Orome 3:9-29

⁹Doko namwa Juu wambu dupwame menge dupwa isa nembowale karamano lao suu pilyamase? Doko daa. Koo dokome namwa Juupi Juu daa rara wakalepe kata mendakinya palyuo peteyama, doko rolo langyalono.

¹⁰Baepole dopa letamo. Akali mendaki mendepe rolae pii nange.

¹¹Akali soo gisingi mende kara nangeko. Dopako pyuo mendeme Anatu sipuli lao koto karengende daa.

¹²Akali peparaeme Anatu mata maipala kata koo dokonako peyami. Akali mendaki mendeme keyange pyuo kara nange. Ama mendaki mendemepe daako.

¹³Nakamana pendeko rakae pingi doko yuwale kambu lumbwasi dopale ingyuo silyamo. Kyambo lenge koo dupwa pee kambasinya ipwa lyuo epele lenge. Nakamana kambunya pii koo lenge dokome kau kyalende nenge katana mauli palenge dopale epelyamo.

¹⁴Nakamana piimi wambu kando lami dokona isare paleta epelyamo.

¹⁵Waiyako lao randa maiyuo wambu pyao kumakalana suu pilyaminyi.

¹⁶Wambu yango randa maiyuo kokwa soo papyuo karaminyi.

¹⁷Nakama mona kyuu lao see nange kata dokona ralo karaminyi.

¹⁸Anatu kamame wakasa lao mona nembo kara nalyaminyi.

¹⁹Pii Lowana pyasi palamo dupwa wambu Lowa soo kareyami dupwa keta palamo, doko silyamano. Dokome see nange larami ingya narasa lao Anatumi yuu mure lao peparae nyuo kote lara.

²⁰Akali mendeme Lowana iki minyapala Anatunya lenge kambu dokona rolae ingyuo kara nara. Baa Lowa singi dokome yulu koo pipulyamo lao baa range sera.

²¹Lowana piipi poropeta akalinya piipi dolapome apa pyuo Anatumi wambu nyuo rolenge kata dokona lao kareyamipya. Dakepa apa pyuo Anatumi wambu nyuo rolenge doko nolakayapya. Dokona Lowa kata doko wakale ingyasi silyamo.

²²Anatumi wambu Yesu Koraisa kapa ingingi lao suu pingi dokopa baapa rolo penge. Dopa pyuo yulu doko Kurisene wambu peparae keta pingi. Kurisene yango lapo dupwa mendepale ingyuo paa nalyamo.

²³Dokona lao isa wambu peparaeme koowako pipala Anatunya yanga paupau lenge doko yaki nyuo neta epeyami.

²⁴Dopa piyaminyipape Anatu mona keyange palyapala mee jingi dokome Yesu Koraisa keta baame nakama nyuo rolenge. Doko Koraisame kiiramo nyipyasa pilyamo.

²⁵Anatumi Yesu namwana koo dupwana lao kumala pena leyamo dokome wambu Yesu kapa ingingi lao suu pyarami dokona nakama koo dupwa nyuo kame sakamira ingilyamo. Anatumi dopa pyuo Yesu kumala penale leyamo dokome namwa baapa rolo parama kata doko panasi sipyamopa kandelyamano. Anatu ipyapala wambo dokopa wambunya koo dupwa mee kame sakaya.

²⁶Yuu mange dakepa banya yulu doko rolaeŋe lao akali keta panelyamo. Dokona lao Anatu baa rolae dokome wambu Yesu kapa ingingi lao suu pingi doko Yesu dokona rolae inginyi pyambungiŋi lao panelyamo.

²⁷Aki bange mendeme minyuo mupwa ingyalyamano lao suu pyaramape? Bange mendena dopa pirama ingya nara. Lowa minyilyamo dokona lao range lakandarape? Dokona daa. Renge angi doko Yesu mona maiyamo dokona range lakando karara ingilyamo.

²⁸Pii letamano dokona angi palamo doko, akali Yesu kapa ingingi lao suu pyara doko iki Anatupa rolae ingyara. Lowa minyara dokome rolae ingyarande daa.

²⁹Anatu baa Juu wambunya ikisi? Baa rara menge dupwana opetaena daase? Kinyi menge dupwa opetaena ingilyamo.