Rom 15:4-33

⁴Uni a kum wasiso rop ra di sa tumus tari numugu utmakai una Buk Tabu, di tumus tari sur in ususer dat, sur dat in tur dekdek una anundat a nurnur, ma in warut dat kai, sur dat in kis langlang nama nurnur sur a kum utna o God in pami numur.

⁵A wararing lena o God ut, ra i ser udekdek anundat a nurnur, ma i ser warut dat, in dat tomo mot sur in takai kut a nuknuki mot, ra mot mur a nilaun anun o Karisito Iesu.

⁶A wararing sur in takai kut a nuknuki mot ma a walngamot, ra mot watung ulabo pas o God, a Taman anundat a Labino o Iesu Karisito.

⁷Mot in gas pas mot etetalai elar nami ra o Karisito i gas pas mot, sur mot in ulabo pas o God.

⁸A watungi tamot lena, o Karisito i wanpat elar nama tultul anun a taro Juda, sur in pam sot pas a kum liliman anun o God ra i sa pam tari torom a kum tumtubun det. Ra i pami lenra, i ese i lena a wasiso anun o God i lingmulus.

⁹I wanpat kai sur a taro ra awu sur a taro Juda det in watung ulabo pas o God una nun a marmaris. Elar nami ra di sa tumus tari una Buk Tabu lenri, “I mo ra an watung ulabo pas ui nisan a taro ra awu sur a taro Israel, ma an kelekele na watung gasgas torom ui.”

¹⁰Ma di sa tumus tari kai lenri, “Mot a taro ra awu sur a taro Israel, mot in gas tomo nama taro anun o God.”

¹¹Ma di sa tumus tari kai lenri, “Mot ra awu sur a taro Israel, mot in watung ulabo pas a Labino, mot a kum kamkabo taro rop mot in kelekele na watung ulabo toromi.”

¹²O Aisaia kai i wasiso na poropet un o Karisito lena, “Ara in nanpat tagun a kabotaro anun o Jesi. In kis na king ma in warkurai sur a taro tagun a kum gapman rop, ma a taro ra awu sur a taro Israel det in kis langlang nama nurnur sur a wakakino ra in pami.”

¹³A wararing torom o God, i ra dat kis langlang suri nama nurnur sur a wakakino ra in pami. A wararing sur in ubukus mot ra mot nurnur uni nama labino gasgas ma a malmal. Ma una dekdekin a Tokodos na Nion ut, mot in kis langlang nama labino nurnur sur a wakakino, ra numur o God in pami.

¹⁴A kum tistising, a tasmani ut lena mot bukus nama wakak na petutna ma a mananos, ma mot pet lar pasi sur mot in ususer etetalai mot.

¹⁵Ikut, a tumus a pas ri torom mot, ma a wasiso dekdek una a ramano kum utna, sur mot in nuknuk melet uni. A tumtumus torom mot, uni o God i pitar anun a marmaris torom iau,

¹⁶sur an tene pinapam anun o Karisito Iesu torom a taro ra awu sur a taro Juda. A elar nama tene etabor torom o God. A warawai nama Wakak na Wasiso anun o God, sur a taro ra awu sur a taro Juda, det anung a etabor torom o God ra in gas nami. Ma a Tokodos na Nion i sa rus talapor tar det.

¹⁷Un o Karisito Iesu, a gas doko una nung a pinapam ra a pami torom o God.

¹⁸Ka nem na wasiso un tu utna gisen. A nem na wasiso kut una pinapam, ra o Karisito i sa pam tari ulamang, sur an ben a kum taro ra awu sur a taro Juda sur det in mur a wasiso anun o God. Det muri kibino una nung a kum wasiso ma anung a kum pinapam.

¹⁹Det tama a dekdekin a kum ukinalong ma a kum utna na ukisin ra a pami nama dekdekin a Tokodos na Nion. Tagisapat o Jerusalem tuk tong o Ilirikum, a sa warawai rop pas iai nama Wakak na Wasiso anun o Karisito.

²⁰Una turturkibin ina nung a pinapam torom o Karisito tuk uniri, anung a labino nemnem sur an warawai nama Wakak na Wasiso una kum tamon ra kabaut det tasman o Karisito, sur gong a pam a rumu netes una pos ra ara ut i sa utur tari.

²¹Elar nami ra di sa tumus tari una Buk Tabu lenri, “Det ra kabaut di inanos det uni, det in tama i, ma det ra kabaut det longoro i, det in tasmani.”

²²A lari sur an nan utiro torom mot, ikut a balon doko una pinapam na warawai una kum tamon. I mo ra ka wan lar pas utmakai torom mot.

²³Ikut, uniri anung a pinapam una kum papor ri, i sa rop. Ma a susut na kilalo, a nem doko i sur an tama mot.

²⁴Ra an nan utong o Spein, a nuki lena an kis lilik pas nisamot ma dat in gas tomo pas. Numur an katutur melet sur an nan utong o Spein. Ma a nemi sur mot in warut iau una nung a inawan utong.

²⁵Ikut uniri, an nan munung usapat o Jerusalem sur an warut a taro anun o God sapat.

²⁶Uni a kum tene nurnur tong una aru papor Masedonia ma o Akaia det gas sur det in woro tomo a mani, sur det in warut a kum tene nurnur ra det sibo sapat o Jerusalem.

²⁷Det gas sur det in pami lenra. Ma i tokodos kai ra det in pam a petutna na minabalu torom a taro Juda, uni a taro Juda det sa warut tar det ra awu sur a taro Juda, sur det kai det in rakon a kum utna na nion ra o God i udan det nami, ra numugu anun a taro Juda kut. Ma i wakak sur det bulung det in warut a taro Juda nama mani.

²⁸Ra a sa urop ru anung a pinapam ma a sa pitar tar a etabor ri torom a kum tene nurnur sapat o Jerusalem, an nan utong o Spein, ma una nung a inawan sur utong, an tama mot.

²⁹Ma a tasmani lena, ra an nanpat torom mot, an bukus nama kum utna na nion ra o Karisito i udan tar iau nami, sur in warut mot.

³⁰A kum tistising, una risan a Labino o Iesu Karisito, ma una marmaris anun a Tokodos na Nion, a saring mot sur mot in dekdek tomo nam iau, nama niaring torom o God sur in warut iau.

³¹Mot in saring o God sur in ulaun iau gusun a taro ra ka det nurnur, ra kurong det una papor Judia. Ma mot in wararing kai sur a taro anun o God sapat o Jerusalem det in gas pas anung a pinapam na etabor torom det.

³²Ra o God i nemi lenra, an nanpat torom mot nama gasgas, ma an mana tomo nam mot sur an los melet pas a dekdek.

³³O God, i a kibin a malmal, in kis tomo nam mot rop. Amen.