Rom 4:10-24

¹⁰Kindrei aloh iy mwasin ta madan udu mwena ta kandriyen ta asan ku-i taha deh, bwe em, kandriyen ta asan ku-i taha asahan mwena? Bwe, Kindrei aloh iy ndramak mwasin ta madan mwena, ano kandriyen doh udu hamon.

¹¹Ano badeh, barasan ku-in i nyara kalem ta leheya buku Kindrei ndraloh iy ndramak mwasin ta madan. Tasah, iy atehei budon tan handru bwena, ya kandriyen ta asan ku-i taha badeh, udu hamon labai. Ya eme Abraham asahan tama iri lau mari iri an hamon ta san ta budon handru. Handru, iri basan ku-i iri ba-au bwe, arile Kindrei aloh iri lau mwasin mara-ei ta madan.

¹²Iy ale badeh, tama iri lau rayah asan ku-i iri. Iri basani ku-i iri laleyah bwe, iri ale anyolom san tubu iri Abraham edek aliy. Ya iri ka le buku iy katehei budon tiri handru ki ta Kindrei i buku none mene na len basani iy bwe.

¹³Kindrei tandrakan Abraham ta kon munyak mari kameh i tan, ma i ta lundriyen oro. Arile Kindrei tandrakan Abraham oro badeh, bala san ta oro a-en hamon ta batanau malen, bwe. Iy tandrakan oro kameh akohok munyak mari, tasah Abraham atehei budon tan mara-ei in tan, eme ma Kindrei aloh iy ndramak mwasin mara-ei ta madan.

¹⁴Ya, buku oro are lau a-en hamon ta batanau malen badeh, oro le asahan lundriyen, kandriyen ta atehei budon handru kameh lakou laleyah nyamun bwe, ma tandrakan kameh ari moson bwe.

¹⁵Tasah, taha tanan, lahou ta batanau malen badeh, ta leheya losen, ma ta adeu maha-an i la-u iri mwan ma badih amekes kandriyen ndra-in. Batanau malen winiya baseben taha bakohok tandrakan ta Kindrei bwe. Ya, buku batanau malen aliy bwe eh, iri kandriyen ndra-in ale winiyan basahan ta mada sahou bwe le.

¹⁶Eme ya, Kindrei kameh edeu lakou mene iy tandrakan i ta Abraham kameh i tare lundriyen oro le atehei budon toro handru in tan. Ya eme Kindrei kameh tikisi oro ma edeu lakou tan mari i toro laleyah le. Bala toro le are baha batanau malen, ma hawe bala toro are atehei budon toro handru i buku Abraham le, bwe. I toro ma lubuk. Tasah, iy badeh, tama taha mari.

¹⁷I buku ndratorowenei mene, “Jo badeh, mesekei ou kameh a tama iri kon munyak mari.” Iy badeh, i tama taha mari udu mada Kindrei anyolom, tasah iy atehei budon tan handru in ta Kindrei. Iy badeh, Kindrei ta amak lau amak ame loken ja, ma iy ale Kindrei ta tiye sahou le badeh, lakou asahan.

¹⁸Abraham jaha tan solo-an labai ma nadun bwe, arile iy atondrok Kindrei le gwek, ma iy atehei budon handru, ta Kindrei kameh atehei iy i tama iri lau solo-an. I san doh le badeh, iy asahan tama lau solo-an badu kon munyak. I le buku iy mene ndrasehek tan i buku doh, “Lundriyem oro kameh nyaran bwe.”

¹⁹Handru labai, Abraham badeh, ndra bada ndramak, ma jaha tan ndrasahan rinek (100), ma iy abudon udun Sara badan ndrakoreh, ma badan winiyan ta ato-ou nah bwe. Arile, iy baliliy ta budon tan handru i ta Kindrei bwe.

²⁰Ma budon tan badeh, bala lundra bwe ta tandrakan ta Kindrei bwe. Arile, budon tan handru badeh, irih le gwek ma iy atudun Kindrei.

²¹Ma mesekei iy i tanan handru ta Kindrei badeh, boto-on ta amekes tandrakan tan doh kameh asahan ili handru.

²²Eme ta katin doh, iy abudon ta budon handru ta Abraham, “eme ma Kindrei aloh iy ndramak mwasin ta madan.”

²³Sahou nane, “Kindrei aloh iy ndramak mwasin ta madan” badeh, ta Abraham le, bwe.

²⁴Sahou doh badeh, winiyan eme tataha lau ale. Tasah, taha atehei budon tataha mara-ei ta Kindrei le mete-ei Laban tataha Jises eme loken ta imek. Eme ta katin doh, iy winiyan aloh taha lau mwasin mara-ei ta madan.