Roamanz 3:9-29

⁹Now weh wi ku seh, dat wee weh da Jooz beta eena Gaad sait dan dehn peepl weh da noh Joo? No, wi no beta dan dehn, noh eevn wahn lee bit. Kaa Ah don shoa unu dat sin di rool oava evribadi, oava di Joo dehn ahn oava dehn wan weh da noh Joo.

¹⁰Da jos laik weh rait dong eena di Skripcha, “Nobadi noh rait eena Gaad sait, noh eevn wan persn.

¹¹Nobadi noh andastan. Nobadi noh di luk fi Gaad.

¹²Evribadi don ton dehn bak pahn Gaad. Non a dehn noh wot notn. Nobadi noh deh weh di du di rait ting, noh eevn wan.”

¹³“Dehn werdz da laik dehn bad smel weh di kohn fahn wahn oapm grayv. Aal weh di kom owta dehn mowt da loan lai fi fool op peepl.” “Dehn werdz da laik snayk paizn.”

¹⁴“Dehn mowt ful op a loan werdz fi put mowt pahn peepl.”

¹⁵“Dehn ron kwik-wan soh dat dehn ku damij peepl ahn kil dehn.

¹⁶Evriway weh dehn goh, dehn kaaz dischrokshan ahn mek peepl sofa.

¹⁷Dehn noh noa notn bowt pees ataal.”

¹⁸“Dehn neva did laan fi fyaa Gaad.”

¹⁹Soh den, wi noa dat evriting weh eena di Jooish Laa di taak tu dehn peepl weh sopoas tu liv akaadn tu da Laa deh, soh dat nobadi kyaahn seh dat dehn noh noa weh da di rait ting fi du. Ahn soh aal di peepl dehn eena di hoal werl wahn hafu ansa tu Gaad fi weh dehn du.

²⁰Soh eevn if wahn persn du weh di Laa seh fi du, dat noh wahn mek dehn rait eena Gaad sait. Insteda dat, di Laa da fi mek peepl kanchos dat dehn sin.

²¹Bot now Gaad don shoa wi di way how hihn don mek evriting rait bitween hihn ahn aal di peepl dehn eena di werl. Ahn dat da noh akaadn tu di Laa, eevn doa weh di Laa seh, ahn weh di prafit dehn mi seh di tel wi bowt da way deh.

²²Gaad mek evriting rait bitween ihself ahn peepl if dehn bileev eena Jeezas Krais. Gaad du dat fi aal di peepl dehn weh bileev eena Jeezas, fi di Jooz dehn ahn fi dehn peepl weh da noh Joo, kaa no difrens noh deh bitween dehn.

²³Evribadi don sin, ahn notn noh deh weh gud nof fi dehn du fi meja op tu Gaad gloari.

²⁴Bot Gaad shoa wi ih grays fi mek evriting rait bitween hihn ahn aal di peepl dehn. Hihn du dis wen Krais Jeezas bai aal di peepl dehn wid ih blod fi mek dehn free fahn sin.

²⁵Gaad sen Jeezas fi sakrifais ih laif eena fi wee plays, ahn wen Jeezas ded fi fi wee sin, dat da how Gaad fagiv peepl dehn sin wen dehn bileev eena hihn. Eena dis way Gaad shoa dat hihn du weh rait aal di taim. Op til now hihn mi-di put op wid peepl sin.

²⁶Hihn du dat fi shoa dat hihn raichos ahn dat hihn aalwayz du weh rait. Gaad wahn mek evriting rait bitween hihn ahn aala dehn wan weh bileev dat Jeezas don ded eena fi dehn plays.

²⁷Soh den, weh wi ku boas bowt? Notn ataal. Wi ku boas kaa wi obay di Laa? No, kaa da Gaad mek wi rait wid ihself chroo fayt.

²⁸Soh den, wi noa dat evriting rait bitween wee ahn Gaad kaa wee bileev. Da noh kaa wi du weh di Laa tel wi fi du.

²⁹Ahn Gaad noh dehdeh jos fi di Jooish peepl dehn. Ih noh dehdeh fi dehn wan weh da noh Joo tu? Yes, ih dehdeh fi di too a dehn, dehn wan weh da Joo, ahn dehn wan weh da noh Joo.