Romanos 12:1-13

¹Beṉe' migw, Diosen' ba cheyaše'laže'de' chio'. Da'nan' chṉeyoeda' le'e ḻe gon doxen cuinḻe ḻo na' Diosen' ṉa'a mbanḻe. Ḻe gonen do yic̱hj do laže'le. Na' ḻe gac beṉe' laždao' xilaže' ḻe can' chazlaže' gonxenchone'.

²Bi goncho ca cheson beṉe' bi zjanombia' Diosen'. San cheyaḻa' ṉabecho Diosen' gwše'e xbab c̱hechon' cont yebecho goncho dan' chazlažen'. Na' chaclaže' goncho da' güen, da' chebede' na' yogo' da' zej to ḻicha.

³Diosen' nži'ilaže'de' neda' na' ba gwseḻe' neda' cont chyix̱jue'eda' xtižen'. Da'nan' chnia' bi cheyaḻa' gonxen cuincho, san cheyaḻa' gacbe'echo Diosen' ba goclene' chio' cont chejnilaže'chone' na' noṉe' grasyw c̱hecho cont goncho bi da' goncho.

⁴Can' nac cuerp c̱hechon', zan cuen naquen na' gague toze žin da' cheson to to cuenen.

⁵Ḻecze can' naquen len chio', beṉe' zan naccho chejnilaže'cho Criston' na' yogo' chion' naccho txen len ḻe' na' len ḻježcho zaca'lebcho ca toze cuerp.

⁶Diosen' none' grasyw c̱hechon' gwde gwdele da' gon to tocho. Še ba none' c̱hecho c̱hix̱jue'echo bi da' gože' chio', nach cheyaḻa' c̱hix̱jue'echon na' šejḻe'cho gaclene' chio' gonchon.

⁷Na' še Diosen' ba none' c̱hecho gaclencho beṉe', cheyaḻa' gaclencho ḻegaque'. Na' še ba none' c̱hecho gwsed gwlo'echo beṉe', cheyaḻa' gwsed gwlo'echone'.

⁸Na' še Diosen' ba none' c̱hecho ṉeyoecho beṉe' cont yesone' da' güen, cheyaḻa' ṉeyoechone'. Na' še ba none' c̱hecho gwnežjwcho da' chyažje beṉe', cheyaḻa' gwnežjwchon do yic̱hj do laže'cho. Na' še ba none' c̱hecho gaccho beṉe' blao na' güia ṉa' ḻjež chio' chonxenchone', cheyaḻa' cue' yic̱hjcho güia ṉa'cho ḻegaque'. Na' še ba none' c̱hecho yeyaše'cho no beṉe' yaše', no beṉe' gole o no beṉe' güe', cheyaḻa' yebecho gaclenchone'.

⁹Cheyaḻa' gaque ḻjež beṉac̱hcho do yic̱hj do laže'cho, na' cheyaḻa' gue'echo da' malen' na' soaczcho goncho da' nac da' güen.

¹⁰Ca chaque biše' goljcho, ca'cze cheyaḻa' gaquecho note'teze beṉe' ḻježcho na' gonchone' beṉe' xench ca cuincho.

¹¹Bi gaccho beṉe' xagüed, san goncho da' non Diosen' chio' goncho do yic̱hj do laže'cho, ḻe chonxencho X̱ancho Jesucriston' len dan' chonchon'.

¹²Cheyaḻa' yebecho da' ṉezecho šjayzoacho len Diosen'. Cheyaḻa' gwyo gwc̱hejcho cate' chyi chzaca'cho. Na' ḻecz cheyaḻa' yoḻ güižcho Diosen' zan ṉi'a yogo' ža.

¹³Cheyaḻa' gaclencho beṉe' ḻježcho beṉe' chesejnilaže' Diosen' še bi da' cheseyažjde' na' gwlebchone' ližcho še zjanaque' beṉe' zito'.