Roma 4:10-24

¹⁰Manetualain henggenee nala Abraham leo naak naa, ndia faik bee? Neu ana sunat basa ena, do neu ana bei ta sunat? Ndondoon ndia, ta neu ana sunat basa ena, tehuu neu ana bei ta sunat.

¹¹Tebe! Neu Abraham bei ta sunat, Manetualain henggenee nalan ena, dadi neu hatahori dale ndoos fo mana malole no Manetualain. Doo-doo dei de ana sunat fo dadi tanda nae, ndia dadi neu hatahori fo mana namahere neu Manetualain. No dalak naa, Abraham nasosoi dalak soa-neu basa hatahorir fo mana ramahere reu Manetualain. Manetualain simbok basa hatahorir fo mana ramahere reu Ndia fo ara malole roon, leo mae ara sunat, do taa.

¹²Abraham oo nasosoi dalak fee ai hatahori Yahudir fo mana neni sunat boe. Ta huuai sunat, tehuu no ai mamahere Karistus, sama leo Abraham namahere Manetualain, neu ana bei ta sunat.

¹³Manetualain ndara fangga hehelu-bartaak no Abraham ma tititi-nonosin nae, doo-doo te dae-bafok ia katematuan dadi neu sira pusakan. Manetualain helu-bartaa talo naa, nahuu Abraham namahere neun. De Manetualain henggenee nalan nae, hatahori dale ndoos fo mana malole no Ndia. Tehuu Manetualain ta helu-bartaa talo naa, nahuu Abraham tao tungga Ndia Hohoro-lalanen nara.

¹⁴Mete ma hatahori fo mana tao tungga kada Manetualain Hohoro-lalanen bisa simbo nala pusaka fo Manetualain helu-bartaak naa, sosoa-ndandaan nae, nemeheherek neu Manetualain naa, hie-hie a mesan. Ma Manetualain hehelu-bartaan naa oo sosoan ta boe.

¹⁵Nai bee fo hambu Manetualain Hohoro-lalanen, na, nai naa oo hatahorir lena-langga Hohoro-lalanek naa boe. Mete ma hatahori ralena-langga Ndia Hohoro-lalanen, na, Manetualain namanasa, de Ana huku-doki sara. Mete ma ta hambu Manetualain Hohoro-lalanen, na, ta hambu hatahori fo mana lena-langga Hohoro-lalanek naa.

¹⁶Huu naa de ita muste tamahere neu Ndia. Naa, nenenin lena heni basa-basan. Manetualain hii natudu Ndia dale susuen no babalan taa soa-neu hatahori fo mana namahere neu Ndia. Mete ma ita tamahere neun sama leo Abraham, na, ita simbo tala hata fo Ana helu-bartaak, leo mae ita hatahori Yahudir fo mana ramahere ma bubuluk Ndia Hohoro-lalanen, do ta Yahudir. Dadi ita basa ngga mana mamaherek naa, sama leo Abraham tititi-nonosin.

¹⁷Nai Manetualain Susura Malalaon dale, Ana helu-bartaa neu Abraham ena nae, “Au tao o dadi muu hatahori nusak noꞌuk ka bei-baꞌin.” Abraham namahere Manetualain. Doo-doo boe ma Manetualain tao natetu Ndia hehelu-bartaan naa. Ana ndia tao nasoda falik hatahori mates. No kada Ana kokolak, de hata fo ta hambu sana, ana dadi memak leo.

¹⁸Abraham namahere neu Manetualain, ma ana nahanin taa-taa, leo mae ndia mesa kana bei ta naena anak. Huu naa de Manetualain taon dadi neu “hatahori nusak noꞌuk ka bei-baꞌin.” Naa, sama leo neni surak nai Susura Malalaok nae, “Tititi-nonosik noꞌuk ka neu ko dadi numa o mai.”

¹⁹Abraham nemeheheren tean seli neu Manetualain, leo mae ana bubuluk ndia aon lasi nggoꞌo bauk ena, teun nara natun esa ena. Ma Sara ana manan nakatema ena, ma ndia oo lasi nggoꞌo-nggoꞌok ena boe.

²⁰Tehuu Abraham nemeheheren ta natanggenggo do, duꞌa nae, Manetualain ta bisa tao natetu Ndia hehelu-bartaan. Nemeheheren neu Manetualain boe natea neu ana nakadedemak Manetualain naden.

²¹Abraham namahere tebe-tebe nae, hata fo Manetualain helu-bartaa nalan ena, Ana bisa tao natetun.

²²Huu naa de Manetualain henggenee nala Abraham dadi neu hatahori dale ndoos fo mana malole no Ndia.

²³Tehuu Manetualain Susura Malalaon nae, Manetualain ta reke leo naak soa-neu Abraham mesa kana,

²⁴tehuu soa-neu ita boe! Mete ma ita tamahere neun, na, Ana oo henggenee nala ita dadi teu hatahori dale ndoos fo mana malole to Ndia boe. Manetualain naa, ndia tao nasoda falik ita Lamatuan Yesus numa mamaten mai.