Romanos 15:4-33

⁴Kchë nii kwnee Dios tiemp kwë parñee jkiiño lo no tsiin kchosody no ni kchoobladzyo styoo no parñee kniladzyre now.

⁵Aan lëë lëësy Dios nii xnee kyalndoladzy dyon kakni lëë do parñee ngui kpañ do kchë xcombañer do sinak nii bluuy Crist

⁶parñee tugak kak tsiy do tsiñee ktee do skizh lo Tat Tios pxosy Jesucrist.

⁷Kol jkaaña xcombañer do sinak nii pkaaña Crist to parñee kteedy meñ skizh lo Dios.

⁸Chakladzyaa kniyaa lo do nii lëë Crist biid parñee jkiiñ xaa lo meñ Israel. Lëë xaa biid kuñ cumplir nii chëb Dios lo pxusykoltoo meñ Israel parñee kluuy xaa nii chuñ Dios cumplir kchë nii xñee Dios.

⁹Ni lëë xaa biid parñee wi meñ sit ktee skizh lo Dios por xkyalnsaak Dios, sinak nii xñee kitsy nii kë xtiits xaa: Por ngo lëën kñe cho nakoo lo meñ sit, ni lëën kol lay lool.

¹⁰Lëë stub lugar xñee xkitsy Dios: Kchë do siñee nak to meñ sit, kol kle ksa do meñ xkyedzy Dios.

¹¹Lëë gak kitsy nii kë xtiits Dios xñee: Kchësy to siñee nche do lo kislyu, kol ktee skizh lo Tat Tios.

¹²Lëë stub lugar pkëë profet Isaías: Lëë xtiiy Isaí jkëpeñ, aan lëë xaa kchoo kñabey xaa lo meñ sit, aan lëësy xaa ksaladzy meñ sit.

¹³Lëë lëësy Dios nii xnee kyalndoladzy dyon, ko nguiool styoo do ni knee tiits nii mbëë kpañ do kchë do siñee xniladzy to xtiits xaa, parñee mastre tso kyalwniladzy leñ styoo do por xkyalwnabey Kyalbini Ntson.

¹⁴Beetsy, nanpaa nii no kyalndoladzy leñ styoo do, ni nanaa nii chak to, ni nanaa nii schilo kuuñ kseedy to xcombañer do,

¹⁵per lëën byax pkën chop tson cos leñ kitsy re, parñee knitylasty tow. Lëë Dios kwnabey naa.

¹⁶Kyën xtsiiñ Jesucrist lo meñ sit. Xluyaa xtiits Dios nii xteelaa lo meñ sit, parñee kpig meñ sit lo xaa, ni kak meñ sit sinak tu cos nii xlyaa nex nii chokon lo Dios. Por lëë Kyalbini Ntson chuuñ nyë meñ sit.

¹⁷Porñee xniladzyaa xtiits Jesucrist, ngo nii xlen kën xtsiiñ Dios.

¹⁸Kyaxtyaa kñën stu cos, sink lëën kñe nii chuuñtsyey Crist por naa, parñee ksoob meñ sit xtiits Dios. Pkëëtyag meñ sit xtitsaa

¹⁹ni kon meñ sit kyalntson ni milagre nii beeñtsyeyaa por Kyalbini Ntson. Singo mod lëën beñ cumplir bluyaa xtiits Crist nii xteelaa. Destye Jerusalén bislon aan ptsiiñaa axte xtañ meñ Iliria.

²⁰Singo mod lëën bluy xtiits Dios nii xñee cho nak Jesucrist laañee karty kon meño, parñee kyëdyaa tsiiñ laañee bislol stu meñ.

²¹Lëën beñ nii xñee kitsy nii kë xtiits Dios: Lëë meñ nii destye karty kon cho nak xaa kan xaa, ni lëë meñ nii karty jkëëtyag xtiits xaa kyeñ.

²²Por ngo karty ktee tiits kyely teedyaa lo do, nikxe ndaly vuelt kwlokyeeñaa nyelyaa.

²³Per lëë na nii lëën byal xtsiñaa tañ re, ni como kokle gaa ndaly iz nii chakladzyaa kyelyaa lo do,

²⁴tsaap steedyo tiits tsiñee lëën ka España. Aan loxsye kanaa lëë do, tsaap schilo kuñ do naa yudar ktsiiñaa laañee san.

²⁵Per lëë na lëën ka Jerusalén par kanin tu nii jkiiñ lo betsy no nii no siko.

²⁶Por lëë styoo meñ Macedonia ni meñ Acaya kwlañ nii ktop xaa tumi aan kxaal xaaw lo betsy no nii no lyaadzy Jerusalén.

²⁷Styoo xaa kwlaño ni bueen gaa beeñtsyey xaa, porque por meñ Israel bniladzy xaa xtiits Dios. Por ngo no nii kuñ xaa meñ Israel yudar.

²⁸Tsiñee lëën lox kte nii ptyop, lëën kcho par España aan lëën kyely teedy lo do.

²⁹Xyeñpaa nii tir kuuñlay Crist lëë do tsiñee lëën kyely teedy lo do.

³⁰Beetsy, por Jesucrist ni por kyalwkëstyoo nii xneetsy Kyalbini Ntson lo no, xñabaa nii kyak tusy no, parñee kñab no lo Dios por naa.

³¹Kol nab lo Dios nii kteelaa xaa naa lo meñ Judea nii xnilasty xtiits Crist, ni kol nab nii mbëë jkaaña meñ Jerusalén nii sanin,

³²parñee tsaap në Dios que nii nguiool no styoon tsiñee klyaañaa lo do aan kxiladzyaa lo do.

³³Lëë lëësy Dios nii xchoobladzy styoo meñ dyon kakni lëë do. Amén.