Psalms 49:1-19

¹Mu telmed urngin e girdi’! Motoyilgad e girdi’ u gubin yang,

²pi tolang nge pi sobut’, nge pi fel’ rogon nge pi gafgow.

³Ba tamilang lanin’ug; bay ug weliy e thin nib gonop.

⁴Bay gu tiyan’ug nga ba salepow, nggu weliy fan ni gu be chubeg e musik ni harp.

⁵Dagur rus ko ngiyal’ ni gu be par u thathren e riya’, ni ngiyal’ nike yon’eg e pi to’ogor nga longob,

⁶ni girdi’ ni kireb ni be pagan’rad ko fel’ rogon rorad, ni yad ba uf ko machaf rorad nib yo’or.

⁷Dabyag rodad ni nge mang gadad e da biyuliyed gadad, dabiyag ni ngad pi’ed puluwon e pogofan rodad ngak Got,

⁸ya puluwon e pogofan ko girdi’ e yugub pag feni tolang. Ya n’en ni gadad ra pi’ ni puluwon e dabi gaman

⁹ni nge talegdad ko yan nga low ngad pired ni dab da m’ad bi’id.

¹⁰Demutrug be’ ma rayag ni nge guy ni mus ko girdi’ nib gonop ma be yim’, ni ta’reb rogon ko girdi’ nib balyang ma ba minan’. Yad gubin ni yad be pag e pin’en ni bay rorad ni pire’ nga pa’ e pi’in owcharad.

¹¹Yad be leamnag ni pi naun rorad e bayi par ni dariy n’umngin nap’an; nu rom e bay ra pired riy ni gubin ngiyal’ yad be tunguy fithingrad ko yungi binaw ntaferad.

¹²Feni sorodad e dabiyag ni nge talegdad ko yam’; ya ri bay dm’ad ni bod e gamanman.

¹³A mu guy e n’en ke rin’ e pi’in yad e yad be toer ngorad, nge n’en ke buch rok e pi’in ke nemow u wun’rad e pin’en ni bay u pa’rad ni ka ra fla’abgad riy.

¹⁴Ke m’ay i turguy ni ngarm’ad ni bod e saf, ma yam’ e ir e bayi mil farad ngak. Ma pi’in nib mmat’aw e yad ra gel ngorad, ma be par dowrad ni be wod ko gin ni kan k’eyagrad riy nib orel ko tabinaw rorad!

¹⁵Machane Got e ra ayuwegneg; bayi chuwegeg u gelngin e yam’.

¹⁶Ngiyal’ nra yo’or ban’en rok be’ ma dabi magawon nga lanin’um, nge ngiyal’ nike mun daken e fel’ rogon rok;

¹⁷ya ra yim’ ma dabiyag ni nge fek nge un ngak; ya fel’ rogon rok e dabi un ngak nga low.

¹⁸Mus ni fa’anra be par be’ nike nemowan’ ngak ko biney e tamilang, ma yibe pining e sorok ngak ni bochan e mon’og ni be tay,

¹⁹ma ri bayi yan nge yan i cheag ko pi chitamngin kakrom ni karm’ad, ko gin ni ba lumor riy ndariy n’umngin nap’an.