Romanos 3:1-8

¹“Morara ahtao otyme kure juteume exiry? Otyme kure roropa aipotapihpyry sahkary?” ãko matose otarãme.

²Kure ro nase juteume exiry. Ynara exiryke, tõmihpyry tokarose Ritonõpo a juteu tomo a.

³Toitoine juteu tõ onenetupuhpyra toehse repe. Yrome mokaro sã pyra Ritonõpo mana. Zae exikehpyra mana ipunaka.

⁴Ritonõpo zae exikehpyra mana. Imehnõ ajohpe ahtao ro emero porehme zae ro mana. Ynara tymerose Ritonõpo omiryme sero poko, “Zae oexiry poko utuarõtanohpõko mase õtururuhtao. Kure rokẽ oehtoh poko zuaro kamexipõko mase imehnomo a ohxiroryhtao,” me tymerose pake.

⁵Otarãme kyyrypyrykõ poko kuahtao xine ro Ritonõpo kure ehtoh enetupuhnõko imehnõ mana. Otara ãko sytatou morara ahtao? Morara ahtao, “Ritonõpo zae pyra mana kuãnopyrykohtao,” ãko imepỹ mã otarãme repe. Morara katopõpyry totase ya imehnomo a repe.

⁶Azahkuru morara kary ipunaka. Ritonõpo zae pyra ahtao, seropõkõ apiakasaromepyra exiry.

⁷“Yrome yyrypyry poko jahtao imehnõ tuarõtanohpõko ase emero motye kuhse Ritonõpo zae ehtoh poko. Morara ahtao oty katohme juãnohnõko nae yyrypyry poko?

⁸Naeroro kyyrypyrykõ poko sehtone Ritonõpo rokẽ kure exiry enetohme imehnomo a,” ãko otarãme repe. “Ỹ, morara ãko Pauru,” ãko imehnõ mã repe, ykerekeremananomo, yhxirotohme repe. Mokaro wãnohnõko Ritonõpo mana, zae rokene, toto rypyry epehpyryme.