Pwärätä 2:9-28

⁹Üa silei om kewe riaföü. Üa silei pwe ka wöüngau, nge ka wesewesen pisekisek. Üa pwal silei pwe ka küna turunufas me ren chokewe mi apasa pwe ir chon Juta, nge sap ir chon Juta, pwe ir eu mwich än Satan.

¹⁰Kosap niuokusiti och riaföü epwe toruk. Nengeni, ewe Tefil epwe sotunikemi ren an epwe aturalong lon imwen fötek ekoch me leimi, nge oupwe küna riaföü lon ükükün engol rän. Kopwe likitü le lükü, inamwo ika kopwe tolong lon mäla, iwe, üpwe ngonuk ewe mwärin manau.

¹¹Are a wor selingen eman epwe rongorong mine Ngünmifel a üreni ekewe mwichefel! Iö mi pwora ngeni mine a ngau esap küna feiengau ren ewe aruen mäla.”

¹²“Kopwe makkei ngeni ewe chon künöön ewe mwichefel lon Perkamon: Iei alon ewe mi wor ren ewe ketilas mi seisei me ruupekin.

¹³Üa silei ia ka nom ie, lon ewe leni ia än Satan lenien motun king a pwal nom ie. Ka allükülük ngeniei o kosap likitala om lüküei, inamwo ika lon ewe fansoun Antipas, nei chon pwärätä mi allükülük, a ninnila lon ewe leni ia Satan a nom ie.

¹⁴Nge mi wor ekoch mettoch üpwe pölüenuk won: A wor reöm ekoch ra aleasochis ngeni aitien Palam, ätewe mi aiti ngeni Palak usun an epwe emweni ekewe aramasen Israel ngeni tipis ren an pese ngeniir, pwe repwe mongö föten uluulun anümwäl o repwe pwal föri föförün lisowu.

¹⁵Ina chök usun a pwal wor reöm aramas mi aleasochis ngeni aitien ekewe chon Nikolaus.

¹⁶Iei kopwe aier seni om tipis! Are kosap aier üpwe müttir feito reöm o fiu ngeni ekewe aramas ren ewe ketilas mi itiwu seni lon awei.

¹⁷Are a wor selingen eman epwe rongorong mine Ngünmifel a üreni ekewe mwichefel! Iö mi pwora ngeni mine a ngau üpwe ngeni och seni ewe mana mi monomon, üpwe pwal ngeni eman me eman leir eföü fau mi pwechepwech a mak won eu it mi fö, esap wor eman epwe silei pwe ewe chök eman mi angei.”

¹⁸“Kopwe makkei ngeni ewe chon künöön ewe mwichefel lon Tiatira: Iei alon ewe Nöün Kot, mesan ra wewe ngeni pulopulen ekkei, pachapachan ra meriweriw usun piras mi amis.

¹⁹Üa silei om kewe föför. Üa silei om eäni chen, om allükülük, om angang me om mosonotam. Üa silei pwe mine ka föri iei a lapala seni mine ka föri me lepoputän.

²⁰Nge iei met üpwe pölüenuk won: Ka mwüt ngeni ewe fefin Isipel mi püsin aita ngeni eman soufos fefin, pwe a asukul o emweningaua nei chon angang ar repwe föri föförün lisowu, repwe pwal mongö föten uluulun anümwäl.

²¹Üa ngeni neminei fansoun an epwe aier seni an tipis, nge esap mochen ükütiu seni an föförün lisowu.

²²Nengeni, üpwe apwüngü i me chokewe mi föri ar föförün lisowu ngeni ren eu samau, iwe, repwe tolong lon watten riaföü. Iei met üpwe föri, are resap aier seni ar kewe föför mi ngau ra förifengeni.

²³Üpwe pwal niela nöün kana. Mürin chon ekewe mwichefel meinisin repwe silei pwe ngang ewe eman mi silei ekiek me letipen aramas meinisin. Iwe, üpwe liwini ngeni eman me eman ükükün liwinin an föför.

²⁴Nge ekewe ekoch me leimi lon Tiatira ousap aleasochisi ei sokun kait mi ngau, ämi ousap kaiö met ekewe ekoch ra aita ngeni ‘alololun monomonen ekiekin Satan’, üpwe ürenikemi pwe üsap anomu womi och chou.

²⁵Nge oupwe chök kamwöchünük won mine oua eäni tori üpwe war.

²⁶Iö mi pwora ngeni mine a ngau o sopwela le föri letipei tori lesopolan, üpwe ngeni nemenem won ekewe mwü,

²⁷usun chök ngang üa angei ai nemenem seni Semei. Epwe nemeni ir ren efoch wokomächä, epwe atatakisiiretiu usun sepi mi för seni pwül.

²⁸Üpwe pwal ngeni ewe füün rän.