ROMUDENƆ 15:4-33

⁴Yã kũ ò kɛ̃̀ yã pínki, ò kɛ̃̀ lɛ́danawá yãimɛ. Luda yã pìi dì ó gba mɛna, àdi ó gba swɛ̃̀ɛ de ògↄ̃ tãmaa vĩ.

⁵Luda kũ àdi ń gba mɛna à ń gba swɛ̃̀ɛ tó àgↄ̃ nɛ̀sɛdokↄ̃nↄ vĩ kũ kↄ̃o lákũ Kirisi Yesu pↄ́ bà,

⁶de à Luda ó Dikiri Yesu Kirisi De tↄ́ bo kũ nɛ̀sɛdokↄ̃nↄo kũ lɛ́dokↄ̃nↄo.

⁷À kↄ̃ sí lákũ Kirisi á sí nà Luda tↄ́bona yãi.

⁸Matɛn oárɛ, Kirisi gↄ̃̀ zĩ̀ri ũ Yudanↄnɛ de à lɛ́ kũ Luda sɛ̀ ń dizi káakunↄnɛ papa, ògↄ̃ dↄ̃ kũ Luda náani vĩ,

⁹buri pãndenↄ sↄ̃ Luda tↄ́ bo a sùru yãi lákũ à kɛ̃na Luda yãn nà ò pì: A yã mɛ́ à tò mani n sáabu kpá burinↄ tɛ́, mani n tↄ́ kpá.

¹⁰Ò pì dↄ: Burinↄ, à pↄnna kɛ kũ Luda gbɛ̃nↄ.

¹¹Ò pì dↄ: Ákↄ̃nↄ buri sĩnda pínki, à Dikiri tↄ́ kpá, ákↄ̃nↄ bùsu gbɛ̃nↄ sĩnda pínki à a táaki lɛ́.

¹²Isaya pì dↄ: Yɛsɛ zĩni ni bↄ̀tↄ pá, ani futɛ à kí ble buri pãndenↄa, onigↄ̃ wɛ́ dↄi.

¹³Luda kũ gbɛ̃ sĩnda pínki wɛ́ dↄi tó pↄnna pɛkɛrɛáwa kũ aafiaao a náani kũ átɛn kɛ yãi, de á wɛ́dↄina kara kũ a Nini gbãnao.

¹⁴Ma gbɛ̃nↄ, má dↄ̃ sãnsãn kũ manakɛ pɛ̀kɛrɛáwa, á yã sĩnda pínki dↄ̃ swáswa, áni fↄ̃ à lɛ́ dakↄ̃a.

¹⁵Ma takada dí kɛ̃naa gũn ma yãkenↄ kɛ̃̀ kũ swɛ̃̀gbãnao ditɛna de àgↄ̃ dↄágu yãi, zaakũ Luda ma gba zɛ́

¹⁶ma gↄ̃ Kirisi Yesu zĩkɛri ũ buri pãndenↄnɛ. Matɛn baaru kũ à bò Luda kĩnaa kpáńnɛ, de ń kunna gↄ̃ adona Luda Nini gãi, ò gↄ̃ Ludanɛ sa'obↄ kũ àdi káagu ũ.

¹⁷Kunna Kirisi Yesu gũn matɛn ĩa dã zĩ kũ matɛn kɛ Ludanɛ yã musu.

¹⁸Zaakũ má yãke ona vĩro, tó adi kɛ yã kũ Kirisi kɛ̀ ma kĩnaa baasiro. À tò buri pãndenↄ Luda yã mà ma yã'ona kũ ma yãkɛnaao gãi

¹⁹kũ sèedanↄ kũ daboyãnↄ gbãnao kũ Luda Nini gbãnao. Bona Yurusalɛmu ma lika wɛ̃tɛ kũ wɛ̃tɛo ari Ilirikumu bùsun, ma Kirisi baaruu kpàkpaa kɛ̀ papana.

²⁰Madìgↄ̃ ye mà baaru nna pì kpá gu kũ òdi Kirisi yã ma zikiro, de másun bú ba gbɛ̃ pãnde gã̀nlo yãi.

²¹Lákũ à kɛ̃na Luda yãn nà ò pì: Gbɛ̃ kũ odi a yã ońnɛ yãronↄ wɛ́ ni kɛ̃, gbɛ̃ kũ odi a baaru ma yãronↄ ni dↄ̀rↄ dↄ̃.

²²Yã kũ àdigↄ̃ kpá ma suna á kĩnaanɛ gɛ̃̀n baaakↄ̃n gwe.

²³À kà wɛ̃̀ ũgbangba kũ madìgↄ̃ ye mà su á gwa. Tera sà lákũ yãke dí gↄ̃mɛnɛ bùsu díkĩnanↄ gũn doro nà,

²⁴má tãmaa vĩ ò wɛ́ sikↄ̃lɛ sà ma gɛna Sapaini bùsun gũn. Tó ma gↄrↄ pla kɛ̀ kãáo kũ pↄnnao, áni zɛ́ kɛmɛnɛ gɛna gwe.

²⁵Tera la matɛn gɛ́ kũ kpányĩo Luda gbɛ̃nↄnɛ Yurusalɛmu,

²⁶zaakũ gbɛ̃ kũ ò kú Masedonia kũ Girisinↄ zɛ̀o ò Luda gbɛ̃ takaside kũ ò kú Yurusalɛmunↄ kámaza kɛ.

²⁷Ò zɛ̀o, ama tilasimɛ. Lákũ Yudanↄ Luda aruzɛkɛ kpàatɛtɛ buri pãndenↄnɛ nà, à mana buri pãndenↄ ń andunia aruzɛkɛ kpaatɛtɛ Yudanↄnɛ se.

²⁸Tó ma gba pìi nàńnɛ ń ↄĩ ma làka, ma gɛna Sapaini gũn mani bo á kĩnaa.

²⁹Má dↄ̃ kũ tó mani su á kĩnaa, mani suárɛ kũ Kirisi arubarikaao papanamɛ.

³⁰Ma gbɛ̃nↄ, ma naárɛ ó Dikiri Yesu Kirisii kũ yenyĩ kũ Luda Nini dì kpáḿmao, à futɛ à zɛ à Luda wɛ́ kɛ kũmao,

³¹de à ma bo Yudea Yesusaridenↄ ↄĩ, de zĩ kũ mani kɛ Yurusalɛmu Luda gbɛ̃nↄ tɛ́ kɛńnɛ nna,

³²gbasa mà á le kũ pↄnnao, tó Luda wè, mani su kámma bo á kĩnaa.

³³Luda Aafiade gↄ̃ kú kãáo á pínki. Aami!