Roma 16:8-24

⁸Au haitua haraoe soda-moleꞌ fee aꞌa Ampliatus. Au sue ni, nana huu ana nanahekeꞌ noo ita Ramatua na.

⁹Au haitua haraoe soda-moleꞌ fee aꞌa Urbanus. Ria boe sama-sama no ami malalaꞌo Kristus nonoi-tataon. Au haitua haraoe soda-moleꞌ fee aꞌa susue ki Stakis.

¹⁰Au haitua haraoe soda-moleꞌ fee aꞌa Apeles. Ana hapu sosobaꞌ, tehuu lui na aon. No ria na, ita bubuluꞌ tae, ana namahere tebe-tebe Kristus so. Au haitua haraoe soda-moleꞌ fee aꞌa Aristobulus kileoboboki nara katemaꞌ.

¹¹Au haitua haraoe soda-moleꞌ fee aꞌa Herodion. Ria lahenda Yahudi, sama leoꞌ au. Au haitua haraoe soda-moleꞌ fee katemaꞌ Narkisus kileobobokin fo ramahere Kristus so a.

¹²Au haitua haraoe soda-moleꞌ fee susi Trifena no susi Trifosa. Sira boe ralalaꞌo ita Ramatua na nonoi-tataon. Au haitua haraoe soda-moleꞌ fee au tia ki, susi Persis. Huu fo ria boe noi-tao sota nan seli fee ita Ramatua na.

¹³Au haitua haraoe soda-moleꞌ fee aꞌa Rufus. Ita Ramatua na here nan so. Au haitua haraoe soda-moleꞌ fee mama na boe. Ria nana, sama leoꞌ au mama boki ka.

¹⁴Au haitua haraoe soda-moleꞌ fee aꞌa Asinkritus, aꞌa Flegon, aꞌa Hermes, aꞌa Patrobas, aꞌa Hermas, ma basa toranooꞌ fo sama-sama roo si a.

¹⁵Au haitua haraoe soda-moleꞌ fee aꞌa Filologus, susi Yulia, aꞌa Olimpas, aꞌa Nereus no fadi ina na, ma basa lahenda saraniꞌ fo sama-sama roo si a.

¹⁶Maneniko emi mabua, fo esa sipoꞌ esa pake nadeꞌi lalao-lalafuꞌ fo naraa soa-neuꞌ lahenda kamahereꞌ ara. Kristus lahenda saranin fo rai ia ara haitua haraoe soda-mole balaroe-balanauꞌ fee emi boe.

¹⁷Toranoo kara emin! Au hule emi besa-besa, o! Manea matalolole, huu fo lahenda tao ra emi tapasara, fo nau rahihiiꞌ ratuda emi. Hata fo ara rafada emi a, nana naseiꞌ no hata fo ami manori-mafadan neuꞌ emi so a. De bosoꞌ matiaꞌ mo lahenda rupa leo naꞌ ara!

¹⁸Ara ta roi-tao soa-neuꞌ ita Ramatuan Yesus Kristus. Ara roi-tao fo noi sira mesaꞌ asa siꞌ hapu ria buna-boan. Sira lalame maa nara ro lahenda fo bei ta ralelaꞌ bea riꞌ malole, ma bea riꞌ tadaluꞌ. Ara lalame maa nara fo tipu-dai lahenda.

¹⁹Basa lahenda ra ramanene rae, emi tuka mahere Manetualain hihii-nanaun so. Huu ria na, de au amahoꞌo-atadale nana huu emi. Au nau emi malelaꞌ laꞌe-neuꞌ hata malole, ma bosoꞌ seseo-babaliꞌ moo hata tadaluꞌ ara.

²⁰Manetualain, riꞌ bisa fee ita tasoda no tetu-temaꞌ, mole-dame, ma tesatei-tamadaleꞌ. Ria riꞌ neuꞌ ko nalulutuꞌ nitu ra malaka bau-ina na kuasan, ma natudu nae, emi riꞌ maseki. Ria ta dooꞌ a soꞌ. Au hule-haradoi fo ita Ramatuan Yesus Kristus natudu dale malole Na neuꞌ emi.

²¹Fadi ki Timotius, fo noi-tao sama-sama no au, ana haitua fee emi haraoe soda-moleꞌ. Aꞌa Lukius, aꞌa Yason, ma aꞌa Sosipater boe haitua haraoe soda-moleꞌ. Sira nana, lahenda Yahudi sama leoꞌ au.

²²(Au, Tertius, fo riꞌ duiꞌ susuraꞌ ia tuka hata fo aꞌa Paul nadenu au duiꞌ a. Soda-moleꞌ neme au mai, huu fo au boe ita Ramatua na lahendan.)

²³Au leo lalai nai aꞌa Gayus uma na. Basa lahenda saraniꞌ fo rai ia, biasa rabua fo masoꞌ rai uma na. Ria boe haitua haraoe soda-moleꞌ. Aꞌa Erastus, fo dadi mana homu doiꞌ nai bendar a, ma ita toranoon Kuartus, boe haitua haraoe soda-moleꞌ.

²⁴Au hule fo ita Ramatuan Yesus Kristus natudu dale malole Na neuꞌ emi basa. Noi ri naꞌ so!