. Teo sikei tinoni ke eia na komi fata ke toke. Pukuni teo!

¹³Na komi fata kena velea e dika puala, vaghagna na ghubagna na tinoni ke thehe kena boi kuvuria. Nidia na komi titiono ke vonungia na komi piapilau. Na komi haghoredia ke diadikalara na komi tinoni vaghagna na poli ke ghaghathati.

¹⁴Na livodia ke vonungia na komi hira ma na komi haghore bali vadiadikalara na komi tinoni.

¹⁵Imarea kena mono kaikaliti hahali bali vathehea na tinoni.

¹⁶Mi vei tagna kena vano, imarea kena diadikalara na komi fata mena vaparara na komi tinoni.

¹⁷Imarea kena boi adoa na puhi bali mono kori soleana duadia na komi tinoni.

¹⁸Imarea kena boi toatogha gi kedana mataghunia a God.”

¹⁹Ighita kati adoa ghohi na komi fata ke mono tadia na komi vetula, imarea kena risora horu eidia arahai kena hatia na komi vetula. Ma na komi vetula bali tateli aua itadia na komi tinoni gougovu kori maramagna, imarea kena nabadia a God keda vaparara. Me teo sikei tinoni ke tangomana na veleagna a God vaghagna iaani, “Inau ku boi dika.”

²⁰Teo ahai keda jino kori matagna a God kori vido ke leghura vamua na komi vetula. Iaani ke tutuni eigna kori vido kati adoa na komi vetula, ighita kati thaothadoghagna kati boi leghura mati koakoa.

²¹Ikeagaieni a God ke tatelia vanighita sina puhi tavogha bali mono jino kori matagna. Boi na leghuagna na komi vetula, keana na puhi a God ke taluhaghorea i hau tadia na komi Rioriso ke Tabu.

²²A God ke vajinoghita kori matagna kori vido kati vaututunia a Jisas Krais. Na komi tinoni gougovu kedana tanomana na mono jino kori matagna a God kori puhi iaani. Eigna imarea gougovu kena nanaba vamua kori matagna a God.

²³Na komi tinoni gougovu kena koakoa ma na puhidia ke haunia na puhigna a God ke haluhadi puala.

²⁴Keana a God ke dothovighita me velea ighita kati boi dika eigna a Jisas Krais ke vamamaluhaghita kori koakoa. Ma na vunegna iangeni imanea ke boi heghita na papara ke nabada.

²⁵A God ke vetula a Jisas eigna keda vagovua na koakoa me vagovua mua na dikatagna a God eigna na komi paluhada. Ighita kati mono jino kori matagna a God kori vido kati vaututuni a Jisas ke thehe eida ighita. I hau a God ke eia na hava ke jino kori vido ke boi saisami na dikatagna tadia na komi tinoni me boi vaparara eigna na paluhadia.

²⁶Mi ikeagaieni a God ke eia mua na hava ke jino kori vido ke velea na komi tinoni kena koakoa kena jino kori matagna kori vido kena vaututunia a Jisas.

²⁷Ma na hava ighita katida nia tautalunagho eigna na? Teo sa fata! Eigna ighita kati boi jino kori matagna a God eigna kati leghua na komi vetula, keana eigna kati vaututunia a Jisas Krais.

²⁸Hee, ighita kati jino eigna na vaututuni, boi eigna na leghuagna na komi vetula.

²⁹Ehava? A God nidia na komi tinoni Jiu vamua? Ba nidia na komi tinoni gougovu? Imanea a God nidia na komi tinoni gougovu.