Romanos 16:8-24

⁸Y arenic e hermano Amplias xeꞌ intzay inwira tama Cawinquirar que nen war inwebꞌta axin e cꞌajpesiaj tut.

⁹Y arenic e hermano Urbano xeꞌ jax inteꞌ nipiar tama upatnar e Cristo que nen war inwebꞌta axin e cꞌajpesiaj tut, y arenic e hermano Estaquis xeꞌ inchoj ut nimener que nen war inwebꞌta axin e cꞌajpesiaj tut ubꞌan.

¹⁰Arenic e hermano Apeles xeꞌ qꞌuecꞌo xana tama e Cristo que nen war inwebꞌta axin e cꞌajpesiaj tut, y bꞌan ubꞌan tama tunor tin e turobꞌ tama uyotot e hermano Aristóbulo.

¹¹Y arenic e hermano Herodión xeꞌ tuaꞌ e Israel que nen war inwebꞌta axin e cꞌajpesiaj tut, y bꞌan ubꞌan tama tin e war acꞌupseyanobꞌ tama Cawinquirar xeꞌ tuobꞌ ufamilia e hermano Narciso.

¹²Y arenic e hermana Trifena taca e hermana Trifosa xeꞌ cay patnobꞌ tama upatnar Cawinquirar ixnix que nen war inwebꞌta axin e cꞌajpesiaj tutobꞌ, y bꞌan ubꞌan tama e hermana Pérsida xeꞌ inchoj ut nimener xeꞌ cay patna meyra tama upatnar Cawinquirar que nen war inwebꞌta axin e cꞌajpesiaj tut.

¹³Y arenic e hermano Rufo xeꞌ galan apatna tama tunor upatnar Cawinquirar que nen war inwebꞌta axin e cꞌajpesiaj tut, y bꞌan ubꞌan tama utuꞌ e Rufo era xeꞌ quetpa bꞌan cocha inteꞌ nituꞌ ani.

¹⁴Y arenic e hermano Asíncrito taca e hermano Flegonte y e hermano Hermas y e hermano Patrobas y e hermano Hermas taca tunor e ajcꞌupesiajobꞌ xeꞌ turobꞌ tacarobꞌ que nen war inwebꞌta axin e cꞌajpesiaj tutobꞌ.

¹⁵Y arenic e hermano Filólogo taca e hermana Julia y e hermano Nereo taca uwijtan que nen war inwebꞌta axin e cꞌajpesiaj tutobꞌ. Y arenic e hermana Olimpas taca tunor e ajcꞌupesiajobꞌ tama cacꞌupesiaj xeꞌ turobꞌ tacarobꞌ que nen war inwebꞌta axin e cꞌajpesiaj tutobꞌ.

¹⁶Pues entonces cꞌajpesic ibꞌa inteꞌ intiox taca inteꞌ mecsaj xeꞌ erach. Tunor e sian grupo ajcꞌupesiajobꞌ tama e Cristo war uyebꞌtobꞌ axin e cꞌajpesiaj tibꞌa ubꞌan.

¹⁷Pues entonces niwermanuox, cꞌani insutpa inwareox otronyajr era que chꞌujcunic iwira chi xeꞌ war uxere e ajcꞌupesiajobꞌ axin y xeꞌ war acanseyan lo que majax bꞌan cocha cay incansiox. Pues jax jaxirobꞌ xeꞌ war uche acucrema e ajcꞌupesiajobꞌ axin y cꞌani inwareox era que ira ixxana tacarobꞌ.

¹⁸Porque e winicobꞌ cocha era machi war uyujtzꞌiobꞌ ut Cawinquirar Jesucristo sino que war uchiobꞌ lo que uyusre uchiobꞌ tama uwerir, y war umajres uyalmobꞌ e gente xeꞌ mato jax nojta tama e cꞌupesiaj porque jaxirobꞌ war oꞌjronobꞌ taca e ojroner xeꞌ inchiꞌ y xeꞌ galan uyubꞌnar.

¹⁹Pues natanbꞌir umen tunor e ajcꞌupesiajobꞌ axin que nox icꞌupse e Dios tama tunor, y tamar era nen war intzay tamarox. Pero unsre tuaꞌ inata meyra cocha tuaꞌ iche lo que imbꞌutz, y que matucꞌa tuaꞌ inata cocha tuaꞌ iche lo que mabꞌambꞌan.

²⁰Y Cadiosir xeꞌ jax xeꞌ uyajcꞌon e jiriar axin ucucru wacchetaca e Satanás tuaꞌ aquetpa yebꞌar utajn iyoc. Cawinquirar Jesús uchojbꞌesicox tunorox.

²¹Y e hermano Timoteo xeꞌ cay patna meyra tacaren cꞌani uyebꞌta axin e cꞌajpesiaj tibꞌa, y bꞌan ubꞌan e hermano Lucio taca e hermano Jasón y e hermano Sosípater xeꞌ ajisraelobꞌ tacaren.

²²Y nen ubꞌan xeꞌ nicꞌabꞌa Tercio cꞌani inwebꞌta axin e cꞌajpesiaj tibꞌa tamar ucꞌabꞌa Cawinquirar. Jax nen xeꞌ war intzꞌijbꞌa e ojroner era xeꞌ tuaꞌ e hermano Pablo.

²³Y cꞌani uyebꞌta axin e cꞌajpesiaj tibꞌa e hermano Chayo ubꞌan. Pues nen xeꞌ Pabloen war inquetpa tama uyotot e hermano era y jaxir war uyajcꞌu lugar tama uyotot era tuaꞌ umorojse ubꞌobꞌ e hermanuobꞌ. Y cꞌani uyebꞌta axin e cꞌajpesiaj tibꞌa e hermano Erasto xeꞌ jax e tesorero tama e chinam era, y cꞌani uyebꞌta axin e cꞌajpesiaj tibꞌa e hermano Cuarto ubꞌan.

²⁴Pues Cawinquirar Jesucristo uchojbꞌesicox inteꞌ intiox. Amén.