Rom 8:4-37

⁴I pami sur a tokodos na petutna, ra a kum Warkurai det wasiso uni, in nanpat mulus una nundat a nilaun. Ka dat mur meleti mo a sakino nemnem ina pinindat, dat muri mukut a nemnem anun a Tokodos na Nion.

⁵Det ra det mur a sakino nemnem ina pinindet, a nuknukin det kai i kis kut un asau ra a sakino nemnem ina pinindet i nemi. Ikut, det ra det mur a nemnem anun a Tokodos na Nion, a nuknukin det i kis un asau ra a Nion i nemi.

⁶Osi ra a nuknukino i kis utuntudu ina sakino nemnem ina pinino, in mat. Ikut, osi ra a nuknukino i kis utuntudu ina Tokodos na Nion, in laun ma in taramo a malmal.

⁷Osi ra a nuknukino i kis utuntudu ina sakino nemnem ina pinino, der ebar nam o God. Uni osi ra a nuknukino i lenra, ke unatino pasi utuntudu ina kum Warkurai anun o God, ma ken pet lar pasi.

⁸Ma det ra det kis utuntudu ina sakino nemnem ina pinindet, ka det in ugasgas lar pas o God.

⁹Ikut mot, ka mot kis mo utuntudu ina sakino nemnem ina pinimot. Awu! Mot kis utuntudu ina Tokodos na Nion, uni a Nion o God i laun un mot. Ikut, ra taio, a Nion o Karisito ke laun uni, i awu sur anun o Karisito.

¹⁰Ra o Karisito i laun un mot, a pinimot in mat, kibino una sakino petutna, ikut a niomot in laun, uni mot tokodos umatano.

¹¹A Nion o God, ra i ukatutur pas o Iesu gusun a minat, i laun un mot. Una pinapam anun a Niono ra i laun un mot, i ra i ukatutur pas o Karisito gusun a minat, in pitar a nilaun una pinimot, ra i ser mat.

¹²I mo ra a kum tistising, dat a kum tene pinapam. Ikut awu sur dat a kum tene pinapam tagun a sakino nemnem ina pinindat, sur dat in muri, awu.

¹³Uni ra mot mur a sakino nemnem ina pinimot, mot in mat. Ikut, ra una dekdekin a Tokodos na Nion, mot in um doko ru a kum sakino petutna ra a pinimot i ser pami, mot in laun.

¹⁴Uni det ra a Nion o God i mugu det, det a kum nutnutun o God.

¹⁵Uni a Nion, ra mot los pasi, awu sur a ngas na nion ra i pam mot sur mot in tene ititula melet mo anun a nginara, awu. Mot los pas a Nion sur mot a kum nutnutun o God, ra i ras pas mot. Ma una dekdekin a Nion, dat ser kakabo torom o God lena, “Aba, Tita.”

¹⁶Ma a Tokodos na Nion i wasiso puaso una niondat lena dat a kum nutnutun o God.

¹⁷Ra dat a kum nutnutunu, dat in rakon a kum utna anun o God, tomo nam o Karisito. Ra dat in taramo a mamaut tomo nam o Karisito, numur dat in kis tomo nami una nun a minamar.

¹⁸A tasmani lena, a minamar ra o God in pitari tandat numur, in labo sakit taun a kum mamaut ra uniri dat taramo i.

¹⁹A kudulano ukukis rop i kis langlang nama labino nemnem sur a bung ra o God in upuaso ru a kum nutnutunu.

²⁰Uni a kum ukukis rop det kis una karabus na minat ma det utna oros kut. Awu sur a nemnem anun a kum ukukis, a nuknukin o God sur det in kis langlang sur a bung,

²¹ra in palos det gusun a karabus na mereseng na minat. Det in kis langolango una minamar tomo nama kum nutnutunu.

²²Dat tasmani lena, tuk uniri a kudulano ukukis det kis langlang nama tinangis, elar nama ino ra i leser nama ngunungut sur in usus.

²³Ma awu sur a kum ukukis kut, dat kai, ra o God i sa pitar tar a mugano etabor torom dat, a Tokodos na Nion, dat kai dat kis langlang nama tinangis nin ubalandat, nama labino nemnem sur a du bung ra o God in ras dat sur dat a kum nutnutunu, ma in ulangolango a pinindat.

²⁴O God i sa ulaun pas dat, ma uniri dat kis langlang nama nurnur sur a ngas na nilaun ra in pitari torom dat numur. Ra taio in kis langlang sur tu utna, ikut ra i sa los pasi, ken kis langlang melet mo suri. Osi melet mo in kis langlang sur tu utna ra i sa los pasi?

²⁵Ikut dat, dat kis langlang nama nurnur sur a utna ra ke wanpat utmakai. Dat kis langlang, ma a pinindat ke ngoro.

²⁶Lenkutkai ra, a Tokodos na Nion ut i ser warut dat, uni kalako dekdekin dat. Ka dat tasman asau ra dat in wararing suri, ikut a Tokodos na Nion ut i ser wararing torom o God sur dat. I wararing nama dekdek na tartaramo ra ka din palos lar pasi nama wasiso.

²⁷Ma o God i tama a balandat ma i tasman a nuknuk ina Tokodos na Nion, uni a Tokodos na Nion i wararing elar nama nemnem anun o God, sur a taro anunu.

²⁸Ra dat tasmani lena, a kum utna rop ra i wanpat, o God i papam nami, sur a wakakino in nanpat torom det, ra det nem o God, ma i sa kabo pas det elar nama nuknukino.

²⁹Numugu utmakai o God i sa tasman anun a taro. Ma numugu utmakai, i sa pilok pas det sur det in elar nam o Nutunu, sur i a mugano tan a susut na tistisino.

³⁰Ma det ra o God i sa pilok pas det, i kabo pas det kai. Ma det ra i sa kabo pas det, i watung det, det tokodos umatano. Ma det ra i watung det, det tokodos umatano, i pitari kai a minamar torom det.

³¹I mo ra, asau mo dat in watungi una kum utna ri? Ra o God i kis tomo nam dat, osi mo in ebar tomo nam dat? Katutaio.

³²O God ke maris bat o Nutunu, awu. I pitar tari kut sur in mat sur dat rop. Ra i pitar tar o Nutunu sur in mat sur dat, in pitar orosi utkai a kum wakak na utna rop torom dat.

³³Osi ra in takun a taro na pipilok anun o God? Katutaio in pet lar pasi, uni o God ut i sa watung tar dat lena dat tokodos umatano.

³⁴Osi ra in watungi lena, din pitar a warkurai na minabalu torom dat? Katutaio. Uni o Karisito Iesu i sa mat sur dat. Awu sur i kut ra, o God i sa ukatutur melet pasi kai gusun a minat, ma uniri kusapat mo i kis una papor sot na laman o God, ma i ser wararing sur dat.

³⁵Osi in ukis susuaro dat gusun a marmaris anun o Karisito? Pepetlai, a kum mamaut in ukis susuaro dat? A kum ngunungut? O ra din ukadik dat? O a munurak? O kalako malu indat? O tu utna na iniru? O ra din um doko dat namin totok na inaim?

³⁶Elar nami ra di sa tumus tari una Buk Tabu, “A kum bung rop a taro det nem na um doko met, uni met anum a taro. Met elar nama kum sipsip ra di waninar sur din um doko det.”

³⁷Awu, dat in pas pisopiso a kum utna ri, kibino un o Karisito ra i maris doko dat.