Roma 15:4-33

⁴Sari doduru tiṉitoṉa saripu ele ta kubere koasa Kinubekubere Hope, si pude va tumatumae gita, pude mada soto va nabu meke tava ṉiṉira si gita koari na vinatatara.

⁵Sa Tamasa sapu poni gita sa sinoto va nabu meke sa ṉiniraṉira, si mani va boka gamu pude mi koa keke mo pa mia binalabala meke tinoa, pude lulia sa kinehana e Zisu Karisito;

⁶pude mi keke gua vahesia gamu doduru sa Tamasa, sa Tamana sa nada Baṉara Zisu Karisito.

⁷Mi koa vari hapahapai si gamu gua sapu vagi gamu Karisito si gamu pude mani tavahesi sa Tamasa.

⁸Ura tozini gamu rau sapu nabulu ni Karisito sari na tie Ziu, pude vata dogoro nia sapu hinokara sa vina tatara te Tamasa koari na tiatamadia rini.

⁹Gua asa pude va bokai tugo Sa sari na tie Zenitailo, pude vahesia sa Tamasa koa gua koasa Nana tataru variva taleosae koarini, gua sapu zama nia sa Kinubekubere Hope: “Gua asa ke kote vahesigo rau pa vari korapadi ri na tie Zenitailo; kote kera vahesia rau sa Pozamu.”

¹⁰Meke gua pule he si ta zamae: “Gamu na tie Zenitailo, si mi koa qetuqetu somanae koari na tie ta vizatadi te Tamasa,” gua.

¹¹Meke gua pule he: “Mi vahesia sa Baṉara, gamu doduru tie Zenitailo, mi kera vahesia, gamu doduru tinoni.”

¹²Meke e Aisea ba zama gua tugo he: “Sa Karoso te Zese si kote tuvulu vura, kote turu sage si Asa pude baṉara ni sari tie Zenitailo, meke kote raṉea ari na Zenitailo si Asa,” gua.

¹³Mani va siṉi ni gamu qinetuqetu meke binule, sa Tamasa koari na mia rinaṉeraṉe koa Sa, pude mi raṉe valeania pa korapa ṉiniraṉira tanisa Maqomaqo Hope sapu kote gorevura sari Nana vinatatara.

¹⁴Kasa tasiqu, gilana valeania rau sapu siṉi nia na lineana sa mia tinavete koari na tie, meke tagoi gamu sari tinumatumae, pude boka variva tumatumae si gamu.

¹⁵Ba mataqara si rau pude kubere atu koa gamu, pude va balabala puleni gamu si kaiqa ginugua, sina ele garunau Tamasa si rau pa Nana tataru variharupi

¹⁶pude qu nabulu nia se Zisu Karisito koari na tie Zenitailo. Tavetavete guana hiama si rau, pude tarae nia sa Inavoso Leana te Tamasa, pude di ta evaṉae na vinariponi pu variva qetu koe Tamasa sari na tie Zenitailo, pu ele tava madidi koa Sa, pa ṉiniraṉira tanisa Maqomaqo Hope.

¹⁷Gua ke koasa qua sinoto va nabu koe Zisu Karisito, si koa qetu nia rau sa qua tinavete pude nabulu nia sa Tamasa.

¹⁸Lopu kote zama nia rau keketoṉa ba gua mo sapu evaṉia Zisu Karisito koa rau, pude turaṉa lani sari na tie Zenitailo pude va tabea sa Tamasa. Ele evaṉia Karisito sapu gua asa koari na qua zinama na tinavete,

¹⁹koasa ṉiniraṉira tadi na tinavete variva magasadi na vina gilagila nomadi, meke koasa ṉiniraṉira tanisa Maqomaqona Tamasa. Ke koari doduru qua inene podalae pa Zerusalema, meke kamoa pa Ilirikamu, si tarae beto nia rau sa Inavoso Leana koasa guguana e Zisu Karisito.

²⁰Sa qua hiniva nomana si pude tarae nia sa Inavoso Leana koari na vasidi sapu lopu ele ta avoso sa pozana e Karisito, pude qu lopu guana la kuri vetu koasa sinokirae sapu ele podalae nia rina votiki tie.

²¹Gua sapu zama nia sa Kinubekubere Hope sapu zama guahe: “Arini pu lopu ta tozi nia sa guguana Sa si kote dogoria rini, meke sarini pu lopu ele avoso nia si kote gilania.”

²²Gua mo asa ke ta hukata si arau soku totoso pude atu koa gamu.

²³Ba kamahire si ele va hokoti rau sari na qua tinavete koari na vasidi hire, meke sina hoke mizimizi atu si rau koa gamu koari soku vuaheni ele hola pude atu dogoro gamu, gua;

²⁴ke balabala ia rau si pude atu tutuvu gamu koasa qua inene la pa Sipeini, pude qu boka ta tokae koa gamu koasa qua inene la vasina, pana ele beto atu koa qetuqetu paki koa gamu si rau.

²⁵Ba kamahire si korapa hebala la pa Zerusalema si rau, pude varitokae paki si rau koari na tie te Tamasa vasina.

²⁶Ura koasa dia tataru rina ekelesia pa Masedonia meke Akaia si vala ni rini si kaiqa vinariponi, pude toka ni sari na tie habahualadi, saripu koa turaṉi rina tie te Tamasa pa Zerusalema.

²⁷Qetu nia rini sa dia tinavete hie, ba lopu asa mo; na asa tugo sa dia tinavete, sina ele vagia rini koari na tie Ziu sa tinoa Maqomaqo tamanaena. Gua asa, ke goto tugo koarini pude toka ni sari na tie Ziu pa kalina poata, meke pa tiṉitoṉa hokara.

²⁸Pana va hokotia rau sa qua tinavete, pude vala nia sa poata koa rini pa Zerusalema, si kote tiqe topue la pa Sipeini si rau, ba kote atu hopiki ni gamu tu rau pa qua inene la.

²⁹Meke gilana valeania rau, sapu pana atu kamo rau, si kote tava kamo koa gamu sa minana nomana hola te Zisu Karisito.

³⁰Ke tepa zoṉazoṉa gamu rau si gamu kasa na tasiqu, pude varavara toka sisigiti nau koe Tamasa, sina raṉea gita sa Baṉara Zisu Karisito, meke ele ponini gita Sa sa tataru koasa Maqomaqo Hope.

³¹Mi varavara toka nau, pude qu tava leseve si rau koari pu lopu na tie te Karisito pa Ziudia, pude di qetu nia ri na tie te Tamasa pa vasileana Zerusalema sa qua tinavete varitokae vasina.

³²Ke pa hiniva te Tamasa si kote qetu hola si rau pana kamo atu, pude kote variva ṉiṉira i si gita.

³³Sa Tamasa sapu poni nia sa binule koa gita, si mani koa koa gamu doduru, Emeni.