Mboe 91:1-15

¹Tomtom ta so ipase pa Anutu kor kana kat be iwe ur pini mi imenderkaali, mi Anutu mbura keskeezeŋana ikuubukaali,

²na ni irao iso pa Anutu ta kembei: “Yooba Anutu tio, nio aŋpase pu. Pa nu we siiri mbolŋana pio mi poroukalkaala yo.”

³Ŋonoono kat. Ni ko ipazalu mi ipiŋgis kumbum pa kilis ta kom koi bizin tiur pu na. Mi sombe mete sananŋana sa ipet, na ni ko iziiri ma imbot molo pu.

⁴Ni ko ikuubukaalu kembei ta man ikamam pa lutuunu bizin, bekena mbotmbot ndabok men. Mi mbulu kini ta itoto sua kini mbukŋana na, ko iwe siŋgiao pu mi iporoukalkaalu.

⁵Tana nu ko moto kom pa koroŋ sananŋan ta tiwwa pa mbeŋ na som. Mi aigule tomini, ko moto kom pa kom koi bizin peene lutunlutun kizin na som.

⁶Tana mete sananŋana ta ikamam zin tomtom pa mbeŋ na, mi pataŋana ta ikazas zin pa aigule na, nu ko moto som.

⁷Sombe tomtom munŋaana men (1,000) timetmeete ma titoptop su zilŋom uunu, mi tomtom munŋaana laamuru (10,000) timetmeete su nomom woono, na moto pepe. Pa koroŋ sa ko ipasaanu som.

⁸Nu ko mbotmbot, mi re kat kadoono tabe Anutu ikam pizin wal sananŋan.

⁹Ŋonoono kat. Yooba, nio aŋpase pa nu itum tamen be we ur pio mi menderkaala yo. Tana sombe Anutu kor kana kat iwe ur pu, mi imenderkalkaalu,

¹⁰na koroŋ sananŋana sa ko irao be ipasaanu na som. Mi mete sananŋana sa ko irao igarau ruumu ku na som.

¹¹Pa Anutu ko iur sua pizin aŋela kini be timboro u mi matan pu pa pai ku ta boozomen.

¹²Mi zin ko tikiskisu: Kokena tutkat kumbum sala pat ma mel.

¹³Nu ko paraama su pa laion mi mooto sananŋan, mi zin tikam kosa sa pu som. Laion popoŋan ta malmalŋan kat i, mi mooto ta kananŋan i, ko tirao be tipasaanu na som.

¹⁴Pa Yooba iso ta kembei: “Zin wal ta tiur lelen pio mi tisekap mar tio na, nio ko aŋboro zin ma timbot ambai. Paso, zin tiute kat yo, tana nio ko aŋwit zin mi aŋur zin sala kor: Kokena koroŋ sa ipasaana zin.

¹⁵Zin sombe titaŋroro yo, nako aŋpekel kalŋan mi aŋuulu zin. Mi sombe pataŋana sa ikam zin, nako aŋbotmbot raama zin, mi aŋtatke zin pa pataŋana kizin, mi aŋpakur zin ma zan iwe biibi.