Romalani 12:1-13

¹Jeruja ngato jurana kurukurubai, ngatata worajai, Godaia kalumiltjamiltjarinandru, jura palku jurani jinkiterinanto tepia ja kulikiria poto ngumu, nina Godali ngantjai; jenia jurani Godani wodatarana nganani tjurunto nganai.

²Ja wata nunkangupini mitalani jeribaka ngamanau, a-ai, karitjimalkaterianau tjuruja marraribanali, ngangau jura wontjananto, mina ngumulaia ja ngumu ngantjanaia ja manamirilaia Godaia jertapaterina nganai.

³Ngangau ngani morlalu jatai Godaia manjulandru, nina Nulia ngakangu matja jinkina, kulno ja kulnuni jurangundru, kulnujeli wata morla nunkangundru ngundrananto, windri mina talku nganai ngundrananto, worderu Godali nina ngurunguru ngankai, nau ngundrananto ngamalkaterila,

⁴Ngangau worderu ngaiani palku kulnuni buru marapu ngamalkai, ja tana buru pratjana wata mangini kulno ngamalkai.

⁵Jeruja ngaiani marapu Christungu palku kulno nganai ja kulnulu kulnulu pratjana palku buru pilki ja pilki nganai.

⁶Ja ngaiani manjuja poto pilkipilki ngamalkai, tanali ngaianingu matja jinkina:

⁷Kulnujeli talpadakanani kara, nau morlalu ngundranani jeribaka nganananto; kulnujeli ngamalkijiribanani kara, nau talku ngamalkijiribananto; kulnujeli ngujangujara jinkinani kara, nulu nina jinkinanto milingeru;

⁸Kulnujeli kurukurubanani kara, nulu kurukurubananto milingeru; kulnujeli poto jinkinani kara, nulu nina jinkinanto manju; kulnujeli kapara ngananani kara, nau manju nganananto; kulnujeli kalumiltjamiltjarinali jinkinani kara, nau murlali jinkinanto.

⁹Ngantjana jeljujelju panini ngananimai. Madlentjani kalakalarianimai, ngumula ngantjanimai.

¹⁰Ngatata mara ngantjamalianimai; kana ngurani pirna ngundranani woraworarijiribamalianimai.

¹¹Jiglerali ngankanani wata nguja ngananimai; jaolali wiriwirianau; miljaru talkuni mili ngamanau.

¹²Kalkanani mankianimai; ketjaketjanani wonki ngananimai; ngurali ngatjianimai.

¹³Kulikirila ngankingankijiribanau; tidnapalara manjumanju ngankanau;