ROMANOS 16:8-24

⁸Ndlyazen ne, gunii gu' Diox loo Ampl, co' nac amiu daa, co' anze'f nque' lezon ñèen loo cón che'n Tad Crist.

⁹Gunii gu' Diox loo Urban co' ndlyath no nu' loo zin' co' nxo'f zin' nu' loo Crist Jesús. Gunii gu' Diox loo Estac co' nque' lezon ñèen, ne.

¹⁰Gunii gu' Diox loo Apel. Apel nde teele' ndlu' thìb mod no tedib mod xal, lìcque', ndxela's Apel loo Crist no loo cón che'n Crist. No ndlyazen gunii gu' Diox loo rye mèn guliz Aristob.

¹¹Gunii gu' Diox loo Herodión co' nac mèn gulàaz daa. Gunii gu' Diox loo mèn guliz Narcis co' ndxela'sque' loo Tad Crist, ne.

¹²Gunii gu' Diox loo Trifen no loo Trifos tac ryop guna'a thidteneque' nxo'f zin' zin' cón che'n Tad Crist. Gunii gu' Diox loo Persid, co' ndxàc fta'n na' por cón che'n Crist, co' anze'f nque' lezon ñèen. Tac guna'a anze'f mbli zin' cón che'n Tad Crist, ne.

¹³Gunii gu' Diox loo Ruf co' ndxela's, co' inga'ste loo cón che'n Tad Crist làth mèn no loo xna' Ruf co' ndlin cuent nac xal xnan.

¹⁴Gunii gu' Diox loo Asincret no loo Flegont no loo Herm no loo Patrob no loo Hermes no loo taamas hues xtàa na' por cón che'n Crist co' nzo no rye mèna.

¹⁵Ndlyazen nii gu' Diox, ne, loo Filog no loo thìb xa'got co' lèe Jul no loo Nere' no loo fta'n Nere' no loo xa'got co' lèe Olimp no loo ryete taamas mèn co' ndxàc hues na' co' nzo làth mèna, ne.

¹⁶Gunii gu' Diox loo thìb xtàa gu' no loo tedib xtàa gu' xalque' nac mod co' ngue's ncàa gu' yen xtàa gu'. Ryete mèn co' nqueltàa loo cón che'n Crist co'te' nzon ndxè' ngue nii Diox loo gu'.

¹⁷Na'ben loo gu', mèn huesen por cón che'n Crist, hui' gu' no bla's gu' loo mèn co' ndli par ndxàc chop ned mèn loo hues xtàa mèn. Ndxàc mèna mèn co' nca' no mèn co' ntau' loo xtàa mèn loo cón che'n Crist. Con' co' ndli mèna ntau' no nca' loo di's ndac co' nac co' mté'th gu' co' ndlu' mod co' nzo ban gu'. Más huen, gro' xà' gu' loo mèna.

¹⁸Tac ryete mèna indlide sirv loo Tad Jesucrist na'. Ndxe'leque', ndli mèna sirv ante loo con' ndryo' ndlyen' lezo'pe' mèna. Nado' di's nado' cuent ndli mèna par yòo lezo' mèn co' nac mèn naxèn no mèn nachol' par tataa mod quedìi mèna prob mèn co' nac mèn naxèn no mèn nachol'.

¹⁹Ndxath ndxèn loo ryete mèn xá mod ndyubdi's gu' loo Tad. Por cona, ndyac lezon ñèen gu'. No sate más ndlyazen tyub xnìi yéc gu' no tyub xnìi lezo' gu' no altant cue gu' par li gu' con' co' nac con' ndac. Ndxe'leque', indlyasten gàc gu' mèn co' ndli con' ye'rsin'.

²⁰Diox co' ntu' ntàl lezo' mèn no co' ndli par nagàl yo lezo' mèn, Dioxa tolo ton' rye con' ye'rsin' co' ngue li Mebizya làth gu' par ne'lide Mebizya gan gàc gu' chop ned mèn loo con' co' ngue niin loo gu' ndxè'. Lyazen le' Tad Jesucrist na' tolo li anggàc con' ndac loo gu'.

²¹Timote co' anze'f ndlyath no daa loo zin' co' nxo'f zin'en loo Crist ngue nii Diox loo gu'. Lus no Jasón no Sosipat, ne, co' nac mèn gulàaz daa ngue nii Diox loo gu'.

²²Daa, co' lèe Ters, co' nac secretar loo Pab, co' mque' ye's co' nac cart ndxè' loo gu', daa ngue nii Diox loo gu' loo cón che'n Tad Crist, ne.

²³Ngue nii mbi' co' lèe Gay Diox loo gu'. Liz Gay nac posad daa nalle'. Liz Gay nqueltàa mèn co' ndxela's co'se' mbez mèn Diox. Erast, co' nac tesorer che'n mèn ciuda Rom, ngue nii Diox loo gu', ne. Mbi' co' lèe Cuart, co' nac hues na' por lèe Tad Crist, ngue nii Diox loo gu', ne.

²⁴Lyazen le' Tad Jesucrist tolo li par anggàc con' ndac loo gu'. Taandxè' gàca loo gu', ndèe gu'.