Rom 16:8-24

⁸Wem teingi leiki le numu teingi leiki Ampliatus piti lingiepe wai pite Ma Ili.

⁹Ki kirpei wem teingi le Urbanus, le piti lirouku mepi mesio towa lite Krais. Le wem teingi leiki le Stakis, le numi teingi leiki.

¹⁰Wem teingi le Apelis, le kosai lotei piti lulpowo Krais punkom le ku mulpowo. Ki kirpei wem teingi le mete piti pratei winem lite Aristobulus.

¹¹Ki kirpei wem teingi le Herodion, le lireiki wepi pite Juda. Le wem teingi le ilim winkem wuso pulpowo Krais pepe le pe pratei winem lite Narsisus.

¹²Ki kirpei wem teingi leiki le Trifina re Trifosa wuso roum mesio towa lite Ma Ili lepe. Le wem teingi leiki le numu teingi leiki Persis, le lirkilau lesio towa lite Ma Ili.

¹³Ki kaltei wem teingi le Rufus, le lesio towa lite Ma Ili loporotei. Le wem teingi le nimou pele wuso wem oli oli naileleiki wata pirpolo ki ninge lene lepe.

¹⁴Wem teingi leiki le Asinkritus, Flegon, Hermes, Patrobas re Hermas, le ilim winkem yeflipi wuso pulpowo Krais le pe pepi pratei pepe.

¹⁵Wem teingi le Filologus re Julia, le Nereus lire oru pele. Wem teingi le Olimpas re mete yeflipi pite Ma Ili pele wuso piripe pepi pratei pepe.

¹⁶Ise ma yeite nemple le ise yeipi nemple esi. Nimoure mete yeflipi wuso pulpowo Krais pepe, pe pirpei wem teingi lelpe le ise.

¹⁷Ilim winkem peiki, ki kirkilau kirpeise piti ise ma kotopa isotei yiripe mete wuso karipe mete paptei piti ma pingowo tisi nele, le pe piripe enke pite mete olpe piti ma pulpowo Ma Ili kolo olo. Pe mete piti pinpim il wuso ku meitaleise miripe pepe, le ise ma ye malfem yiripe kolo olo.

¹⁸Wusoli mete fei polpepei pepe, pe pesio towa lite Krais, le Ili louku lepe, pe pesio towa lele kolo olo. Wolo pe onposi piti ma pafo fangelem pelpe potei. Pe ma pempetei pirpei il teingipe le il tipe pelpe ma weisipe enke pite mete wuso pire wouye piti ma pulsipe pingowo tisi oli.

¹⁹Mete yeflipiye pingitepe il wuso pirpei pireise piti ise telpalo yingiepe il pite Ma Ili, le fei pepei, ki onom teingine kireise. Ki onposi piti ise ma enke ulepe yasiepe menmen piti teingipe pepe, le ise ma yire punkom piti tounga pesipe il olpe.

²⁰Le Ma Ili wuso wauku enke malye pepe, wem lire malfemye piti le ma weisipe singe pite Towa le ise ma yile singe. Apa Jisas miso onom maneise.

²¹Timoti, le metine piti lireiki wepi mesio towa lite Ma Ili, le lirpei wem teingi lele le ise. Le Lusius, Jeson re Sosipater, pe pireiki mepi pite Juda, pe re pirpei wem teingi lelpe le ise.

²²Ki Tertius, ki kapi il pite Pol le ki kaptowo lope paitei youti nepei. Ki kiri nange lite Ili, ki kirpei wem teingi le ise.

²³Gaius lirpei wem teinge lele le ise. Ki kratei winem lele le nimoure mete piti pulpowo Ma Ili lepe, pe pau winem lele piti ku mifei rautuwo Ma Ili. Erastus, le metine piti luntoluwo mole ufau lite moli lipi piti puntoluwo uf ili lepei, le lire line winke louku Kwartus, te rounge taltei wem teingi lelnge le ise.

²⁴Apa Jisas Krais miso onom maneise ise yeflipiye. Punkomtei.