Rom 13:3-12

³Osi ra i pam a wakak na petutna ken ngara sur a gapman, ikut osi ra in pam a sakino in ngara ut. Pepetlai, u nemi sur un langolango gusun a nginara sur a mugumugu tagun a gapman? Un pam a wakakino ra in watung ulabo pas ui.

⁴Uni o God ut i ukis tari sur i a tultul anunu, sur in pam a wakakino torom ui. Ikut, ra u pam a sakino, un ngara, uni ke pam orosi kut in totok na inaim. A mugumugu tagun a gapman i a tultul anun o God, sur in pitar a warkurai na minabalu torom osi ra i pam a sakino.

⁵I mo ra i wakak sur dat in unatino pas dat utuntudu ina mugumugu tagun a gapman. Awu sur i kibino kut uni a mugumugu in pitar a warkurai na minabalu torom dat, i kibino utkai uni a wakak na nuknuk una balandat i inanos dat lena dat in pami lenra.

⁶I mo ra mot ser pitari kai a takis torom a gapman, uni a kum mugumugu tagun a gapman det a kum tultul anun o God, ma det ser pitar anundet a nilaun una pinapam na tamtamabat a taro.

⁷Mot in pitari torom a taro rop asau ra i tokodos sur mot in pitari torom det: Mot in pitar a takis torom det ra det ser los a takis, ma mot in pitar a totokom torom det ra det ser los totokom. Ma mot in urur torom det ra i tokodos sur mot in urur torom det, ma mot in ulabo pas det ra i tokodos sur mot in ulabo det.

⁸Gong u madek tar anum tu dinau torom taio. Ikut anum ara dinau kut ra kon mana u balu i, i lenri: Un ser nem a taro. Uni osi ra i nem a taro, i sa pam sot pas a kum Warkurai anun o God.

⁹Iri a kum Warkurai anun o God: “Gong u pam a sakino nam tu ino anun taio o nam tu musano anun taio. Gong u um doko taio. Gong u wolong. Gong u nuknuk laulau sur a utna anun taio.” A kum warkurai ri ma a kum warkurai rop kai, ara warkurai kut i pulus bat det. I lenri, “Un nem o pasam elar nami ra u nem ui ut.”

¹⁰Osi ra i nem a pasano, ken pam tu sakino toromi. I mo ra osi ra i pami lenra, i pam sot rop pas a kum Warkurai.

¹¹Mot in pami lenra, ma mot in tama lele a kum bung ri. A du bung i sa sot sur mot in tuangun gusun a ininep. Uni, ra dat turpas a nurnur un o Karisito, a bung ra o God in ulaun dat, kabaut i milau mulus, ikut uniri i sa milau.

¹²I sa labino mirum pas, ma milau mo in waspi. I mo ra dat in lakro ru i mo a kum pinapam tagun a dumirum, ma dat in emar pas nama kum utna na inaim tagun a talapor.