Romanos 16:8-24

⁸Mʉ salud deebat ĩchab Cristo gaaimua mʉ khapkhʉʉn chi wajapham Ampliatoog.

⁹Mʉg Cristo iek jaau nʉm gaai maach khapeer Urbanoogjã salud; maimua Estaquiigjã agjö; mua i daupii chitʉm.

¹⁰Mʉ salud deebat Apeleeg, phithurg aauwaijã ʉ̈u Cristo gaaita warag ubʉ khitaajem. Thum Aristóbulo degam khʉʉnagjã ĩchab mʉ salud deebat.

¹¹Mʉ durram woundam Erodión aajemʉgjã salud deenaa Narciso di aiguim khʉʉn ĩchab maach Pör Cristo iek ʉ̈kha nʉm khʉʉnagjã mʉ salud deebat.

¹²Trifenaagjã mʉ salud deenaa Trifosaagjã deebat. Amjã ĩchab maach Pör Cristo atheeta phidkha durraajem. Ãa, maimua Cristo gaaimua maach ʉ̈phʉi Persidaagjã salud; ijã ĩchab mua daupii chitʉm dʉ̈rrcha maach Pör Cristo phidag gaai phidkha khitaawai.

¹³Rufoogjã salud. Ijã ĩchab maach Pör Cristo athee ich phidkha sim gaaimua thʉ̈rphöo sĩejem. Maimua i ãdagjã agjö mʉ saluddam deebat. Wajapcharan muajã ĩchab mʉch ãdjöta i jãsene wai chitʉm, ichdëujã ĩchab mʉ ich chaaijö aajeewai.

¹⁴Salud deebat Asincritoog, Flegonteeg, Ermeeg, Patrobaag, Ermaag maimua tagam ermanonaan am dʉ̈i nʉm khʉʉnagjã agjö mua salud deepʉ̈i chirʉm.

¹⁵Mʉ salud deebat ĩchab Filologoog maimua Juliaagjã agjö, Nereoog maimua i ʉ̈phʉígjã agjö, Olimpaag maimua thum tagam khʉʉn maach ermanonaan am aig nʉm khʉʉnagjã agjö mʉ salud deebat.

¹⁶Cristo gaaimua pãach thum ãba khodkha thʉnaawai agdaujö dich khapeen kha khõsi saludaabat. Mau iglesiapierr ermanonaan Cristo iek ʉ̈kha durrum khʉʉnau amach thumaam khʉʉnau pãrag salud deepʉ̈i nʉm.

¹⁷Ermanonaan, mʉch khĩir okhooju nawe pãrag jaaum ig chirʉm, mʉ iek ũrbat: Jãg Cristo iek jaau nʉm anʉmjã nacha pãachdëu ũrtarrjöjã khaba sĩi warag ag chaaurta jaau wënʉrrʉm gaaimua pãachjã amachjö okhoopijuuta ẽkha nʉm khʉʉn dʉ̈i khĩir khaphʉ abat; jãgʉm khʉʉn dʉ̈i chan oob khapeerkhamiet.

¹⁸Jãg nʉrrjëem khʉʉn chan chadcha maach Pör Jesucristo athee phidkham khõsi aawaita mag wënʉrraba, sĩi amach khõchagpierr nem waum khõchgaupaita jãg nʉrrjëem. Aman chadcha nem iekhaa khaug khĩir ee bëbëdömjö nem jaau sĩerrjëem, pari mag wënʉrrʉmʉn sĩi õor khĩirjug meraam khʉʉndam imeraa khũguraagpaita jãg nʉrrjëe aajem.

¹⁹Thumaam khʉʉnau khaphʉ nʉm, pãrau chadcha Cristoou khõsi simjö i ipierraata nem waaujem. Maagwai mʉ onee chirʉm. Mamʉ pʉaba mua mag chirʉm: Nem wajapham wawaagan chadcha nem khĩirjug khaugta abat; pari nem khaigbam wawaag chan sĩi warag wauju khaugba dau meraamjöta abat.

²⁰Pãrau magta amʉn, mag parhoob nem jaau sĩerrjëem khʉʉnau amach khĩirjug pãach ee jaaucheewaijã, Ẽwandam maach khõinaa apiejemuata pãrag am iek ʉ̈khapiba abarmua chi mepeer Satanás mag õrag sëukha nem jaaupiejemjã pãrag bʉ̈ʉu ö jʉ̈athʉg deebarmjö aju. Maach Pör Jesuu pãar dʉ̈i ʉ̈u amkhĩir mua pãar kõit jëeu chiraajem.

²¹Ĩsin chad deeu pãrag maach salud jawaagpam. Mʉ khapeer Timoteo mʉ dʉ̈i ogdʉba phidkha khitaajemuajã pãrag salud deepʉ̈i sim; maimua mag tag ĩchab Lucioou, Jasonau maimua agjö Sosipaterraujã salud aajem; amach mʉkhʉʉn mʉ dʉ̈i durr ãbam durram khʉʉnau.

²²Keena, muajã pãrag saluddam deepʉ̈i chirʉm, mʉchdëujã pãach dënjö ĩchab maach Pör Cristo iek ʉ̈khaajeewai. Pabloou mʉg ẽsap gaai pãrag jaaupʉ̈i sim thum muata phãjim. Mʉ thʉ̈r Tercio aajem.

²³Jöoi Gayooujã ĩchab pãrag salud aajem. Mʉʉn i di aigta chiraajem. Culto wawaagjã ich mʉg degta õor biirdʉajem, i deg. Jöoi Erastoou ĩchab pãrag salud aajem, mʉg phöbör eem chi tesoreroou. Maimua ãbmiecha ermano Cuartooujã ĩchab pãrag salud deepʉ̈i sim.

²⁴Ayoo keena. Mʉgdampai ajim pãrag jaaum ig chirarr. Maach Pör Jesucristoou pãar thumaam khʉʉn dʉ̈i ʉ̈u amkhĩir, maumua marau pãar kõit jëeu durraajem.