Rom 11:14-29

¹⁴veia mai egite Iuda ge loloa veia amuto sau tolati la merera te La Tahalo Uru, egite ge maisu totolo, egite tai isahari soioge ge goilo tai te la mahulila te Kraist.

¹⁵Ale La Tahalo Uru pileti egite Iuda, eia veia ge abia mutou la baa veia amuto ge goilo. Mai egite Iuda ge vulo halaba, me La Tahalo Uru ge masaga lou egiteu, eia ge mai la paga ale isapolo sesele, mai la tahalo ale mahuli taro la pileho, la vuhula egiteu igoie mai ale pehoti.

¹⁶Ale amutou ale logala amutou kama e Iuda, amuto igoie sibitala maroka, la vuhula oio moli tegiteu e Iuda lou, la vuhula e ururu tegite Iuda e Abraham mite, La Tahalo Uru veia egiteu tetala seseleti, egite mai la ua la obu, la kabili la obu, me etato mai la halalala. Mai eau ge tovo muli taia soio te la ilali: Etato sau tola la galevi la ilali isa moli, etato kaka, La Tahalo Uru goio vibalava la ilali tomi veia eia maroka. Eala, mai la kabili la obu ge taritigi, etato la halalala tomi tai ge taritigi.

¹⁷Me eia sesele, La Tahalo Uru eia vali tarotia la halala la obu sesele tetala, me eia vagoilo halabati amutou veia eia ge kisi amutou soio te la obu veia amuto ge visivisia tola soio vola. Eala, igoie, amuto kamati kusi bulalahu mai la obu la hohoi, amuto tubu kaseka tataho oio te la obu te La Tahalo Uru maiti egiteu e Iuda sesele.

¹⁸Eala moli umala amuto ge vei tataho rivu lou amutou veia amuto taritigi, me egiteu la halalala ale La Tahalo Uru vali tarotia eia kama kokora. Amuto ge gabutatala tigi, la obu eia kama mahuli oio tamutou, ouka, amuto mahuli oio te la obu.

¹⁹Amuto souka ge hiliti ge vei loua maie mago “La Tahalo Uru vali taro la halala la obu sesele veia ge abia miteu la baa veia amite ge goilo.”

²⁰Me la mererale eia sesele, eala moli La Tahalo Uru vali taro egiteu te la vareagila tegiteu ale egite kama sau tola la merera tetala. Mai ale amuto so sau tatola moli e Kraist, La Tahalo Uru kama ge vali taro amutou. Eala moli eia kama vagari veia amuto ge hate tola lou, ge piligi e Kraist, me La Tahalo Uru ge vali taro tai amutou. Umala pakakasa te la pulolou tamutou ale amuto sau tola halabea te Kraist. Amuto ge pou makovu tataho mai la tilogo.

²¹La Tahalo Uru kama gogo egiteu e Iuda ale mai te la halala la obu tetala sesele. Me oio volale taritigi amuto ge matagaga veia La Tahalo Uru kama ge mata soli amutou ale goilo halaba mai amuto ge vareagi, ouka gologolo.

²²La Tahalo Uru, eia la tahalo la mutelela, eia la tahalo la igototolola tai. Egiteu ale boru, eia vilai egiteu. Eala moli eia suli pepeho amutou mai amuto ge sau tola la gilogo tetala, eala moli mai amuto ge vareagi lou, ge piligi la merera tetala, eia ge vali taro tai amutou.

²³Me mai egiteu e Iuda tai ge piligi la vulovulo giteu te la vareagila, ale egite kama gabu tikumu e Kraist, La Tahalo Uru ge vagoilo lou egiteu te la muli giteu oio tetala, La Uru ge koramulia ge igoa mai ele.

²⁴Amutou la valalua la maligoma, amuto mai la obu ale kusi bulalahu te la hohoi, eala moli igoie La Tahalo Uru vagoiloti amutou te la obu tetala ale taritigi, veia amuto ge magiri mai la halalala sesele, amuto ge tubu tataho, ge vua pepeho. Egiteu e Iuda, egite kama la obu ale kusi bulalahu, egite mai la obu te La Tahalo Uru sesele. Eala eia kama vagari veia La Tahalo Uru ge abi rivu lou egiteu veia ge vagoilo lou egiteu te la obu tetala, egite ge tubu lou oio vola.

²⁵Amuto tabarabaragu, la merera ale, pala eia tabuli kokovu, gageie eau ge veipalea mutou. Mai amuto ge loloa, amuto kama ge pakakasa te la gilogo te La Tahalo Uru ale amuto igoie balavatila. Me la mererale, eia maie: La vareagila tegiteu e Iuda, eia mulimuli ge kaluvu, La Tahalo Uru tau moli la baa ale amuto la valalua ale logala ge goilo pala tetala, kara la giligi mutou ge poga la masasagala tetala.

²⁶Eala, eia matagaga veia la valalua e Iuda tomi, La Tahalo Uru ge vimahuli egiteu, mai e Aisaia veia te La Buk Tabu Ale Pala eia veipala la merera te La Uru soio tegiteu e Iuda maie: La tahalo la vimahuli, eia ge sibitala oilo te la hilile Iakob moli, eia ge abi taro la vulovulo la iruru tegiteu e valaluala.

²⁷Eau ge vimavulaha taro la valalua taku la iruru tegiteu, mai la merera taku ale pala eau veitiale Iakob.

²⁸Eala moli te la valolo ale taritigi alele, egiteu e Iuda goio gima La Tahalo Uru oio vola, me igoie amuto ale logala balavati, la vuhula amuto abiti la muli giteu. Eala moli la masasagala te La Tahalo Uru tavu egiteu, ale eia hiloviti egiteu, eia soloio, la vuhula eia tauti la merera tetala soio tegiteu e ururu mai e Abraham mite veia egite ge tetala.

²⁹La vuhula, La Tahalo Uru kama koramulia veia ge vulo la gabutatalala tetala veia mai la tahalo ale eia hilovia, me eia tola tavutia, veia eia ge piligi loua, ouka.