Rom 15:4-33

⁴Kamasa kandja Baibel al embe bolo wori pai ge, nono singare yembon mal ombine dje awi. Baibel kere pupin dal, nono aglo gi dje, God nono inda dje kui ye mopon.

⁵Alla God nono wopake pille aundaka, aglo gi dje mormon mal ge, une ye aundaka, ye Krais Jisas boll wanne ge, ye pillgi pai una boll nomane taimane panda moye.

⁶Ye embe yei dal, ye kandja taimane djineke, ye nomane taimane pandaka, nono Iwa Kerman Jisas Krais Ne God moro ge, ye une kandjiye amblo pla worne.

⁷Embe yei pille Krais ye boll wopake pille aundo mal embe, ye yenekne wopake pille moye. Ye embe yei dal, God kandjiye kerman panda.

⁸Ge Krais Juda una moi al po yenekne boi kogo yei mal ge, une nono ombine dje awi, God Juda una nane kokane kandja embe dje ye auno we dje wori yei ge, kandja kaima dji kanmon.

⁹Alla une woika God nono wandill golo awi ge epil djell una kane God kandjiye amblo pla worne dje pille woi. Baibel al kandja bolo wori pai ge embe djindo, Embe yei pille na epil djell una mor al po ni pille pla yeno. Ni kandjin paro ge na pille i gollang djino we dji

¹⁰Alla kandja ta Baibel al bolo wori paro ge embe djindo, Ye epil djell una mor ge, ye God unakiye boll aike molo wo pillme dji

¹¹Alla kandja ta Baibel al bolo wori paro ge embe djindo, Epil djell una porapora Iwa Kerman kandjiye amblo pla wornembe

¹²Pi, alla propet Aisaia Baibel al pepa bolo embe dji, Iwa Jesi yene epilye moi al iwa king gun ta wo epil djell una kantau yenda. Alla kandja djinda mal, une kaima ye aunda dje kambono kui yemoye we dji

¹³Kandja embe bolo wori paro pille na kamang embe yendo. God nono pak to aundaka yene kandja dji mal nono aunda dje pille kui yenmon iwa ge, une ye aundaka, ye pillgi djinj al, wo kerman piyeke, ye ellne tukne pakna arngan kaima yenda. God Murble ge ye boll yembe yendaka, God kandja dji mal kaima aunda dje kui yemor ge, kaima kui yemolo, kere djine dje na kamang yendo.

¹⁴Na agana ambana kambono ye mor ge, na kando, ye singare wopake uro yenj. Ye wal pille kune ye, ye yenekne boll kandja beke awinj ge kune yendo.

¹⁵Kune yendo ba na pepa ipon bolo aundo ge, na kandja dongall mal dje awo, ye nomane to magno dje yendo. Yendo ge me embe mal paro. God na wopake pille awo

¹⁶dje worika, na epil djell una moi al po Jisas Krais kogoye yell. Na opa gale awinj una mal embe molo, God kandjiye wopake dje epil djell una moi al ge awill. God Murble ge yendaka ga kumbene kuruwo yendaka, opa wopake mal embe moyeke, na ipo God aunaka, God kane wo piya dje na kogo embe yendo.

¹⁷Na Jisas Krais kandjiye al po God kogoye embe ye wanill mal ge na kandjina amblo pla worno paro,

¹⁸ba na naworno. Krais na boll kogo yei mal ge na kandja ge dje pene worno, kandja ta man. Na po kandja dje awill al ge ne, na singare ye wanill mal ge ne, God Murble na boll moika, na po kogo dongall merke yell ge, epil djell una kane, God kandjiye al pille karkar yei. Yell ge na Jerusalem molo kogo kindja ye, Krais kandjiye wopake dje una awill. Awo pagle, na alla kondwe tambiye kogo ye er propins Ilirikum po kandja dje una awo embe yell.

²⁰Na dumo ta wane kandja wopake dje una aundo ge, na una Krais kandjiye napille moi al ge na wopille po kandja dje awill. Dumo ta una dji pi pora dji al ge, na po nadjill. Una djell ta asamoll po numb taki pora dji, na are po numb be al takno kune nayendo.

²¹Ge man, kandja Baibel al paro mal ge na yeno dje pro. Baibel kandja embe djindo, Una pende une kandjiye dje nawi al ge, are kanne. Alla una pende une we dje napi una ge, are piye we dji

²²Na kamasa ye moi al wono dje yell ba na kogo ge yell pille nawoll.

²³Alla kognumb merke erwo pika, dumo manda ge kogo pai pille, na ye moi al nawoll. Ba ipon na kogo yell pora dji pille, na ye mor al wono dje pille moro.

²⁴Embe mal ge na dumo Spen puno ba asamoll na ye mor al wono. Na ye boll wopille moponka, ege tuge ta wor pundaka, ye pak to auneke, na er dumo Spen puno.

²⁵Wono ba asamoll na er Jerusalem po God unakiye pak to auno paro.

²⁶Yeno ge, Jerusalem una pende wal nayei pille, God unakiye propins soka Masedonia ne, Akaia molo kane, ku i pakna woro embe dji, nono God unakiye wal nayei Jerusalem mor ge pak to aumbon we dji.

²⁷Yenekne nomane pai mal pille embe dji, nono wal ta awo yem woro Jerusalem una aumbon paro we dji. Dji ge kandja wopake mal dji. Asa Juda una wo epil djell una moi al, kupill al kandja mal embe dje aumaka, kambono wopake pi pille, wal makimb wale awo yem woro aumbon we dji ge kandja kune mal embe dji.

²⁸Embe yei pille na ku ge ipo Jerusalem una auno.

²⁹Awo kere, are na er dumo Spen puno dje pill dal, ye mor al wono. Alla na kando, wono poke ge, Krais na ye wopake ye aunda mal embe, une ye ye wopake ye aunda.

³⁰Agana kambono ye mor ge, na kandja dje ye aundo, nono Iwa Kerman Jisas Krais wombaye mormon pille, ye na pille kamang yene. God Murble ge yei, nono wopake kane aunmon mal ge pille, na yembe ye God pille kamang yendo mal ge, ye na pille kamang embe yene.

³¹Na er Jerusalem punaka, Juda una God kandjiye mop awinj una wo na to djine. Alla na po God unakiye mor al ku ge aunaka, una wopake piye dje ye kamang embe yene.

³²Yene ge, God kapla we djindaka, na wopake pille ye mor al wono. Na ye boll yepall ta waka moyaka, na yembena alla dongall panda.

³³God nono ellne tukne arngan ye aundo iwa moro ge, une ye boll porapora moya, kaima.