Rom 13:3-12

³Tasah, iri lau ta atondrok badeh, lahou tiri ta nohowa lau amekes kandriyen mwasin bwe; arile toro lau heh amekes kandriyen ndra-in labai. I buku none ou anya, ou sanoh tiri lau ta atondrok badeh, ou amekes kandriyen mwasin, ya idah kameh, iy masiye ou.

⁴Iri lau ta atondrok doh, Kindrei le edeu iri ta anyolom tekedek tam kudu mwasin. Arile, i buku none ou amekes kandriyen ndra-in bamwenen ta madan bwe, ou anoh iy. Tasah, iri badeh, i nyara Kindrei kameh ateu samen ma winiyan adeu maha-an hawe isi ewek tam.

⁵Ya eme ta katin doh, aha kanuhun boho iri lau ta atondrok aha. Idoh badeh, anya ta aha kabelek maha-an hawe isi le bwe. Idoh in hamon ta budon mwasin tiye ou amekes kandriyen mwasin.

⁶Ta katin don adeh, aha ala akeh luk ta takis i tiri lau ta atondrok kon adeh. Tasah, iri badeh, lohowan ta Kindrei; iri amekes lahou ta atondrok na len mari.

⁷Aha katehei lakou saluwe lakou iri lau mari mene aha ndrandrei, kili hamon ja: Ya, i buku none aha bakeh luk ta takis ta sasah aha akohok eme bolo kon bwe badeh, aha kakeh kili; ya, i buku none aha mene banoh bwe, aha kanoh iri lau ta atondrok kon; ma i buku none aha bamasiye iri mene bwe badeh, aha kamasiye iri.

⁸I buku none aha mene ndrandrei ari lakou ta ari ndramak ta aseben aha, ya aha batehei saluwen bala hamon bwe le, badeh, aha katehei kili hamon. Arile, kandriyen ta aseken ndramak ari ja badeh, aha winiyan babwidiy bano bwe. Tasah, kandriyen ta aseken ndramak ari ja badeh, lakou maha-an labai ta aha winiyan batehei mara-ei bala hamon bwe. Ya, iy are lau aseken ndramak badu heh, badu heh badeh, iy in hamon handru ta batanau malen mari.

⁹Tasah, taha tanan, batanau malen mene ndratorowenei tiye i buku doh, “Ou sateu badih udu mwan, ya ou sadai ndramak samak, ya ou sabahana, ya madam salikis lakou ta ndramak ari ja.” Ma saba batanau malen ja badu hawe oro doh badeh, sukik le bada batanau ari le doh: “Ou aseken iri lau ari ari badu hawem, i le buku ou aso-ok ou le.”

¹⁰Ya eme are lau aseken lau badu mirihik tan badeh, iy winiyan bamekes budon ndra-in bala tiri bwe. Eme ya sendrehendreh ta aliy i buku doh: Kandriyen ta aseken ndramak ari ari badeh, mesekei ou an hamon ta batanau malen mari.

¹¹Ma eme aha kamekes kandriyen doh, tasah aha ndratanan ta taha na dah manyah ado bolo len ta aliy ai. Mada an ndrasahan ta aha samadin, tasah ndramak ta aseben taha, ale taha mene atehei budon tataha handru in tan badeh, len tan ndrame bakep, bala buku none kabatana na len mene taha tubuni ndrine taha, bwe.

¹²Mirihik kon kaleu ai, ma len kataku ai. Ya eme taha karuwaniy ta amekes kandriyen ndra-in badu lulik, ya taha kasini awin ta bahun ma len.