A Umana Kakailai 49:1-19

¹Kai nina i lue ra kakailai; a kakailai kai ra tarai Kora. Avat a lavur vuna tarai par, avat a valongore go; Avat a valavalongor, avat a tarai ta ra rakarakan a gunagunan;

²Avat par a tarai tuna ma ra umana ngalangala, A umana uviana ma ra umana luveana.

³A ngiegu na tatike ra tinata i kabinana, Ma ra nuknuk ta ra balagu na kabatau.

⁴Ina valongore ra tinata valavalar; Ina pala kaugu tinata i pidik ta ra pagol.

⁵Ina burut dave ta ra kaina e, Ba ra varpiam kadiat dia ki ur vue iau na tur kikil iau?

⁶Diat dia nurnur ta ra ngala na tabarikik, Ma dia vavagia pa diat mulai tago i peal kadia magit;

⁷Pa ta tikai ta diat i valaun valar pa turana Ba na varkul pire God ure,

⁸(Tago ra varkul ure kadia nilaun i ngala mat, Ma pa na pait valar pa ia vatikai namur),

⁹Upi na laun vatikai, Ma koko na gire ra tung na minat.

¹⁰Tago i gire ba ra umana tena kabinana dia mat, A lunga bula ma ra koloata dir par dir virua, Ma ra umana enana dia kale pa kadia pepeal magit.

¹¹Diat a ki vatikai ta kadia tung na minat; Nam iat a kubakuba i diat ta ra lavur taun tarai namur, Kadiat dia vaiang tar ra iang i diat iat ta ra umana gunan.

¹²Damana a tadar na tarai pa dia laun vatikai, Dia da ra umana leing nina dia virua ka.

¹³Diat dia nurnur ta diat mulai, dia mur go ra nga, Ma ra umana talai diat bula nina dia mulaot ta kadia tinata. Sela.

¹⁴Di tulue varuk diat ta ra ruarua na tulungen da ra kikil na sip; A minat kadia tena varbalaurai; A umana tena takodo diat a kure diat ta ra malana, A pal a paka i diat na panie, ma diat a kuba ta ra ruarua na tulungen.

¹⁵Ma God na valaun ra tulungeagu kan ra dekdek i ra ruarua na tulungen, Tago ia iat na onge iau. Sela.

¹⁶Koko u burut ba tikai i uviana vanavana, Ba i tavua ra minamar ta ra kubana,

¹⁷Tago ba i mat pa na kap vue ta magit; Kana ngala na minamar pa na kuba mur ia.

¹⁸A dovotina ba i ga laun boko i biti ba i ti doan, Ma ra tarai dia pite pa u ba i tavua kaum tabarikik;

¹⁹Na vana tadav ra umana tamana, Nina ba pa dia gire ra keake mulai.