Oroome 15:4-33

⁴Nuni Geeshsha Maxaafatappe demmiza dandayaynne minotethi nuus daana mala koyroppe xaafettidayssi wurikka nu izappe nuus timirte demmana mala xaafettides.

⁵Minotethinne dandaya immiza Xoossi inte Yesus Kirstoosa kaallishin intes inte giddon Ayana issifeteth immo.

⁶Hessika inte issi woznaninne issi duuna gididi nu Goda Yesus Kirstoosa Aawa Xoossa bonchanassa.

⁷Hessa gish Xoossi intena Xoossa bonchon mokki ekkida mala inteka issoy issa ufayssan mokki ekkite.

⁸Kase aawatas imettida hidota qaala polanas Xoossa tumatethi erettana mala Kirstoosi Ayhudatas ooththizade gididayssa ta intes yootays.

⁹Hessathoka Ayzaabeti iza maarotetha gish Xoosse galatana mala; hessikka “Ta nena dere giddon galatana; ne sunthaska galata yeth yexana” geetetti Geeshsha Maxaafan xaafettida mala.

¹⁰Qasseka “Ayzaabeto! Inteka Xoossa deretara ufayetite” geetetti Geeshsha Maxaafan xaafetides.

¹¹Nam7anthokka “Ayzaabeti inte wurikka Goda galattite; derey wuri iza sabbite” geetetti Geeshsha Maxaafan xaafettides.

¹²Hessatho Isayaasan “Ba dere asa bolla kawotiza Iseeye nay yaana. Alame asa ayssizaddey dendana; istika izan ufayettana” gees.

¹³Inte izan ammaniza gish hidota Xoossi intenan ufaysinne saroteth kuntho. Hessika Xillo Ayana wolqa hidota intes daranassa.

¹⁴Ta ishato! Inte lo7etethan; erateth ubban kumidaytanne harata zoranas eray dizayta gididayssa ta addafe shaaka eradis.

¹⁵Ta Xoossafe ekkida imotetha gina qasseka intena qofisanas issi issi yo7ota xalatethan intes xaafadis.

¹⁶Hessa he kiyatethay imettiday tani Xoossa Mishiraachcho qaala hanko deretas yootana mala; qasseka Qeese mala gidida Yesus Kirstoosas ooththanassa; hessa gish hanko dere asay Xillo Ayanan dummatidi Xoosse ufaysiza yarsho gididi shiiqana mala ooththays.

¹⁷Hessa tani Xoossas ooththiza gish Yesus Kirstoosan ceeqqettays.

¹⁸Ta yootidayssaninne ta ooththidayssan hanko dere asay Xoossas azazettana mala Kirstoosi tanan gididi ooththidazappe attin hara haasayana xalikke.

¹⁹Hessika haniday Xillo Ayana wolqan malatata baggara hanides. Hessa malanka Yerusalameppe Ilwaqoore gakkanaas ta Kirstoosa Mishiraachcho qaala sabakadis.

²⁰Hara asi kase ooththidason ta gelonta mala gaada kase Kirstoosa sunthi xeeygeti erontason Mishiraachcho qaala sabakanayssi taas amo.

²¹Harappeka “Iza gish istas yootetontayti iza beyana; siyi erontayti haasa7ana” geetetti kase Geeshsha Maxaafan xaafettida mala hanides.

²²Hessa geedon ta inteko boonta mala daro wode diggettadis.

²³Ha7i qas taas haan oosoy baynda gish daro laythatappe haa simmin intena beyanas ta daro laamotadis.

²⁴Hayssa ta qofa tani Ispene biza wode polanas qoppays. Heera aadhdhashe intena beyanassinne intenara guutha wode gam7ada laamota aaththida mala inte tana maaddana gaada hidota ooththays.

²⁵Ha7i qas ammanizaytas imettiza maado gish ekkada Yerusalame bays.

²⁶Gaasoyka Maqidooniyaninne Akaayan diza manqota maaddana dendides.

²⁷Hayssa ha maadoza isti ba dosan immiday isti ooththanas bessiza gishassa; Ayzaabeti Ayhudatara issife Ayana anjo ekkizayta gidikko istika baasi diza biitta anjon Ayhudata maaddanas bessees.

²⁸Hessa gish hayssa shiiqida maado miisha Yerusalame immidappe guye inte achchan ta Ispene baana.

²⁹Ta he inteko bashe intes Kirstoosa anjo kuntha eka baanayssa ta erays.

³⁰Ta ishato! Tani Xoossa woossan baaxetiza mala inteka tanara baaxettana mala ta intena Goda Yesus Kirstoosaninne Xillo Ayana siiqon woossays.

³¹Tani Yuhudan diza ammanonta asa kusheppe attana malanne Yerusalamen diza ta ooththoykka heen ammanizayta achchan ekettana mala taas woossite.

³²Hessika Xoossa shene mala he inteko ta ufayssara baana malanne intenara issife shempana mala.

³³Sarotetha Goday intenara ubbatara gido. Amiin.