Roma 11:14-29

¹⁴Mete ma au akalalaꞌok ue-osa ia no neulauk, boso losak tao ala au hatahori Yahudi heli-heling nggara mbiri, losa ketuk hambu masoi-masodak ruma sira sala-singgon nara mai.

¹⁵Neu faik Manetualain timba heni Ndia hatahori Yahudi heli-helin, na, naa soi dalak fo hatahori laen nara hambu lelak fo bisa maso dadi reu Manetualain hatahorin. Tehuu neu ko leo ara mole-dame falik ro Manetualain, naa lolen seli. Naa sama leo ara rasoda fali ruma mamaten nara mai!

¹⁶Haꞌi netuduk numa hatahori rae rumu roti mai. Mete ma ana haꞌi nala tarigu faa, fo loo liman neu Manetualain, neu ko basa rotir raa lalaꞌen oo dadi reu Ndia enan fo malalaok boe. Mete ma hatahori loo lima ai huuk okan esa dadi neu mbule uluk soa-neu Manetualain, neu ko ai huuk naa katematuan oo dadi neu Ndia enan fo malalaok boe.

¹⁷Au ae akasasamak hatahori nusa Yahudi no ai huuk setun esa fo mana mori nai osi dale. Manetualain beta heni ai huuk naa ndanan ketuk ena. Tehuu ei hatahori ta Yahudir, sama leo ai setun fuir. Boe ma Manetualain beta nala ei ndanan ketuk ena fo nakadite sara reu ai huuk manai osi dale naa. No dalak naa, ndanak numa ai huuk manai osi deak mai bisa mori nasamusa, nahuu ndanak naa simbok basa-basan numa ai huuk manai osi dale mai. Naa, sama leo ei fo hatahori ta Yahudir oo simbok mala Manetualain dale susuen boe fo Ana nae feen soa-neu hatahori Yahudin nara.

¹⁸Tehuu besa-besa, ee! Boso koa aom, duꞌa mae, ei numa deak mai naa, neulaun lena heni ndanak kara fo Manetualain beta heni sara raa ena! Mete ma o mae soꞌuk aom, boso lilii-ndondou, te o kada ndanak esa a! O ta ndia tao matea ai huuk naa. Te okan ndia tao nala ai huuk naa natea na!

¹⁹Fama te o nau kokolak mae, “Manetualain beta heni ndanak esa numa ai huuk mana mori nai Ndia osin dale mai, fo Ana bisa nakadite falik au uu naa, fo nggati falik ndana raak naa.”

²⁰Naa, ndaa. Tehuu boso lilii-ndondou mae, Manetualain beta heni ndanak kara raa ena, nahuu ara ta ramahere neu Karistus. De o nggati sara, nahuu o mamahere neu Karistus. Dadi boso koa ao! Malole lenak o besa-besa, ma boso leli-belak kana!

²¹Te hatahori Yahudir, sama leo ndana huun tetebes mana nasamusak nakahuluk na. Tehuu Manetualain ta ela sara rakatataka rala dook ka reu naa. Dadi mete ma o ta mamahere neu Ndia seku neu, boso mamahena mae, Ana ela o makatataka muu naa!

²²Dadi ei muste duduꞌa matalolole dei. Manetualain dalen mansuek. Tehuu Ana oo bubuluk fee huku-doki berak boe. Neu ko Ana fee hukun neu hatahori mana tudak ena, fo mana ta malole noon. Tehuu soa-neu ei hatahori ta Yahudir, Manetualain natudu Ndia dale susuen, sadi ei makaesa mian seku neu, ma elan fo Ana tao hata neulauk soa-neu ei. Tehuu mete ma ei ta ela sana tao talo naa, Ana oo nau beta heni ei numa Ndia ai huun mai boe.

²³Leo naak oo, no hatahori Yahudir boe. Mete ma ara sale dalen do tuke tein nara fo mulai ramahere neu Karistus, na, neu ko Manetualain nau nakadite falik kasa reu ai huuk tetebes naa. Te Ana naena koasa fo tao talo naa na!

²⁴Ei fo hatahori ta Yahudir, sama leo ndanak numa setun fuir mai, fo bakahulun mana mori mbembelak nai osi deak. Tehuu Manetualain here nala ei fo nakadite ei miu ai huu setun neulauk fo Ana selen nai Ndia osin dale, elan fo ai huu fuir mesa kasa laen, ma ai huu osir mesa kasa laen. Mete ma hatahori ta Yahudir mesa kasa bisa dadi talo naa, hata-bali hatahori Yahudir. Naa, bisa dadi lena-lenak bali, mete ma Manetualain nakadite falik kasa reu sira ai huu makasososan.

²⁵Toranoo nggara ein marai Roma! Ei muste malela dedeꞌak ia fo fai bakahulun bei nemeninok. Mete ma ei malelan ena, na, neu ko ei ta bisa koa ao fo duꞌa mae, ei malelak kara. Hata fo bakahulun nemeninok naa talo ia: hatematak ia hatahori Yahudir dalen nara ratea, ma ta nau ramahere neu Karistus. Tehuu ara ta leo naak rakandoo. Mete ma basa hatahori ta Yahudir fo Manetualain here nala sara ena, ramahere neu Karistus ena, na, neu ko hatahori Yahudir oo ramahere neun boe.

²⁶De mete ma faik naa losa ena, neu ko Manetualain tao nasoi-nasoda basa hatahori Yahudir ruma sira sala-singgon nara mai. Naa, sama leo neni surak nai Susura Malalaok ena nae, “Neu ko hambu Hatahori esa mai, fo tao nasoi-nasoda ita numa sosoek mai. Ana numa letek Sion, nai kota Yerusalem mai. Ana ndia tao nala Yakob tititi-nonosin nara sale dalen do tuke tein nara. Ara leo-laꞌo ta tao matak neu Au, ma ara rasadea laꞌo ela Au eno-dala masoda tetebeng ena.

²⁷Au nau koka heni sira sala-singgon. Huu Au ndara fangga hehelu-bartaak ua sara talo naa ena.”

²⁸Tungga-tungga hatahori Yahudir ramanene Karistus Hara Lii Malolen, ara tao aon nara nok bali musu mana laban neun. No dalak naa, ara fee lelak soa-neu ei hatahori ta Yahudir! Leo mae talo naa oo, tehuu Manetualain bei sue-lai sara boe, nahuu Ana sue-lai sira bei-baꞌin nara, ma here nala sara dadi reu Ndia hatahorin nara ena.

²⁹Mete ma Manetualain fee basa buas esa ena, na, Ana ta leꞌa nala falik kana. Mete ma Ana nanggou nala hatahori ena nae, “Woi! Mai, tungga Au! Mai maso dadi muu Au hatahoring leo!” Ana ta husi heni sana bali.