Rom 4:10-24

¹⁰Ana tekilia sur nene sanape? A Ntewa sape Epraam mesmesu e marana na pogwai? Naga pisa e pogos nap̃a Epraam pe p̃aviu pa rui, pona pisa e pogos nap̃a pe pe p̃aviu re poli wa? Visae teva si e kiena suniena, yoko tevisu nap̃a Ntewa pisape Epraam mesmesu e marana pogos nap̃a naga pe pe p̃aviu re poli wa.

¹¹Sanene, viawaena kiena Epraam e Ntewa, naga ga nene kila naga mesmesu e marana. E poglis nene naga pe p̃aviu re poli wa, ana siraunia, Ntewa mla p̃aviu pania sane kile tai nap̃a pisawal sape viawaena ga e Ntewa nane mrapa nap̃a yar imi mesmesu amio naga. Epraam naga pe yar p̃esa nap̃a sanene, ana yar moki apim sirau nap̃a pe ape p̃aviu re poli, ana amlelaga e Ntewa ana Ntewa pisu sane amesmesu e marana. La pe amolue re e lus kiena Epraam naapo poli, ana nagane apisu naga sane pe kala apua marua m̃ena tai,

¹²maran taaga sa ke nap̃a naga pe apua kan la nap̃a ape p̃aviu. Ana nanua sumo, ita le Yu lala tesitom tesape yar nap̃a pe p̃aviu sane yermarua Epraam, lelaga kemua nap̃a naga ke narui naga molue kome kiena lusa. Ana nagane, sitomena tai m̃alivi nap̃a pisape yaru nap̃a kilia visa visave Epraam naga pe kana apua marua kemua lelaga, nanene pe yaru nap̃a mlelaga e Ntewa sa ke nap̃a Epraam mlelaga ea, pogos nap̃a pe pe p̃aviu re poli wa.

¹³Nakonua konua rui Ntewa pisaar pa Epraam sape yoko kiena navisa ruruena lala amolue akome Epraam amio kiena lusia avava vanua va va yeririna make ga na yomarava. Ana komin ya ne Ntewa kekaran sape kila kiena navisaarena nene va Epraam? Pe vanon re ga nap̃a Epraam mlogear ruru kiena navisaluaena poli, komin pogos nap̃a Ntewa kila navisaarena nene, pe navisaluaena re poli wa, pogos kiena ne Ntewa na laen navisaluaena va Mosis sike koperina wa. Sanene, tekilia tevisave naviawaena kiena Epraam ga kila naga mesmesu e marana Ntewa, nane Ntewa kekaran nap̃a la navisaarena wo nene vania.

¹⁴Visae navisaarena nene pe kiena yar ga la nap̃a asm̃al amlogear ke navisaluaena, yoko kila sane yar nap̃a mlelaga, mlelaga korena ga ne, a kila sane navisaarena kiena ne Ntewa pe sum̃al re si poli.

¹⁵Suri tap̃ena ke sina ga nini, nap̃a kila meraravan pan ita sape navisaarena wo kiena ne Ntewa lala tap̃atete am̃alivi e p̃elaga nalogearen navisaluaena. Naga nene komin pogos nap̃a navisaluaena sike na, ana p̃elaga na kilaroen navisaluaena monar m̃alivi, ana siraunia monar kana nakoaena nena, komin nap̃a pe yaru tai tokon re kilaroen navisaluaena pogos tai poli.

¹⁶Ve sanene, navisaluaena tap̃atete kilia iila ita vena tekila ruru kieta napiowaena e marana Ntewa, ana Ntewa pe lemam manene laa pan ita, ana naga ga kila. Naga pisu nap̃a top̃asine ga naga, tevisu ga naga, ana naga kila tetol kiena navisaarena wo lala. Nanene na pe le Yu re ga la nap̃a navisaluaena pitomi p̃esan pan la poli, ana yeririna tap̃ena m̃ena la asikola amio la. Yer pe lala, ana visae akus p̃elaga na lelagaena e Ntewa maran ve taaga sa ke nap̃a Epraam mlelaga ea, naga sane la m̃ena amolue e kiena lusa. A ita make m̃ena ga e p̃egas nen nalelagaena teliv piora e yomarava, tepisu sane naga pe pupia kata apua.

¹⁷A nanene mesmesun ga nap̃a Ntewa pisaar pa Epraam nanua rui, nap̃a pisa pania sape “In na nepisirlua ko, ko ope purp̃es nen lus nen yeririna lala na purvanua moki.” Pogos nap̃a Ntewa pisaar sanene pa Epraam, Epraam pe sinen kurkur re poli, ana p̃uarar ruruia, komin nap̃a naga kilia sape Ntewa nena nap̃a naga pisa visena nene pania, naga pe Ntewa nap̃a kilia kila ya nap̃a mare imi mali, kilia kila sur nap̃a pe su re poli wa vim m̃alivi.

¹⁸Pe lelaga, Ntewa pisa sur ta pania m̃arera pap̃isi nap̃a naga lelaga ea, komin nap̃a pisaar pania, sape “Kiom̃a lus lala yoko aim ave moki na ave moki vap̃isi e yomarava nini.” Ana pogos nap̃a Epraam mloge, mlelaga ea sape monar ve sa ga nene narui.

¹⁹E pogos nene, naga kilia sape naga amio wona Sera, kiela mrae lalua lavis vito tano narui, nap̃a kiena kasa lavis tol ponotia ve taaga 100, a wona pe p̃arli re sisi poli wa, ana kiena naviawaena pe mlor re nenaga.

²⁰Naga pe sitom re nena suri ta poli, ana kiena sitomena sike ga e ya nap̃a Ntewa pisaaria. Kiena naviawaena sum̃a pimi m̃arera laa narui, a silaga sum̃a mieluar ke Ntewa a pisa lue ga potena keviu pania vanon ya nap̃a yoko kila.

²¹Naga pe sitomli re pogos ta poli sape Ntewa naga pe torokin re nap̃a yum̃ae taveve ruru kiena navisaarena poli,

²²a kiena p̃elaga na viawaena nene narui kila Visena Wa pisayu si naga, sape Epraam p̃asine ga Ntewa, ana Ntewa pisawal sape naga mesmes ruru e marana.

²³Ana visena nene pisayu ga Epraam naga taaga,

²⁴ana popon tela sane visena tai nap̃a pisayu ita make ga, komin ita m̃ena ga temlelaga e Ntewa tesape yoko naga kila ita teim temesmesu e marana sa nap̃a naga kila pa Epraam. Temlelaga sane naga ke narui nap̃a mligan Yesu pitomin vena tol marena vanon kieta mlamulen viowa lala, a temlelaga tesape Ntewa p̃ere lua ke sina ga Yesu petan marena vena kila merarava ruru van ita sa nap̃a tekila si mara wo temio naga rui.