Psalm 71:1-14

¹LEUM GOD, nga tuku in wikla yurum; Nikmet lela in kutangyukla nga.

²Ke suwoswos lom, kom in kasreyu ac loangeyu. Porongeyu ac moliyula.

³Kom fah eot in molela luk, Ac nien wikla ku luk in langoeyu, Tuh kom eot ku ac nien muta ku luk.

⁴O God luk, moliyula liki poun mwet koluk, Liki ku lun mwet sesuwos ac mwet sulallal.

⁵LEUM GOD Kulana, nga filiya finsrak luk in kom; Nga nuna lulalfongi kom oe ke pacl nga srakna tulik.

⁶Nga nuna lulalfongi kom in moul luk nufon. Kom karinginyu na oe ke nga isusla ah me. Nga ac fah kaksakin kom pacl e nukewa.

⁷Moul luk sie mwe srikasrak nu sin mwet pus, Mweyen kom mwet kasru ku luk.

⁸Ke len nufon nga kaksakin kom Ac fahkak wolana lom.

⁹Nikmet sisyula inge ke nga matuoh; Ac nikmet ngetla likiyu inge ke nga munasla.

¹⁰Mwet lokoalok luk lungse in uniyuwi, Elos kaskas keik ac pwapa in lainyu.

¹¹Elos fahk, “God El sisella tari. Kut som sruokilya, Tuh wangin mwet ac molella.”

¹²O God, nikmet muta loesla likiyu, God luk, aksaye kasreyu.

¹³Lela tuh elos su lainyu In kutangyukla ac kunausyukla. Lela tuh elos su suk in akkolukyeyu In akmwekinyeyuk ac akkolukyeyuk.

¹⁴Nga ac fah filiya finsrak luk in kom pacl e nukewa; Nga fah kalwenina in akyokye pusren kaksak luk nu sum.