Rom 3:1-8

¹Le tina au i awete pang nen, ngan o ke be kator a kayei ne, “Kumata be nen nga, ngan yelei yidi Yuda? Soo so be ole ilonidi le tallos di tooltool kapala ye Maro matana i? Inbe dada ke koranga tiniidi i, in ilonidi belei?”

²Ona, dada dook mata alunu la Maro iyei pang di Yuda a ilon di ye nga. Kulkulunu yege ngan ikap betanga ki yo ya taunu iwetewete, ngan pang di.

³Moolmool, di tina ngan kapala tiyei so yo tiwete be tiyei nga, le titoo koodi tiap. Ngan kumata be titoo betanga yo tipamede pang Maro, ngan tiap nga, ngan ole yelei, Maro lon kalli so yo ipamede betanga ye be iyei nga, too?

⁴Tiap yege! Di tooltool le imot nga tiwete ngan tillung, bong Maro in iwete nga, ngan ole itoo betanga ki le lo itara kanono moolmool. Le dawa ben tina yo Rau ke Maro iwete nga, “Maro, ong in kutoo dada dook mata noonoonoo nga leu, inbe kupapos di tooltool ye noonoo kidi. Ngan nen le di tooltool ole tikamata mallanga nen, betanga yo kuwete pang di nga, ngan moolmool le imot. Ngan kumata le tiwete be kullung pang di nga, ngan ole kullos di ye lal yo ke karatanga betanga i.”

⁵Au i lok galanga nen, di tooltool kapala yo lodi kaua urata ye dada ke tana i mata nga, ngan ole tiwete gogodi a tiwete nen, “Kumata le be dada dook tiap ke noonoo yo amyei, ngan be ipaposo dada dook mata noonoonoo ke Maro le pombe mallangana nga, ngan ole tawete belei? Nga ole tawete be Maro in o iyei dada dook tiap la le katen malmal a iyemenai am ye noonoo kiam tina nga, too?”

⁶Tiap yege! Maro in tool noonoonoo, le ikarata betanga kiidi Yuda ye dada dook mata yo tarantatu in leu. Ngan nen le ya in ke be ikarata betanga kidi tooltool ke tana i a iyemenai di ye dada dook tiap kidi yo tiyei nga.

⁷Le tina Maro iwete be ole iyemenai idi Yuda ye noonoo kiidi nga, ngan ole tool sa lon wetewete nen, “Kumata le be allung nga, ngan ole ipatnaia Maro nen, betanga yo iwete ngan moolmool le imot. Le dada dook tiap yo ayei nen nga, ngan ke be iyei di tooltool le tikamata nen, Maro in itoo betanga ki moolmool, ngan la ole tiyitmaka ene le ilo ete ye nga. Ngan kumata be nen nga, ngan nga yelei a iyemenai au ben au i tool ke yeingi noonoo nga?”

⁸Bong matamim too dook ye betanga tani yo lon wetewete ye i. Ngan dawa ben ole tawete ne, “Idi nga ole tayei dada dook tiap ke noonoo, a be nen ngan dada dook mata yo Maro iyeii in ole pombe mallangana.” Ngan di tooltool kapala tisopo koodi pau a tiwete be au i betanga yo awetewete nga nen. Ona tiap, au i awete nen tiap, bong awete nen, di tooltool yo tiwetewete ye dada nen nga, ngan dook mata be Maro iyemenai di ye urata dook tiap kidi tina ngan kootoonoo.