1Uti nyuntu Mayatja Godala tjungu nyinama Witulya Puḻkangka, kanta paluṟu nyuntunya tiṯutjarangku aṯunymaṟa kanyilku.
2Ka nyuntu nyanga palunya kuliṟa nyanga alatji palula wangkaku, “Wiṟungkuṉin ngayunya aṯunymaṟa kanyilpai munuṉin kuṯitji puṟunytju angatjuṟa kanyilpai, ngayuku ngalkiltu, kaṉa ngayulu puḻkaṟa mulamularingkula nyuntunya waḻkulpai.”
3Ka paluṟu nyuntunya aṯunymankuku kutjupangku nyuntunya ngunti kurantjaku-tawara, munu paluṟu nyuntunya wankaṟu kanyilku pikatjararingkula ilunytjaku-tawara.
4Uwa, paluṟunta wiṟuṟa kanyilku, panya tjuḻpungku kuḻunypa tjuṯa nyaḻpingka unngu angatjuṟa kanyilpai, palu puṟunytjunta angatjunkula kanyilku, kan nguḻu wiya rapa alatjiṯu nyinaku paluṟu aṯunymankunyangka.
5Munun mungangka kura kutjupa kutjupa nyuntula utiringkunyangka nyakula nguḻuringkunytja wiya nyinaku, munun kaḻaḻa kuḻu kutjupangku kuḻaṯa waṉinyangka nyakula nyuntu nguḻuringkunytja wiyaṯu, rapa alatjiṯu ngaṟaku.
6Munun mamu panya kura mungangka para-ngaṟapai tjuṯaku nguḻuringkunytja wiya rapa nyinaku, munun kaḻaḻa kuḻu tjana iluntankunyangka nyakula nyuntu nguḻuringkunytja wiyaṯu ngaṟaku.
7Ka nyuntula itingka aṉangu tjuṯa mulapa pikatjararingkula iluku, palu Godalu nyuntunya aṯunymaṟa kanyinnyangka nyuntu pikatjararingkunytja wiya palya alatjiṯu nyinaku.
8Munu nyuntu kuṟu aḻaringkula nyakuku Godalu aṉangu kura palyalpai tjuṯa pungkunyangka.
9Munu nyuntu rapangku kulilku, “Mayatjaluṉi ngayunya aṯunymaṟa kanyini katutja puḻkangku.”
10Ka nyara palulanguṟu kura kutjupa kutjupa nyuntula wirkankunytja wiya ngaṟaku.
11Panya Godalu witulku palumpa angelpa tjuṯa nyuntunya aṯunymaṟa kanyintjaku kaḻaḻa mungangka kuḻu, munu nyinanyangka ankunyangka kuḻu.
12Munuya nyara paluṟu tjana nyuntunya maṟangku katuṟa kanyilku punkaṟa apungka tjina kaṯakatinytjaku-tawara.
13Ka nyuntu lion pikaṯi tjuṯangka liru tjuṯangka kuḻu nguṟurpa rapa para-ngaṟaku, kaya nyuntunya patjantja wiyangku wantiku.
14Panya Godalu wangkanyi nyanga alatji, “Nyuntu ngayuku puḻkaṟa mukuringkunyangkaṉa nyuntunya wankaṟunkuku, munuṉanta nyuntunya aṯunytju kanyilku nyuntu ngayuku mulamularingkunyangka.
15Palu kura kutjupa kutjupa nyuntula utiringkunyangkampa ngayunya aḻṯi, kaṉa ngayulu kuliṟa nyuntula tjunguringkula nyuntunya wankaṟunkuku, kaya aṉangu kutjupa tjuṯangku nyuntunya wankaṟunkunyangka nyakula wangkaku, ‘Ai, wati nyangatja wiṟu mulapa.’
Psalm 91
Psalm 91:1-15