Loma 13:3-12

³Ba꞉ hibila, kuba ododilipa꞉te gabomana꞉tamo na꞉toletolehona, huiyatiya hidohido komo dododilina ba꞉ba꞉te katoletolehonaha꞉. Ba꞉bema꞉ hopodalagi, ama꞉ ubila꞉ka꞉ toleheno kemedenama꞉? Wadiyala ama꞉ hidohido komo kapiya nododilinakuya꞉, ba꞉bene gabomana꞉te ama꞉tamo ba kalakalaha ama꞉ ba꞉bo komilimihoma꞉na꞉ta, iyo, ba꞉be mabuma꞉ ama꞉godolo tole komote a꞉kitanamene.

⁴Ba꞉ hibila, gabomani okodawa ba꞉ Godokono okodawala, ebete ama꞉ mabuma꞉ hido oko bowatina. Huiyatiya keba tetelo ama꞉le eta kuba komo dododimina꞉, ama꞉ ba꞉be komoma꞉ na꞉toletoliya꞉ mabu gabomana꞉te ama꞉tamo kuba huiya hibilo kikamema꞉na꞉ta, iyo, ba꞉be dawate Godokono okodawama꞉ ba eda꞉na ebegodolo helo bitana kuba ododilipa꞉tamo huiya ikalamema꞉.

⁵Ba꞉bema꞉ wadiyala la꞉ hiliyonomate gabomana꞉tamo na꞉papamila꞉hanala꞉, mabu la꞉eno tepo ipuwoeno mulu ukuiti la꞉ ba꞉ba ka꞉na iya꞉tulamenata, ba꞉gala diyala, la꞉le papamila꞉haheno iba꞉godone temeteme komo da꞉ laweoma.

⁶Ba꞉moe ba꞉be mabuma꞉ la꞉le gabomana꞉tamo ta꞉kese mani nikalamenakuya꞉la꞉, mabu iba꞉te ba꞉bi mana꞉mo ibino hiya꞉hiya꞉ oko hiliyonomo Godoko mabuma꞉ owatihona.

⁷Iyo, gabomana꞉te tawakalubi tutumu tabo keba ka꞉na ka꞉kiyalamenaka, wadiyala la꞉ iba꞉tamo ba꞉ba ka꞉na hiya꞉hiya꞉ ta꞉kese mani modobolo nikalamenakuya꞉la꞉, ba꞉gala wadiyala la꞉eno tepo ipuwoeno ukuilo la꞉ ha꞉kiya la꞉ hopamo ba miya꞉te gabomani okopi hiliyonomo hunamo na꞉wadiya꞉paa꞉latelenakuya꞉la꞉.

⁸Ba꞉gala eta komo. Amia꞉no modoboha꞉ tetelo eta hopodalagigodone mani ba lawita ama꞉le ebetamo gala kakikamema꞉ da꞉kiyami, wadiyala ama꞉ tiyonomolo na꞉kahuiyuya꞉, ba꞉bene ama꞉le ba꞉bako gabodo mani gala akalawa꞉la꞉. Huiyatiya numa꞉la꞉, la꞉ hibima꞉ midipino modoboha꞉ komokomo ipuwalo, etate etatamo, etate etatamo malemalelo dito dikama꞉tihuinakoma, talona puliyala. Ba꞉ hibila, eta lumagino modoboha꞉ tetelo ama꞉le ebe malemaletelo dito dowalubimina꞉, ba꞉bako malemale emalagidolo komodo ama꞉ Godokono hiliyonomo Tutumu Tabo komamo kopapamiwatama꞉na꞉ta.

⁹Numa꞉, Godokono Tutumu Tabo hiliyonomate ba꞉moe kapiya tutumu ipuwalo ba꞉pola꞉na, ba꞉moe ko tutumu ba꞉ ba꞉ma ka꞉nala, “Ama꞉ ha꞉kiya ama꞉ demalagidolona, wadiyala ama꞉le ba꞉ba ka꞉na ama꞉ tamelo demedena ba꞉be lumagi malemalelo nemalagidolona.” Ba꞉bema꞉ lumagiti ba꞉moe ko tutumu tabo kapiya kodakodalo ba atila꞉na, komo tutumu tabo wakalami gabote ebegodolo a꞉kitanamene, iyo, ebete eta dubuino kamena pilolo a꞉kalawa꞉mene, ba꞉gala eta lumagi dito a꞉kanakapuma꞉mene, ba꞉gala eta ilina pilolo a꞉kalawa꞉mene, ba꞉gala eta lumagino ilina uwatema꞉ ubi a꞉kihata꞉mene.

¹⁰Ba꞉ hibila, malemale emalagidolo komote lumagigodolo ba itana, ebete kuba ododi ipuwalo eta dawatamo temeteme a꞉kikama꞉le, ba꞉moe mabuma꞉ kebe lumagiti komopi malemalelo emalagidole tutumamo hibinomolo da꞉papamiwatanako, ebete ba꞉be komodo atumu Godokono komo hiliyonomo tutumu tabamo a꞉kapapamiwatanako.

¹¹Nale ba꞉moi komokomo la꞉ bikiyalamemata, mabu na ubila la꞉ ba꞉ma teteno komo ba꞉ma ka꞉na niya꞉tawahala꞉, tete hibinomolo a꞉pe la꞉le u laha komone komahila꞉hama꞉, mabu a hibima꞉ midipino ka꞉ka꞉ mula꞉ tetete ba꞉ na꞉tatali. Numa꞉la꞉, dopamo ale aeno hibima꞉ midi komo Ya꞉sutamo dihatiya꞉ma꞉, ba꞉ba tetelo aeno ka꞉ka꞉ mula꞉ komoeno uluhuku tete muhuludopolo itanami, huiyatiya ba꞉ma tetelo ba꞉ tatalinomoma꞉ edi.

¹²Iyo, hegela owaloho tete ba tatali du teteno hilibubuti ba꞉ na꞉wibo, ba꞉bema꞉ wadiyala ale du teteno kuba ododili komo tama꞉mo miya꞉tete, ale alo teteno alaholoho komo kododima꞉ modobo ilina kopupulima꞉nema꞉.