Psalm 84:5-12

⁵Fuka lupan insewowo lun mwet su ku lalos tuku sum me, Su kena oru fufahsryesr lalos nu Fineol Zion.

⁶Ke elos fahsr sasla infahlfal pao in Baca, Acn we ekla nu ke sie acn oasr unon we, Ac ke pacl in af uh, sessesla acn uh ke lulu in kof.

⁷Ke elos fahsr, ku lalos yokyokelik, Ac elos ac fah liye God lun god uh in Zion.

⁸Lohng pre luk, O LEUM GOD Kulana. Porongeyu, O God lal Jacob.

⁹Akinsewowoye tokosra lasr, O God — Tokosra se su kom sulela.

¹⁰In muta len sefanna in lohm sum Wo liki na in muta ke tausin len in kutena acn saya. Nga lungse in tu na ke mutunpot in lohm sin God luk Liki na nga in muta in lohm sin mwet koluk.

¹¹LEUM GOD El mwe loeyuk lasr ac Tokosra wolana lasr, Su akinsewowoye kut ke lungkulang ac sunak. El tiana sruokya kutena ma wo Lukelos su oru ma suwohs.

¹²LEUM GOD Kulana, fuka lupan insewowo lalos su lulalfongi kom!