PSALMORUM 65:3-9

³Dicite Deo: Quam terribilia sunt opera tua, Domine ! in multitudine virtutis tuæ mentientur tibi inimici tui.

⁴Omnis terra adoret te, et psallat tibi; psalmum dicat nomini tuo.

⁵Venite, et videte opera Dei: terribilis in consiliis super filios hominum.

⁶Qui convertit mare in aridam; in flumine pertransibunt pede: ibi lætabimur in ipso.

⁷Qui dominatur in virtute sua in æternum; oculi ejus super gentes respiciunt: qui exasperant non exaltentur in semetipsis.

⁸Benedicite, gentes, Deum nostrum, et auditam facite vocem laudis ejus:

⁹qui posuit animam meam ad vitam, et non dedit in commotionem pedes meos.